Read DIEM PROTESTANTA 2 Mpanjaka 12 Bible Online

2 Mpanjaka 12 - DIEM PROTESTANTA bible

2 Mpanjaka 12

¹Tamin’ny taona fahafito[58] nanjakan’i Jehò tamin’i Israely no tonga ho mpanjakan’i Joda i Jôasy; vao fito taona izy tamin’izay, ary naharitra efapolo taona no nanjakany tany Jerosalema. Ny anaran-dreniny dia i Tsibià avy any Beera-Seba.

³Nanao izay mahitsy eo imason’ny TOMPO tamin’ny androny rehetra i Jôasy, satria nampianatra azy tsara i Jôiadà mpisorona.

⁴Saingy tsy nofoanany ny toeram-panasinana, ka mbola tonga nitondra sorona sy nandoro azy hanetona teny ihany ny olona.

⁵Indray andro dia hoy i Jôasy tamin’ireo mpisorona: — Angoninareo izay vola rehetra entina ato an-tranon’ny TOMPO, dia ny vola nandoavan’ny olona ny hetrany[59] na ny vola natolotra an-tsitrapo. Asaivo hangonin’ireo mpandray vola voatendry izany ka hampiasainareo hanamboarana izay hitanareo fa simba amin’ny tempoly.

⁷Kanjo tamin’ny taona faha-23 nanjakan’i Jôasy dia tsy mbola voavoatr’ireo mpisorona ihany ny simba tamin’ny tempoly.

⁸Koa nampiantso an’i Jôiadà sy ny mpisorona hafa i Jôasy mpanjaka ka nanao taminy hoe: — Nahoana no tsy namboarinareo ny simba tamin’ny tempoly? Noho izany dia tsy mahazo maka vola amin’ny mpandray volanareo intsony ianareo, fa avelao kosa izany hanamboarana ny tempoly.

⁹Dia nanaiky tsy handray vola amin’ny olona intsony sy tsy hiandraikitra ny fanamboarana ny tempoly ny mpisorona.

¹⁰Fa naka vata iray i Jôiadà mpisorona, dia noloahiny ny sarony ka napetrany teo akaikin’ny alitara teo ankavanan’ny fidirana amin’ny tranon’ny TOMPO; dia nalatsaky ny mpisorona mpiandry varavarana[60] tao ny vola rehetra nentina tao an-tranon’ny TOMPO.

¹¹Rehefa hitany fa be ny vola tao am-bata, dia nangonin’ny mpitantsoratry ny mpanjaka sy ny mpisorombe ny vola tao an-tranon’ny TOMPO ka nisainy.

¹²Rehefa voaisa ny vola, dia natolony ny mpiandraikitra ny tranon’ny TOMPO izay nampiasa izany hanakaramana ny mpandrafitra sy ny mpanao mari-trano niasa tao an-tranon’ny Tompo

¹³mbamin’ny mpandatsa-biriky sy ny mpipai-bato ary koa hividianana hazo sy vato voapaika hanamboarana ny simba amin’ny tranon’ny TOMPO sy hiantohana izay fandaniana hafa rehetra ilaina amin’izany.

¹⁴Nefa tsy mba nanaovana koveta na antsy na tsatokaty famafazana[61], na trompetra na zavatra hafa vita volamena na volafotsy ireny fanomezana nentina tao an-tranon’ny TOMPO ireny.

¹⁵Dia nomena ny mpanao raharaha izany hanamboarana ny tranon’ny TOMPO.

¹⁶Tsy nampamoahina ny mpanome karama ny mpiasa satria nahatoky tamin’ny fiasany[62].

¹⁷Ny vola narotsaky ny olona ho solon’ny sorom-panonerana na sorona fanalana ny ota dia tsy mba natolotra ho an’ny tranon’ny TOMPO, fa an’ny mpisorona kosa[63] izany.

¹⁸Tamin’izany dia niakatra nanafika ny tanànan’i Gata i Hazaela mpanjakan’i Siria, ka nahazo azy; rehefa izany, dia niomana hanafika an’i Jerosalema ihany koa izy.

¹⁹Fa nangonin’i Jôasy mpanjakan’i Joda avokoa ny zava-tsarobidy rehetra izay natolony na natolotr’ireo razany mpanjakan’i Joda, dia i Jôsafata sy i Jôrama ary i Ahazià ho an’ny TOMPO, mbamin’ireo volamena napetraka tao amin’ny efitrano firaketan’ny tempoly sy tao an-dapan’ny mpanjaka; ka nampanateriny ho an’i Hazaela izay nisinda tsy nanafika an’i Jerosalema.

²⁰Ny sisa amin’ny tantaran’i Jôasy ary koa ny zavatra hafa rehetra nataony dia voasoratra ao amin’ny boky milohateny hoe Asan’ireo mpanjakan’i Joda.

²¹Ary nioko hanohitra an’i Jôasy ny manamboninahiny; ka ny anankiroa taminy, dia i Jôzabada zanakalahin’i Simehata sy i Jehôzabada zanakalahin’i Sômera no namono azy ho faty tao Bety-Milao[64] iny Jôasy nidina hankany Silà iny. Dia nalevina tao amin’ny fasam-pianakaviany tao an-Tanànan’i Davida izy; ary i Amatsià zanany lahy no nanjaka nandimby azy.