Read DIEM PROTESTANTA 2 Mpanjaka 1 Bible Online

2 Mpanjaka 1 - DIEM PROTESTANTA bible

2 Mpanjaka 1

¹Taorian’ny nahafatesan’i Ahaba dia nikomy tamin’i Israely i Môaba.

²Indray andro i Ahazià mpanjakan’i Israely dia nianjera avy teny an-davarangan’ny efitrano ambony amin’ny lapany tao Samaria ka naratra mafy. Dia naniraka olona izy hanontany an’i Bahala-Zeboba[1] andriamanitry ny tanànan’i Hekrôna, raha toa ka ho sitrana amin’izao ratra nahazo azy izao na tsia.

³Fa hoy kosa ny anjelin’ny TOMPO tamin’i Elià avy any Tisbe: — Mandehana mihaona amin’ny iraky ny mpanjakan’i Samaria ka lazao izy hoe: «Moa tsy misy Andriamanitra ve any Israely no mandeha hanontany an’i Bahala-Zeboba andriamanitr’i Hekrôna ianareo?»

⁴Dia ampio koa hoe: «Izao no tenin’ny TOMPO ho an’ny mpanjakan’i Israely: ‹Tsy hiala eo am-parafara izay nandrianao intsony ianao, fa ho faty tokoa.› » Ary lasa i Elià nampita hafatra.

⁵Dia niverina tany amin’ny mpanjaka ireto iraka. Rehefa nanontany ny anton’ny niverenany kosa i Ahazià, dia novaliany hoe:

⁶— Nisy lehilahy iray nanatona anay sady nanome baiko anay mba hiverina atỳ aminao ka hilaza aminao izao tenin’ny TOMPO izao: «Moa tsy misy Andriamanitra ve any Israely no maniraka hanontany an’i Bahala-Zeboba andriamanitr’i Hekrôna ianareo? Noho izany, dia tsy hiala eo am-parafara izay nandrianao intsony ianao, fa ho faty tokoa!»

⁷Ary hoy ny mpanjaka tamin’ireo: — Fa manao ahoana izay lehilahy tonga nitsena anareo izay ka nilaza izany teny izany taminareo?

⁸Dia novaliany hoe: — Manao akanjo volom-biby sy fehikibo hoditra[2] izy. Dia hoy ny mpanjaka: — I Elià avy any Tisbe izay!

⁹Dia nandefa manamboninahitra iray miaraka amin’ny miaramila dimampolo ny mpanjaka mba hisambotra an’i Elià. Ary ireo niakatra terỳ an-tampon-tendrombohitra izay nipetrahan’i Elià. Dia nitenenan’ilay manamboninahitra izy hoe: — Ry olon’Andriamanitra ô, midîna ianao, hoy ny mpanjaka!

¹⁰Fa novalian’i Elià hoe: — Raha olon’Andriamanitra tokoa aho, dia aoka hisy afo hilatsaka avy any an-danitra handevona anao sy ny miaramila dimampolo fehezinao[3]! Dia nisy afo nilatsaka avy tany an-danitra ka nandevona ilay manamboninahitra sy ny miaramilany dimampolo.

¹¹Ary nalefan’ny mpanjaka indray ny manamboninahitra iray hafa miaraka amin’ny miaramila dimampolo hankany amin’i Elià. Dia nitenenan’ilay manamboninahitra izy hoe: — Ry olon’Andriamanitra, midîna faingana ianao, hoy ny mpanjaka!

¹²Fa novalian’i Elià hoe: — Raha olon’Andriamanitra tokoa aho, dia aoka hisy afo hilatsaka avy any an-danitra handevona anao sy ny miaramila dimampolo fehezinao! Dia nisy afo nilatsaka avy tany an-danitra ka nandevona ilay manamboninahitra sy ny miaramilany dimampolo.

¹³Mbola nalefan’ny mpanjaka koa ny manamboninahitra iray hafa miaraka amin’ny miaramila dimampolo. Dia niakatra ny tendrombohitra ilay manamboninahitra; rehefa tonga izy, dia nandohalika teo anatrehan’i Elià ka nitalaho taminy nanao hoe: — Ry olon’Andriamanitra ô, mba tsimbino re ny aiko sy ny an’ireto miaramilako dimampolo ireto!

¹⁴Fantatro fa efa nisy afo nilatsaka avy tany an-danitra izay nandevona ireo manamboninahitra roa talohako mbamin’ny miaramila feheziny avy. Ankehitriny kosa mba tsimbino re ny aiko!

¹⁵Ary hoy ny anjelin’ny TOMPO tamin’i Elià: — Midîna miaraka aminy, fa aza matahotra azy. Dia nidina niaraka tamin’ilay manamboninahitra ho any amin’ny mpanjaka i Elià,

¹⁶ka nilaza tamin’i Ahazià ny tenin’ny TOMPO hoe: — Satria naniraka olona hanontany an’i Bahala-Zeboba andriamanitr’i Hekrôna ianao, hoatra ny hoe tsy misy Andriamanitra mba azo anontaniana eto amin’i Israely, dia tsy ho tafala eo am-parafara izay nandrianao intsony ianao fa ho faty tokoa.

¹⁷Dia maty tokoa araka ny tenin’ny TOMPO voalazan’i Elià i Ahazià; ary satria tsy mba niteraka izy, dia i Jôrama rahalahiny[4] no nanjaka nandimby azy tamin’ny taona faharoa nanjakan’i Jôrama zanakalahin’i Jôsafata sady mpanjakan’i Joda.

¹⁸Ny sisa amin’ny tantaran’i Ahazià ary koa ny zavatra hafa rehetra nataony dia voasoratra ao amin’ny boky milohateny hoe Asan’ireo mpanjakan’i Israely.