Read DIEM PROTESTANTA 2 Mpanjaka 24 Bible Online

2 Mpanjaka 24 - DIEM PROTESTANTA bible

2 Mpanjaka 24

¹Tamin’ny andro nanjakan’i Jôiakima no nidiran’i Nebôkadnetsara mpanjakan’i Babilôna ny tanin’i Joda[158], ka dia voatery nanoa azy telo taona i Jôiakima. Taorian’izany kosa izy dia nikomy taminy.

²Tamin’izay i Jôiakima dia nandefasan’ny TOMPO andian-dahalo babilônianina sy andian-dahalo sirianina ary andian-dahalo môabita sy hamônita hamely ny tanin’i Joda ka nandrava azy araka izay nolazain’ny TOMPO tamin’ny alalan’ireo mpaminany.

³Baikon’ny TOMPO mihitsy no nahatonga ireny loza ireny tamin’ny fanjakan’i Joda mba hanesorany azy tsy ho hitan’ny masony noho ny fahotana rehetra nataon’i Manase mpanjaka,

⁴ary koa noho ireo olona maro tsy manan-tsiny izay novonoiny ho faty; nanenika faty an’i Jerosalema izy ka izany no tsy netezan’ny TOMPO hamela heloka[159].

⁵Ny sisa amin’ny tantaran’i Jôiakima ary koa ny zavatra hafa rehetra nataony dia voasoratra ao amin’ny boky milohateny hoe Asan’ireo mpanjakan’i Joda.

⁶Ary rehefa lasa nodimandry any amin’ny razany i Jôiakima, dia i Jôiakina zanany lahy no nanjaka nandimby azy.

⁷Tsy sahy nivoaka ny taniny intsony ny mpanjakan’i Ejipta, satria lasan’ny mpanjakan’i Babilôna ny tany rehetra teo ambany fahefàn’i Ejipta hatreo amin’ny lohasahan-driakan’i Ejipta ka hatrany amin’ny ony Eofrata.

⁸Feno 18 taona i Jôiakina fony tonga mpanjaka; ary telo volana ihany no nanjakany tao Jerosalema. Ny anaran-dreniny dia Nehostà zanakavavin’i Elnatàna avy ao Jerosalema.

⁹Ary nanao izay ratsy eo imason’ny TOMPO tahaka izay rehetra nataon’ireo razany izy.

¹⁰Tamin’izany fotoana izany dia tonga nanao fahirano an’i Jerosalema ny tafika babilônianina izay notarihin’ireo manamboninahitr’i Nebokadnetsara mpanjakan’i Babilôna.

¹¹Raha mbola natao fahirano ny tanàna, dia mba tonga teo koa i Nebokadnetsara;

¹²ary nitolo-batana tamin’ny mpanjakan’i Babilôna i Jôiakina mpanjakan’i Joda sy ny reniny mbamin’ny manamboninahiny sy ny filohan-bahoakany ary ny tandapany. Dia nogadrain’ny mpanjakan’i Babilôna[160] ireo tamin’ny taona fahavalo nanjakany.

¹³Fa araka ny efa nambaran’ny TOMPO dia nentin’i Nebokadnetsara ny zava-tsarobidy rehetra tao an-tranon’ny TOMPO sy tao an-dapan’ny mpanjaka, ary novakiny avokoa ny fanaka rehetra volamena izay nataon’i Salômôna mpanjaka ho an’ny tempolin’ny TOMPO[161].

¹⁴Nataony sesitany i Jerosalema iray manontolo, dia ny filoham-bahoaka rehetra sy ny mpanankarena rehetra, izany hoe voasesitany miisa 10 000 ankoatra ny mpahay taozavatra sy ny mpanefy; ireo vahoaka madinika sy mahantra no sisa navelany.

¹⁵Nataony sesitany avy ao Jerosalema ho any Babilôna koa i Jôiakina mpanjaka mbamin’ny reniny sy ireo vadiny ary ny tandapa mbamin’ireo filohan’i Joda[162].

¹⁶Nentiny nankany Babilôna avokoa ny mpanankarena rehetra miisa fito arivo lahy, mbamin’ny mpahay taozavatra sy ny mpanefy miisa arivo lahy, ary ny miaramila rehetra afaka miantafika.

¹⁷Ary notendren’ny mpanjakan’i Babilôna ho mpanjaka handimby an’i Jôiakina i Matanià rahalahin-drainy, ka novany ho Tsedekià ny anarany[163].

¹⁸Feno 21 taona i Tsedekià fony tonga mpanjaka; ary naharitra 11 taona no nanjakany tao Jerosalema. Ny anaran-dreniny dia Hamotala zanakavavin’i Jeremià avy any Libnà[164].

¹⁹Ary nanao izay ratsy eo imason’ny TOMPO izy tahaka izay rehetra nataon’i Jôiakima.

²⁰Fa ny fahatezeran’ny TOMPO no nahatonga izany loza izany tamin’i Jerosalema sy tamin’i Joda, ka niafara tamin’ny fandroahany an’ireo Jodeanina hiala teo anatrehany[165].