Read DIEM PROTESTANTA 2 Mpanjaka 23 Bible Online

2 Mpanjaka 23 - DIEM PROTESTANTA bible

2 Mpanjaka 23

¹Ary nandefa iraka ny mpanjaka hanainga tsy an-kanavaka ny loholon’i Joda sy i Jerosalema mba ho vory ao aminy.

²Dia niaraka nankao an-tranon’ny TOMPO ireo mbamin’ny mponina rehetra tao Jerosalema sy Joda, izany hoe ny mpisorona sy ny mpaminany ary ny sarambabem-bahoaka rehetra na kely na lehibe. Novakin’ny mpanjaka teo anatrehan’ny besinimaro ny teny rehetra tao anatin’ny bokin’ny fanekempihavanana, dia ilay boky izay hita tao an-tranon’ny TOMPO.

³Ary niakatra teo ambonin’ny lampihazo[141] voatokana ho azy ny mpanjaka, dia nanavao ny fanekempihavanana teo anatrehan’ny TOMPO mba hanarahan’ny tsirairay ny TOMPO sy hitandremany ny didiny sy ny fepetrany ary ny lalànany amin’ny fony manontolo sy ny fanahiny manontolo, ka hampiharany ny tenin’ny fanekempihavanana izay voasoratra ao amin’io boky io. Ary neken’ny vahoaka rehetra izany fanekempihavanana izany.

⁴Dia nomen’ny mpanjaka baiko i Hilkià mpisorombe sy ireo mpisorona lefiny ary ny mpiambina varavarana mba hamoaka any ivelan’ny tempoly ireo kojakoja rehetra natao hivavahana tamin’i Bahala sy tamin’i Aserà ary tamin’ireo planeta aman-kintana. Nodorany tany ivelan’i Jerosalema tao amin’ny sahan’i Kidrôna ireny; ka nentiny nankany Betela ny lavenony[142].

⁵Noroahin’i Jôsià ireo mpisorona sandoka izay notendren’ny mpanjakan’i Joda mba handoro sorona hanetona tamin’ireo toeram-panasinana tao an-tanànan’i Joda sy manodidina an’i Jerosalema; noroahiny ireo satria nanao sorona ho an’i Bahala sy ho an’ny masoandro ary ho an’ny volana sy ny planeta aman-kintana[143].

⁶Nalany tao an-tranon’ny TOMPO koa ny tsatokazo fanajana an’i Aserà ka navoakany any ivelan’i Jerosalema mba hodorana ao amin’ny lohasahan’i Kidrôna; ary ny lavenony dia nafafiny teny amin’ny fasam-bahoaka[144].

⁷Noravany ireo efitrano teo akaikin’ny tranon’ny TOMPO, efitrano izay nijangajangana ho fanompoan-tsampy sy nanenoman’ny vehivavy akanjo ho fanajana an’i Aserà.

⁸Nasainy tonga tany Jerosalema ny mpisorona rehetra avy amin’ny tanànan’i Joda; dia narodany ny toeram-panasinana izay fampiasan’ireo mpisorona sandoka ireo sy fandorany sorona hanetona, hatreo Geba ka hatrany Beera-Seba[145]; ary noravany tao Jerosalema ireo toeram-panasinana teo akaikim-bavahady, indrindra ilay teo anoloan’ny vavahadin’i Josoa governoran’ny tanàna ka teo ankavia raha miditra ny tanàna.

⁹Tsy navela hisorona teo amin’ny alitaran’ny TOMPO tao Jerosalema ireo mpisorona tamin’ny toeram-panasinana; fa ny mihinana ny mofo tsy misy leviora niaraka tamin’ny mpisorona hafa ihany no azony natao.

¹⁰Nozimbain’i Jôsià koa ny Tôfeta tao amin’ny lohasahan’i Bena-Hinôma mba tsy handoran’ny olona intsony ny zanany lahy na vavy ho sorona ho an’i Môlôka[146].

¹¹Nesoriny ireo sarivongan-tsoavaly izay natokan’ny mpanjakan’i Joda ho an’ny fivavahana amin’ny masoandro; ireo soavaly ireo dia teo akaikin’ny fidirana mankao an-tranon’ny TOMPO tao amin’ny trano fanampiny anilan’ny efitr’i Natàna-Melèka mpiandraikitra. Nodoran’i Jôsià ny kalesin’ny masoandro.

¹²Noravan’ny mpanjaka ireo alitara natsangan’ny mpanjakan’i Joda teo an-tampon-tranon’i Ahaza ary koa ireo alitara natsangan’i Manase tao amin’ny kianja roan’ny tranon’ny TOMPO, ka nampamotehiny[147] ary nasainy nafafy eran’ny lohasahan’i Kidrôna ny vovoka taminy.

¹³Nozimbain’ny mpanjaka ihany koa ireo toeram-panasinana tandrifin’i Jerosalema izay naorin’i Salômôna mpanjakan’i Israely teo amin’ny ilany atsimon’ny tendrombohitra Analanôliva[148] ho an’i Hastôreta sampin-dozan’ny Tsidônianina sy ho an’i Kemôsy sampin-dozan’ny Môabita ary ho an’i Milkôma sampin-dozan’ny Hamônita.

¹⁴Nomontsaniny ny tsangambaton-tsampy sady nokapainy ny tsatokazo fanajana an’i Aserà ka nofenoiny taolam-patin’olona ny toerany[149].

¹⁵Noravan’i Jôsià ihany koa ny alitara tao Betela[150], izay toeram-panasinana nataon’i Jerôbohama zanakalahin’i Nebata mba hitarihana an’i Israely hanota; eny, noravan’i Jôsià io alitara io sy ilay toeram-panasinana ka nodorany sy notorotoroiny ho vovoka; ary nodorany koa ny tsatokazo fanajana an’i Aserà.

¹⁶Dia niherika i Jôsià ka nahita ireo fasana terỳ an-tendrombohitra, ary naniraka olona izy haka ny taolana tao am-pasana hodorana eo amin’ny alitara mba hanazimbana azy araka ny tenin’ny TOMPO nambaran’ilay olon’Andriamanitra fony i Jerôbohama nitsangana teo anoloan’ny alitara nandritra ny fety. Niherika indray i Jôsià tamin’izay ka nahita ny fasan’io olon’Andriamanitra io

¹⁷ary nanontany hoe: — Inona irỳ tsangambato hitako irỳ? Dia novalian’ny mponina tao an-tanàna hoe: — Io no fasan’ilay olon’Andriamanitra avy any Joda, dia ilay nanambara izao nataonao tamin’ny alitaran’i Betela izao.

¹⁸Ka hoy i Jôsià hoe: — Avelao io fasana io! Ary aoka tsy hisy hanetsika ny taolambalony! Izany no tsy nikitihana ny taolambalony sy ny an’ilay mpaminany avy any Samaria[151].

¹⁹Nampahatezitra ny TOMPO ny nanaovan’ny mpanjakan’i Israely trano fivavahana teny amin’ny toeram-panasinan’ireo tanànan’i Samaria; ka dia noravan’i Jôsià koa ireny tahaka izay efa nataony tany Betela.

²⁰Ary novonoiny ho faty teo ambonin’ny alitara avokoa ny mpisorona izay teo amin’ireny toeram-panasinana ireny sady nandoroany taolam-patin’olona hanazimbana azy. Avy teo i Jôsià dia niverina tany Jerosalema.

²¹Nomen’ny mpanjaka baiko ny vahoaka rehetra mba hankalaza ny fetin’ny Paska ho voninahitry ny TOMPO Andriamaniny, araka ny voasoratra amin’ity bokin’ny fanekempihavanana ity[152].

²²Fa tsy nisy Paska nankalazaina toy izany hatramin’ny andro nanapahan’ny mpitsara an’i Israely na tamin’ny andro rehetra nitondran’ny mpanjakan’i Israely sy ny mpanjakan’i Joda.

²³Fa tamin’ny taona faha-18 nanjakan’i Jôsià no nankalazana izany Paska izany tany Jerosalema ho voninahitry ny TOMPO.

²⁴Ho fanatanterahana ny tenin’ny lalàna voasoratra ao amin’ilay boky hitan’i Hilkià mpisorona tao an-tranon’ny TOMPO, dia nofoanan’i Jôsià tamin’ny tanin’i Joda sy tao Jerosalema ireo olona mpanontany ny fanahin’ny maty sy mpamoha angatra, ary nopotehiny ny sarivongan-tsampy sy ny zava-maharikoriko rehetra momba azy.

²⁵Ho fehin’izany, talohan’i Jôsià dia tsy nisy mpanjaka tahaka azy izay ny TOMPO no nifikirany tamin’ny fony manontolo sy ny fanahiny manontolo ary ny heriny manontolo, araka ny Lalàn’i Mosesy manontolo. Ary tsy nisy tahaka azy intsony koa tatỳ aoriany.

²⁶Kanefa tsy nitony ny firehetam-pahaviniran’ny TOMPO tamin’ny fanjakan’i Joda satria zavatra isan-karazany no nampahatezeran’i Manase mpanjaka Azy.

²⁷Izany no nilazan’ny TOMPO hoe: — Hoesoriko tsy ho eo anatrehako tahaka ny nanesorako an’i Israely koa i Joda, ary hailiko ity tanànan’i Jerosalema nofidiko ity sy ny trano izay nolazaiko fa hipetrahan’ny voninahitro.

²⁸Ny sisa amin’ny tantaran’i Jôsià ary koa ny zavatra hafa rehetra nataony dia voasoratra ao amin’ny boky milohateny hoe Asan’ireo mpanjakan’i Joda.

²⁹Tamin’ny andro nanjakany no nitondran’ny Farao Nekao mpanjakan’i Ejipta ny tafiny ho any amoron’i Eofrata mba hanampy ny mpanjakan’i Asiria. Ary nandeha i Jôsià mba hifanehatra aminy; kanjo vantany vao hitan’ny Farao izy, dia novonoiny ho faty tao Megidao[153].

³⁰Dia napetraky ny manamboninahiny tao anaty kalesy ny fatin’i Jôsià ka nentina niala tao Megidao hankany Jerosalema ary nalevina tao amin’ny fasany. Nalain’ny mponin’i Joda kosa i Jôahaza zanakalahin’i Jôsià ka natokany ho mpanjaka handimby an-drainy.

³¹Feno 23 taona i Jôahaza fony tonga mpanjaka, ary telo volana ihany no nanjakany tao Jerosalema. Ny anaran-dreniny dia Hamotala zanakavavin’i Jeremià avy any Libnà[154].

³²Nanao izay ratsy eo imason’ny TOMPO tahaka izay rehetra nataon’ireo razany izy.

³³Nogadrain’ny Farao Nekao tany Riblà any amin’ny tanin’i Hamata[155] izy mba tsy ho afa-manjaka any Jerosalema intsony; ary nampandoavin’io Farao io sazy volafotsy telo taonina sy volamena telopolo kilao ny fanjakan’i Joda.

³⁴Dia i Eliakima zanakalahin’i Jôsià no voatendren’i Nekao ho mpanjaka handimby an-drainy, ary novany anarana hoe Jôiakima. Fa i Jôahaza kosa nentin’i Nekao ho any Ejipta ka maty tany[156].

³⁵Noteren’i Jôiakima handoa hetra volafotsy sy volamena araka ny ananany avy ny vahoaka mba hanomezana izay notakin’ny Farao Nekao.

³⁶Feno 25 taona i Jôiakima fony tonga mpanjaka, ary naharitra 11 taona no nanjakany tao Jerosalema. Ny anaran-dreniny dia i Zebodà zanakavavin’i Pedaià avy any Romà[157].

³⁷Ary nanao izay ratsy eo imason’ny TOMPO tahaka izay nataon’ireo razany izy.