Read DIEM PROTESTANTA 2 Mpanjaka 22 Bible Online

2 Mpanjaka 22 - DIEM PROTESTANTA bible

2 Mpanjaka 22

¹Feno valo taona i Jôsià fony tonga mpanjaka ary naharitra 31 taona no nanjakany tao Jerosalema[137]. Ny anaran-dreniny dia Jedidà zanakavavin’i Hadaià avy any Bôtsekàta.

²Nanao izay mahitsy eo imason’ny TOMPO i Jôsià; ka narahiny avokoa ny toetran’i Davida razambeny fa tsy mba nivily hiala tamin’izany izy.

³Tamin’ny taona faha-18 nanjakan’i Jôsià mpanjaka no nanirahany an’i Safàna mpitantsoratra zanakalahin’i Atsalià ary zafikelin’i Mesolama ho any an-tranon’ny TOMPO sady nilazany hoe:

⁴— Mankanesa any amin’i Hilkià mpisorombe, ka asaivo angoniny ny vola izay naterin’ny olona tao an-tranon’ny TOMPO na noraisin’ny mpiandry varavarana taminy[138].

⁵Aoka hatolotra ny mpandraharaha voatendry hanamboatra ny tranon’ny TOMPO izany vola izany mba hanomezany ny karaman’ny mpandrafitra sy ny mpandatsa-bato ary ireo mpiasa hafa, ary koa hividianany hazo sy vato voapaika ilaina amin’izany fanamboarana ny simba izany.

⁷Kanefa aza ampamoahina ny amin’ny vola natolotra azy izy, satria mahatoky amin’ny asany.

⁸Rehefa voarain’i Hilkià mpisorombe izany hafatra izany, dia nanambara tamin’i Safàna mpitantsoratra koa izy ny nahitany ny Bokin’ny Lalàna[139] tao an-tranon’ny TOMPO; ary natolony azy ny boky ka novakiny.

⁹Avy eo dia niverina nanao tatitra tamin’ny mpanjaka i Safàna nilaza hoe: — Efa nangonin’ireo mpisorona ny vola azo tao an-tempoly ary natolony ny mpandraharaha voatendry hanao ny fanamboarana.

¹⁰Dia nilazan’i Safàna koa ny mpanjaka hoe: — Misy boky nomen’i Hilkià mpisorombe ahy ity! Ary novakiny teo anatrehan’ny mpanjaka izany.

¹¹Nony ren’i Jôsià mpanjaka ny teny tao amin’ilay Bokin’ny Lalàna, dia nandriatra fitafiana izy.

¹²Ary nomeny baiko i Hilkià mpisorombe sy i Ahikama zanakalahin’i Safàna mbamin’i Hakbôra zanakalahin’i Mikaià mbamin’i Safàna mpitantsoratra sy i Hasaià mpandraharahany ka nilazany hoe:

¹³— Ndeha anontanio ny TOMPO ho ahy sy ho an’ny vahoaka manerana an’i Joda manontolo ny amin’ny teny raketin’ity boky vao hita ity. Ireo razantsika manko tsy nihaino ny tenin’ity boky ity sady tsy nanao araka izay rehetra voasoratra ao anatiny, hany ka hirehitra mafy amintsika ny fahatezeran’ny TOMPO.

¹⁴Dia lasa nankany amin’i Holdà mpaminanivavy i Hilkià mpisorona sy i Ahikama mbamin’i Hakbôra sy i Safàna ary i Hasaià. I Holdà, izay nonina tao Antanambaon’i Jerosalema, dia vadin’i Saloma zanakalahin’i Tikvà sy zafikelin’i Harahasa sady mpitahiry ny fanamiana masina[140] tao an-tempoly. Koa rehefa niresaka tamin-dravehivavy ry i Hilkià,

¹⁵dia nasainy miteny amin’ny mpaniraka hoe:

¹⁶«Izao no lazain’ny TOMPO Andriamanitr’i Israely: ‹Indro Aho hahatonga loza amin’ity tanàna ity sy ny mponiny, dia araka izay rehetra voalaza ao anatin’ilay boky novakin’ny mpanjakan’i Joda.

¹⁷Efa nandao Ahy manko ny mponin’i Jerosalema sady efa nampanetona srona ho an’ny andriamani-kafa, ary nampahatezitra Ahy tamin’ny sampy rehetra nataon’ny tanany. Izany no nirehetan’ny fahatezerako tamin’ity tanàna ity, ka tsy mbola itoniany.

¹⁸Fa ny mpanjakan’i Joda, izay naniraka anareo hanatona Ahy TOMPO, dia anambarao fa Izaho TOMPO Andriamanitr’i Israely dia milaza izao: Ny amin’ny teny izay efa renao,

¹⁹dia nino anatra ianao ka nanetry tena teo anatrehako, rehefa nihaino izay voalazako momba ny hanjo ity tanàna ity sy ny mponiny, dia ny hanaovana azy ho lao sy ho oha-panozonana; eny, nandriatra fitafiana ianao sady nitomany teo anatrehako, ka dia efa nihaino anao koa Aho; teny hentitra avy amiko TOMPO izany.

²⁰Indro hangoniko any amin’ny razanao ianao ary ho voapetraka am-pasanao hombàm-piadanana, ka tsy hahita maso ny loza rehetra hamelezako an’i Jerosalema.› » Dia nitondra izany valinteny izany ho an’ny mpanjaka i Hilkià sy ireo namany.