Read DIEM PROTESTANTA 1 Tantara 12 Bible Online

1 Tantara 12 - DIEM PROTESTANTA bible

1 Tantara 12

¹Ireto kosa ny olona tonga tany amin’i Davida tao Tsiklaga[98] fony izy mbola niery an’i Saoly, zanakalahin’i Kisy; izy ireo dia lehilahy mahery mpanampy an’i Davida amin’ny ady,

²sady mpitondra tsipìka sy antsamotady ka mahay manavia sy manavanana raha mandefa vato sy zana-tsipîka. Ireto ny avy amin’ny tarik’i Saoly, anisan’ny fokon’i Benjamîna:

³i Ahihezera, filohany, sy i Joasy rahalahiny, zanakalahin’i Semahà avy any Gibehà; i Jeziela sy i Peleta, zanakalahin’i Hazmavety; i Berekià sy i Jehò, avy any Hanatôta;

⁴i Jismahià, avy any Gibehôna, lehilahy mahery tao amin’ny «andian’ny telopolo lahy[99]», sady anankiray amin’ny lehibeny;

⁵i Jeremià sy i Jahaziela ary i Jôhanàna; i Jôzabada, avy any Gederà;

⁶i Elehozay sy i Jerimôta mbamin’i Behalià sy i Semarià ary i Sefatià, samy avy any Harofa;

⁷i Elkanà sy i Jisià mbamin’i Hazarela sy i Jôhezera ary i Jasôbehama, samy taranak’i Kôra;

⁸ary i Jôhelà sy i Zebadià, samy zanakalahin’i Jerôhama, avy any Gedôra.

⁹Nisy koa olona avy amin’ny fokon’i Gada, niendaka hanatona an’i Davida tao amin’ny toby fiarovana tany an-taniefitra. Izy ireo dia lehilahy maherifo, miaramila mahay miady sady zatra mampiasa ampinga sy lefona: masiaka toy ny liona no fahitana azy, ary faingam-pandeha toy ny gazela eny an-tendrombohitra.

¹⁰Miisa 11 ry zareo: dia i Hezera sy i Hôbadià, i Eliaba sy i Mismanà, i Jeremià sy i Hatahy, i Eliela sy i Jôhanàna mbamin’i Elzabada sy i Jeremià ary i Makbanay.

¹⁵Mpitari-tafika ireo avy amin’ny taranak’i Gada ireo ka ny kely indrindra aminy dia mahatoraka[100] ny zato lahy, ary ny lehibe aminy mahatoraka ny arivo.

¹⁶Izy ireo no niampita an’i Jôrdàna tamin’ny volana voalohany amin’ny taona, raha iny mbola nihoatra iny avokoa ny morony, ka nampandositra ny mponina rehetra teny amin’ny lohasaha atsinanana sy andrefana.

¹⁷Nisy koa avy amin’ny fokon’i Benjamîna sy i Joda tonga hitady an’i Davida tao amin’ny toby fiarovana.

¹⁸Dia nivoaka hitsena azy i Davida ka nanao taminy hoe: — Raha fihavanana no ahatongavanareo atỳ amiko mba hanampy ahy, dia amin’ny foko tokoa no hikambanako aminareo; fa raha hamadika ahy kosa mba hanolotra ahy amin’ny fahavaloko, na tsy nanao an-keriny aza ny tanako, dia aoka ilay Andriamanitry ny razantsika no hijery sy hamaly anareo!

¹⁹Tamin’izay, dia nentanin’ny Fanahin’Andriamanitra i Hamasay, filohan’ny «andian’ny telopolo lahy», ka niantso hoe: — Anao izahay, ry Davida ô! Miandany aminao izahay, ry zanakalahin’i Jisay! Fiadanana, fiadanana anie ho anao ary fiadanana anie ho an’ireo mpanampy anao, satria ilay Andriamanitrao no efa manampy anao! Dia noraisin’i Davida ireo ka notendreny ho isan’ny filohan’ny andian-tafika.

²⁰Ary nisy avy amin’ny fokon’i Manase lasa nikambana tamin’i Davida fony izy nomba ny Filistinina mba hiady amin’i Saoly; saingy tsy nanampy ny Filistinina ry i Davida, satria rehefa nifampidinika ny andrianan’ny Filistinina dia nampiverina azy, fa hoy ireo hoe: «Hikambana amin’i Saoly tompony i Davida, ka hanolotra antsika aminy[101]».

²¹Koa raha niverina ho any Tsiklaga iny i Davida no tonga nikambana taminy kosa ireo olona anisan’ny fokon’i Manase, dia i Hadnà sy i Jôzabada, i Jedihaela sy i Mikaela mbamin’i Jôzakara sy i Elihò ary i Tsiletahy izay samy mpifehy arivo tao amin’i Manase.

²²Nanampy ny andian-tafik’i Davida ireo satria lehilahy mahery avokoa, ary nanjary komandy tao amin’ny tafiny.

²³Isan’andro isan’andro dia nisy olona tonga tany amin’i Davida hanampy azy hany ka nanjary lehibe dia lehibe tokoa ny tafik’i Davida[102].

²⁴Izao no isan’ny vatan-dehilahy vonona hiady izay tonga tany amin’i Davida tao Hebrôna mba hamindra aminy ny fanjakàn’i Saoly araka ny baikon’ny TOMPO:

²⁵Tamin’ny taranak’i Joda, dia nisy 6 800 lahy mpitondra ampinga sy lefona sady vonona hiady.

²⁶Tamin’ny i Simehôna, dia nisy 7 100 lahy maherifo an’ady.

²⁷Tamin’ny taranak’i Levỳ, dia nisy 4 600 lahy,

²⁸niampy an’i Jôiadà, filohan’ny taranak’i Aharôna, niaraka tamin’ny 3 700 lahy,

²⁹sy niampy an’i Tsadôka, tovolahy maherifo, niaraka tamin’ny 22 lahy samy filoha teo amin’ny fianakavian-drainy.

³⁰Tamin’ny taranak’i Benjamîna, mpiray foko amin’i Saoly, dia nisy telo arivo lahy; ka ny ankamaroan’ireo, talohan’izao, dia mpikarakara ny ankohonan’i Saoly.

³¹Tamin’ny taranak’i Efraîma, dia nisy 20 800 lahy, samy maherifo sady nalaza teo amin’ny fianakaviany avy.

³²Tamin’ny antsasa-pokon’i Manase, dia nisy 18 000 lahy izay notsongaina anarana mba handeha hampanjaka an’i Davida.

³³Tamin’ny taranak’i Jisakara, dia nisy manamboninahitra roanjato lahy sy ireo mpiray foko rehetra teo ambany fifehezany; ireo manamboninahitra ireo dia samy nahay mamantatra tsara ny fotoana mety sy ny fomba tokony hikatrohan’ny Israelita.

³⁴Tamin’i Zebolòna, dia nisy miaramila 50 000, zatra ady sy vonon-kiantafika, nirongo fiadiana isan-karazany sady afaka miara-mientana tsara[103].

³⁵Tamin’i Naftalỳ, dia nisy manamboninahitra arivo lahy arahin’ny miaramilany 37 000 nirongo ampinga sy lefona.

³⁶Tamin’i Dana, dia nisy 28 600 lahy, vonon-kiantafika.

³⁷Tamin’i Asera, dia nisy miaramila 40 000, zatra ady sy vonon-kiantafika.

³⁸Tamin’ireo teny ampita atsinanan’i Jôrdàna, izany hoe tamin’ny Reobenita sy ny Gadita ary ny antsasa-pokon’i Manase, dia nisy 120 000 ny lehilahy mirongo fiadiana isan-karazany.

³⁹Ireo miaramila rehetra vonon-kilahatra hiady ireo no tonga tao Hebrôna tamin’ny fony manontolo mba hampanjaka an’i Davida amin’i Israely lafy valo; ary ny Israelita sisa rehetra koa niray fo mba hampanjaka an’i Davida.

⁴⁰Dia nijanona telo andro tao Hebrôna niaraka tamin’i Davida ireo miaramila ka nihinana sy nisotro izay efa nomanin’ireo havany ho azy.

⁴¹Ankoatra izany koa, ny olona avy amin’ny faritany akaiky, ary hatrany amin’i Jisakara sy Zebolòna ary i Naftalỳ aza, dia nitondra sakafo ho azy ireo tamin’ny boriky sy rameva ary molè sy omby; dia koba lafarinina, mofo aviavy, voaloboka maina, divay, menaka, ary omby sy ondry aman’osy betsaka koa; satria nisy firavoravoana tao Israely.