Read DIEM PROTESTANTA 2 Mpanjaka 9 Bible Online

2 Mpanjaka 9 - DIEM PROTESTANTA bible

2 Mpanjaka 9

¹Indray andro i Elisà mpaminany dia niantso tovolahy iray anisan’ny andia-mpaminany ka nanao taminy hoe: — Mivonòna ianao handeha, ka ento ity tavoara feno menaka ity, ary mankanesa any Ramôta-Gilehada.

²Rehefa mby any ianao, dia ataovy izay hahitana an’i Jehò zanakalahin’i Jôsafata sady zafikelin’i Nimsỳ. Antsoy hiala amin’ny namany izy, dia ento any amin’ny efitrano anatiny indrindra.

³Ary horaisinao ny tavoara ka hararakao eo ambony lohany ny menaka sady hombanao teny hoe: «Izao no lazain’ny TOMPO: Manosotra anao ho mpanjakan’i Israely aho!» Dia hovohanao avy eo ny varavarana mba handosiranao avy hatrany.

⁴Koa dia nankany Ramôta-Gilehada ilay tovolahy mpaminany.

⁵Nony tonga tany izy, dia ireo filohan-tafik’i Israely niara-nivory no hitany ary nitenenany hoe: — Manan-javatra hambara aminao aho, ry filoha! Ka hoy i Jehò: — Iza aminay ireto moa izany? Dia hoy ny navalin’ilay tovolahy: — Aminao ihany, ry filoha ô!

⁶Dia nitsangana i Jehò ka niditra tao amin’ny efitrano; ary nandraraka ny menaka teo an-dohany ny mpaminany sady nanao hoe: — Izao no lazain’ny TOMPO Andriamanitr’i Israely: «Manosotra anao ho mpanjakan’i Israely vahoakako Aho[37].

⁷Ianao no handringana ny taranak’i Ahaba tomponao fahiny, mba hamaliako ny ran’ireo mpanompoko rehetra izay nalatsak’i Jezebela, na mpaminany izy na olon-kafa.

⁸Eny, ho fongotra avokoa ny fianakavian’i Ahaba; ary haringako ny lehilahy rehetra eo aminy na kely na lehibe,

⁹ka ny taranany hataoko tahaka ny nanaovako ny taranak’i Jerôbohama zanakalahin’i Nebata sy ny taranak’i Bahasà zanakalahin’i Ahià[38].

¹⁰Fa i Jezebela kosa tsy hisy handevina, satria hohanin’ny alika ao amin’ny sahan’i Jizrehela ny fatiny[39].» Rehefa avy nilaza izany ilay tovolahy mpaminany, dia namoha ny varavarana ka lasa nandositra.

¹¹Ary nivoaka ny efitrano i Jehò, dia niverina nankeo amin’ny manamboninahitra hafa ka nanontanian’ireo hoe: — Tsara ihany ve ianao? Fa inona no notadiavin’ilay adala iny taminao? Hoy kosa ny navalin’i Jehò azy: — Fantatrareo ihany iny lehilahy iny sy ny redirediny.

¹²Fa hoy indray ireo: — Mandainga ianao. Ambarao aminay izay tena marina. Dia novaliany hoe: — Ireto avy no teny nataony tamiko: «Izao no lazain’ny TOMPO: Manosotra anao ho mpanjakan’i Israely Aho!»

¹³Dia samy nanala faingana ny akanjobeny avy ny manamboninahitra rehetra ka namelatra azy[40] teo amin’ny faratampon’ny tohatra anankiray mba hipetrahan’i Jehò. Ary notsofin’ny mpiangaly azy ny anjomara fa ny besinimaro teo kosa niantsoantso hoe: «I Jehò no mpanjaka.»

¹⁴Tamin’izany fotoana izany, ny tafik’i Israely manontolo dia niaro ny tanànan’i Ramôta-Gilehada tamin’ny fanafihan’i Hazaela mpanjakan’i Siria. Kanjo raha niady tamin’i Hazaela i Jôrama mpanjaka, dia naratran’ny Sirianina. Koa dia nankao Jizrehela izy hotsaboina tamin’ny ratra nahavoa azy. Ary nioko tamin’i Jôrama i Jehò zanakalahin’i Jôsafata sady zafikelin’i Nimsỳ ka niteny tamin’ireo manamboninahitra hafa hoe: — Raha vonona hanohana ahy ianareo, dia aza avela hisy olona hiala ny tanàna ka handeha hilaza izao zava-nitranga teto izao any Jizrehela.

¹⁵

¹⁶Dia nitaingina ny kalesiny i Jehò ka nankany Jizrehela izay nisy an’i Jôrama notsaboina sy i Ahazià mpanjakan’i Joda tonga namangy azy.

¹⁷Nahatazana olona betsaka tamy niaraka tamin’i Jehò ilay mpitily izay teo an-tampon’ny tilikambon’i Jizrehela, ka nilaza tamin’ny mpanjaka hoe: — Mahatazana olona betsaka aho. Dia hoy i Jôrama: — Mandefasa mpitaingin-tsoavaly hitsena azy ireo ka hanontany azy hoe: «Fihavanana ve no ahatongavanareo?»

¹⁸Dia lasa ny mpitaingin-tsoavaly iray nitsena ireo olona ireo ka niteny hoe: — Izao no lazain’ny mpanjaka: «Fihavanana ve no ahatongavanareo?» Ary hoy ny navalin’i Jehò: — Ahoanao inona izay fihavanana? Fa mankanesa ato aoriako ianao. Tamin’izay kosa ilay mpitily no nilaza hoe: — Tonga teo amin-dry zareo ny iraka, nefa tsy niverina.

¹⁹Nandefa mpitaingin-tsoavaly faharoa indray i Jôrama, ka nony tonga teny amin-dry zareo io, dia nanao hoe: — Izao no tenin’ny mpanjaka: «Fihavanana ve no ahatongavanareo?» Ary hoy ny navalin’i Jehò: — Ahoanao inona izay fihavanana? Fa mankanesa ato aoriako ianao!

²⁰Tamin’izay kosa ilay mpitily no nilaza indray hoe: — Tonga teo amin-dry zareo koa ny iraka faharoa, nefa tsy niverina. Saingy fantatro izao i Jehò zafikelin’i Nimsỳ, araka ny fampiriotran-kalesiny: mampiriotra kalesy hoatra ny olona adala manko izy.

²¹Nasain’i Jôrama novononina ny kalesin-tsoavaliny; dia natao izany. Dia samy niainga nitaingina ny kalesiny avy i Jôrama mpanjakan’i Israely sy i Ahazià mpanjakan’i Joda, ka lasa nitsena an’i Jehò, ary tojo azy teo amin’ny sahan’i Nabôta avy any Jizrehela[41].

²²Raha vao nahita an’i Jehò i Jôrama, dia nanontany azy hoe: — Fihavanana ve no ahatongavanao, ry Jehò? Fa hoy ny navaliny: — Tsy hisy fihavanana, raha mbola manompo ireo andriamani-tsiizy sy manao majika i Jezebela reninao.

²³Dia nihodina i Jôrama ka nandositra sady niteny tamin’i Ahazià hoe: — Famadihana io, ry Ahazià!

²⁴Noraisin’i Jehò ny tsipîkany, dia nitifitra izy ka nahavoa an’i Jôrama teo anelanelan’ny sorony; ary tafavoaka ny zana-tsipîka rehefa niboroaka tamin’ny fony. Dia maty nikorosy tao anaty kalesiny i Jôrama.

²⁵Ary hoy i Jehò tamin’i Bidkara dekàny: — Raiso ny fatiny ka atsipazo ao amin’ny sahan’i Nabôta avy any Jizrehela. Tsarovy fa, fony isika roa lahy niara-nitondra kalesy nanaraka an’i Ahaba rain’i Jôrama[42], dia izao no nambaran’ny TOMPO tamin’i Ahaba:

²⁶«Hitako tokoa ny namonoanao ho faty an’i Nabôta sy ireo zanany omaly; koa Izaho TOMPO no manao teny hentitra fa hamaly anao eto amin’ity saha ity[43].» Noho izany, ry Bidkara, dia raiso ny fatiny ka atsipazo ao amin’io saha io araka ny tenin’ny TOMPO.

²⁷Raha nahita izany i Ahazià mpanjakan’i Joda, dia nandositra tamin’ny lalan’i Bety-Gany; kanefa nanenjika azy i Jehò sady nibaiko namana hoe: «Asio ihany koa iny». Dia nasian’ireo izy iny nitondra ny kalesiny teo am-piakaran’i Gora akaikin’i Jiblehama iny. Ary afa-nandositra nankany Megidao[44] i Ahazià ka maty tao.

²⁸Dia nentin’ny mpanompony tamin’ny kalesiny ho any Jerosalema izy ka nalevina tao amin’ny fasam-pianakaviany tao an-Tanànan’i Davida.

²⁹Tamin’ny faha-11 taona nanjakan’i Jôrama zanakalahin’i Ahaba no tonga mpanjakan’i Joda i Ahazià[45].

³⁰Dia tonga tany Jizrehela i Jehò. Ary raha nandre izany i Jezebela dia nanao manjamaso sady nandravaka ny lohany ka nankeo am-baravarankely.

³¹Koa raha niditra ny vavahady i Jehò, dia hoy i Jezebela: — Fihavanana ve no ahatongavanao, ry karazan’i Zimrỳ mpamono ny tompony[46]?

³²Ary niandrandra ny varavarankely i Jehò sady nanontany hoe: — Iza no momba ahy? Iza? Ary nisy tandapa roa na telo nitsirika azy.

³³Ka hoy izy taminy: — Azerao avy eny io vehivavy io! Dia natosiny avy eny am-baravarankely i Jezebela ka nianjera, ary nifantsitsitra tamin’ny rindrina sy ny soavaly ny rany; ka dia nohitsahin’i Jehò tamin’ny kalesiny izy.

³⁴Ary niditra tao an-dapa i Jehò ka nihinana sy nisotro; avy eo izy nilaza tamin’ny namany hoe: — Ndeha karakarao ny fandevenana an’io vehivavy voaozona io, fa mba zanaka mpanjaka ihany izy.

³⁵Dia lasa ireo mba handevina azy; kanjo tsy nisy afa-tsy ny karandohany sy ny tongotra aman-tanany sisa no hitany teo.

³⁶Ary niverina ireo ka nanambara izany tamin’i Jehò, izay loa-bolana hoe: — Izao mihitsy no nampilazain’ny TOMPO an’i Elià avy any Tisbe sady mpanompony hoe: «Ao amin’ny sahan’i Jizrehela no hihinanan’ny alika ny nofon’i Jezebela[47].

³⁷Ary ny fatiny kosa haely amin’ity saha ity toy ny zezika aparitaka amin’ny tany, ka tsy hisy afaka hilaza hoe i Jezebela iny.»