Read DIEM PROTESTANTA 1 Tantara 10 Bible Online

1 Tantara 10 - DIEM PROTESTANTA bible

1 Tantara 10

¹Ary niady tamin’i Israely ny Filistinina; dia nandositra azy ny Israelita ka faty maro no nitsitsitra teny an-tendrombohitra Gilbôa[84].

²Nilofo nanenjika an’i Saoly sy ireo zanany lahy ny Filistinina, ka nahafaty an’i Jônatàna sy i Abinadaba ary i Melkisa izay samy zanakalahin’i Saoly.

³Nanindry an’i Saoly ny fanafihana, ka sendra ny mpandefa tsipîka izy ary dia natahotra azy.

⁴Dia hoy i Saoly tamin’ilay mpitondra ny fitaovam-piadiany: — Raiso ny sabatrao, ka trobaro aho, fandrao ho avy ireo mpanompo sampy ireo ka hanao ahy ho fihomehezana. Fa tsy nanaiky ilay mpitondra ny fitaovam-piadiany satria natahotra mafy. Koa nalain’i Saoly ny sabatra, dia nianjerany.

⁵Ary rehefa hitan’ilay mpitondra ny fitaovam-piadiany fa maty i Saoly, dia mba nianjerany koa ny sabany ka maty[85] izy.

⁶Dia maty i Saoly ary niara-maty taminy koa ny zanany telo lahy sy ny ankohonany manontolo.

⁷Rehefa hitan’ny Israelita rehetra izay nonina tao an-dohasaha[86] fa nandositra ny tafik’i Israely sady maty i Saoly sy ny zanany, dia nandao tanàna izy ka nandositra. Tonga kosa ny Filistinina ka nipetraka tao.

⁸Ny ampitso, nony tonga ny Filistinina haka ny zavatra teo amin’ny faty, dia nahita an’i Saoly sy ny zanany nitsitra teo an-tendrombohitra Gilbôa.

⁹Dia nendahany i Saoly ary nentiny ny lohany sy ny fiadiany, ka nalefany hitety ny tanin’ny Filistinina hanambaràna izany vaovao izany amin’ny sampiny sy amin’ny vahoaka.

¹⁰Avy eo dia napetrany tao an-tempolin’ilay andriamaniny anankiray ny fitaovam-piadian’i Saoly; ary ny karandohany nohomboany tao amin’ny tempolin’i Dagôna.

¹¹Rehefa ren’ny mponina rehetra tao Jabesy-Gilehada[87] avokoa ny nataon’ny Filistinina tamin’i Saoly,

¹²dia niainga ny lehilahy maherifo rehetra naka ny fatin’i Saoly sy ny fatin-janany, ka nitondra azy ho any Jabesy. Ny taolambalony dia naleviny teo am-pototr’ilay hazo terebinta tao Jabesy; ary nifady hanina nandritra ny fito andro ny olona mba ho fisaonana.

¹³Eny, maty i Saoly noho ny fivadihany tamin’ny TOMPO: tsy nitandrina ny tenin’ny TOMPO manko izy, ary koa nanontany ny fanahin’ny maty tamin’ny mpamoha angatra[88]

¹⁴fa tsy nanontany ny TOMPO; ka dia nampamonoiny ho faty izy ary nafindrany tamin’i Davida, zanakalahin’i Jisay, ny fanjakana.