Read DIEM PROTESTANTA 1 Mpanjaka 21 Bible Online

1 Mpanjaka 21 - DIEM PROTESTANTA bible

1 Mpanjaka 21

¹Taorian’izany dia izao no nitranga: nisy lehilahy natao hoe Nabôta tao Jizrehela, izay nanana tanimboaloboka teo akaikin’ny lapan’i Ahaba mpanjakan’i Samaria.

²Dia niteny tamin’i Nabôta i Ahaba indray andro nanao hoe: — Omeo ahy ny tanimboalobokao hataoko zaridaina fambolena anana, satria mba akaikin’ny lapako izy; homeko tanimboaloboka tsara kokoa noho io ianao ho takalony, na koa homeko izay vola tokom-bidiny raha izany no mety aminao.

³Fa hoy i Nabôta tamin’i Ahaba: — Sanatria amiko eo anatrehan’ny TOMPO raha izay hanome anao ny lova avy amin’ny razako[145]!

⁴Ary nalahelo sady tezitra i Ahaba no niverina tao an-tranony, satria nilazan’i Nabôta avy ao Jizrehela hoe: «Tsy homeko anao ny lova avy amin’ny razako.» Dia nandry teo am-parafarany izy ka nitodika tany amin’ny rindrina ary tsy nety nihinan-kanina.

⁵Fa nanatona azy i Jezebela vadiny ka nanao taminy hoe: — Nahoana no manjonitra toy izao ianao ka tsy mety mihinan-kanina?

⁶Dia hoy ny navaliny azy: — Nitenenako i Nabôta avy ao Jizrehela hoe: «Omeo ahy ny tanimboalobokao hovidiko na koa hatakaloko tanimboaloboka hafa, raha izany no mety aminao»; fa namaly izy hoe: «Tsy homeko anao ny tanimboaloboko».

⁷Dia hoy i Jezebela vadiny taminy: — Ny tenanao no manjaka amin’i Israely; koa miarena, dia mihinàna, ary aoka hifaly ny fonao, fa ny tenako mihitsy no hanome anao ny tanimboalobok’i Nabôta ilay Jizrehelita.

⁸Dia tamin’ny anaran’i Ahaba no nanoratan’i Jezebela taratasy, ka nasiany tombon-kasem-panjakana ireny ary nalefany ho an’ny loholona sy ny manampahefana tao an-tanàna nonenan’i Nabôta.

⁹Izao no voasorany tao amin’ny taratasy: «Miantsoa andro fifadian-kanina ka i Nabôta no asaivo mitarika ny vahoaka amin’izany.

¹⁰Mifanatrika aminy eo kosa dia asio roa lahy mba hiampanga lainga azy ho nanozona an’Andriamanitra sy ny mpanjaka. Ary ento any ivelan’ny tanàna izy ka torahy vato ho faty[146]».

¹¹Ary ny loholona sy ny manampahefana tao an-tanànan’i Nabôta dia nanao araka ny baikon’i Jezebela tamin’ny taratasy nalefany ho azy ireo.

¹²Niantso andro fifadian-kanina izy ka i Nabôta no nasainy nitarika ny vahoaka.

¹³Dia niroso teo anoloan’i Nabôta ireo tsivalahara roa lahy ka niampanga lainga azy teo anatrehan’ny olona hoe: — Nanozona an’Andriamanitra sy ny mpanjaka i Nabôta! Koa dia nentin’ny olona tany ivelan’ny tanàna izy ary notorahany vato mandra-pahafatiny.

¹⁴Ary naniraka olona hilaza amin’i Jezebela ny manampahefana tao an-tanàna fa notoraham-bato i Nabôta ka maty.

¹⁵Rehefa ren’i Jezebela fa maty notoraham-bato i Nabôta, dia hoy izy tamin’i Ahaba: — Mitsangàna ka alao ho anao ny tanimboaloboka izay tsy neken’i Nabôta hamidy taminao, satria tsy isan’ny velona intsony izy fa efa maty.

¹⁶Rehefa ren’i Ahaba fa maty i Nabôta, dia lasa izy nankany amin’ny tanimboalobok’i Nabôta ilay Jizrehelita mba haka izany.

¹⁷Fa nisy tenin’ny TOMPO tamin’i Elià avy any Tisbe nanao hoe:

¹⁸— Midîna mankany amin’i Ahaba mpanjakan’i Israely izay ao Samaria. Ao an-tanimboalobok’i Nabôta izy izao, satria lasa nankao izy mba haka izany.

¹⁹Koa teneno izy hoe: Izao no lazain’ny TOMPO: «Rehefa avy nahafaty olona ve ianao, dia mbola haka ny fananany koa!» Ary teneno indray izy hoe: Izao no lazain’ny TOMPO: «Eo amin’ny toerana izay nilelafan’ny alika ny ran’i Nabôta no hilelafan’ny alika ihany koa ny ranao.»

²⁰Dia hoy i Ahaba tamin’i Elià: — Mbola hitanao ihany va aho, ry ilay fahavaloko? Ka novaliany hoe: — Eny, mbola hitako ihany ianao satria efa nitolo-tena hanao izay ratsy eo imason’ny TOMPO;

²¹fa izao no nambarany: «Hahatonga loza aminao Aho ka handringana anao tanteraka, hofongorako ny lehilahy rehetra amin’ny fianakavianao, na zaza izy na olon-dehibe.

²²Hataoko tahaka izay nanjo ny taranak’i Jerôbohama zanakalahin’i Nebata sy ny taranak’i Bahasà zanakalahin’i Ahià ny taranakao, noho ny nampahaviniranao Ahy sy ny nampanotanao an’i Israely.»

²³Niteny momba an’i Jezebela koa ny TOMPO ka nanao hoe: «Ary i Jezebela dia hohanin’ny alika eo akaikin’ny mandan’i Jizrehela[147].»

²⁴Izay taminganao, ry Ahaba, ka maty ao an-tanàna dia hohanin’ny alika, ary izay maty any an-tsaha kosa dia hohanin’ny voro-manidina.

²⁵Fa tsy nisy mihitsy olona tahaka an’i Ahaba izay nitolo-tena hanao izay ratsy eo imason’ny TOMPO, satria nampirisihin’i Jezebela vadiny izy.

²⁶Zava-maharikoriko loatra no vitany tamin’ny nanarahany ny sampy tahaka ny nataon’ny Amôrita izay noroahin’ny TOMPO teo anoloan’ny Israelita.

²⁷Rehefa ren’i Ahaba izany, dia norovitiny ny fitafiany, ka gony no nanaovany manolo-koditra; dia nifady hanina izy sady nandry tamin’ilay gony ary namindra miadana dia miadana.

²⁸Fa nisy tenin’ny TOMPO tamin’i Elià avy any Tisbe nanao hoe:

²⁹— Moa hitanao izao fietren-tenan’i Ahaba eto anatrehako izao? Satria nanao izany izy, dia tsy hahatonga loza amin’ny fianakaviany amin’ny androny Aho, fa amin’ny andron-janany kosa.