Read DIEM PROTESTANTA 2 Tantara 21 Bible Online

2 Tantara 21 - DIEM PROTESTANTA bible

2 Tantara 21

¹Rehefa lasa nodimandry any amin’ny razany i Jôsafata, dia nalevina tao amin’ny fasam-pianakaviany tao an-Tanànan’i Davida; ary i Jôrama zanany lahy no nanjaka nandimby azy.

²Nanan-drahalahy zanak’i Jôsafata koa i Jôrama, dia i Hazarià sy i Jehiela, i Zakarià sy i Hazarià ary i Mikaela sy i Sefatià; izy rehetra ireo no zanakalahin’i Jôsafata, mpanjakan’i Joda.

³Samy notoloran-drainy fanomezana betsaka izy ireo, dia volafotsy sy volamena ary fanaka sarobidy mbamin’ny fifehezana tanànamimanda sasany tao Joda; fa ny maha-andriamanjaka kosa dia natolony an’i Jôrama, satria izy no lahimatoa.

⁴Raha vao nandray an-tanana ny fanjakàn-drainy i Jôrama, dia nanamafy ny fahefàny ka namono nahafaty tamin’ny sabatra ny rahalahiny rehetra sy ny mpitondra sasany teo amin’i Israely.

⁵Feno 32 taona i Jôrama fony tonga mpanjaka; ary naharitra valo taona no nanjakany tao Jerosalema.

⁶Nanaraka ny toetran’ireo mpanjakan’i Israely avaratra izy, dia tahaka ny nataon’ireo taranak’i Ahaba, fa zanakavavin’i Ahaba[123] no vadiny; eny, nanao izay ratsy eo imason’ny TOMPO i Jôrama.

⁷Kanefa ny TOMPO tsy te handringana ny taranak’i Davida noho ny fanekempihavanana nataony tamin’i Davida sy ny nilazany fa homeny jiro mandrakizay[124] izy sy ny taranany.

⁸Tamin’ny andron’i Jôrama no nikomian’ny Edômita tamin’ny fahefana jodeanina[125] ka nananganany mpanjaka ho azy.

⁹Niainga manko i Jôrama sy ireo manamboninahiny ary ny kalesiny rehetra; nony voahodidin’ny Edômita ny tenany mbamin’ireo komandin-kalesiny, dia voatery nitsoaka nanao latsaka alina tamin’ny Edômita.

¹⁰Hatreo dia nizaka tena sady nanohitra ny fahefana jodeanina ny Edômita mandraka androany. Tamin’izay fotoana izay koa ny tanànan’i Libnà[126] no nikomy nanohitra ny fahefàn’i Jôrama, satria efa nandao ny TOMPO Andriamanitry ny razany izy.

¹¹I Jôrama mihitsy no nanao toeram-panasinana teny an-tendrombohitr’i Joda ka nitaona ny mponin’i Jerosalema sy ny Jodeanina hanompo sampy sady hivadika amin’Andriamanitra.

¹²Ary nisy taratasy avy tamin’i Elià mpaminany tonga tao amin’i Jôrama nanambara hoe: «Izao no lazain’ny TOMPO Andriamanitr’i Davida razanao: Tsy nanaraka ny toetran’i Jôsafata rainao na ny an’i Asà mpanjakan’i Joda ianao,

¹³fa nanaraka ny toetran’ireo mpanjakan’i Israely avaratra ka nampanompo sampy ny Jodeanina sy ny mponin’i Jerosalema tahaka ny fanaon’ny taranak’i Ahaba; novoinao ho faty aza ny rahalahinao tera-drainao, izay tsara noho ianao;

¹⁴koa dia hataon’ny TOMPO hiharan-doza goavana ny vahoakanao sy ny zanakao ary ny vadinao sy ny fanananao rehetra.

¹⁵Ny tenanao ho azon’aretina mafy isan-karazany, indrindra fa aretina amin’ny tsinainao izay hiharatsy miandalana isan’andro isan’andro mandra-piloatra ny tsinainao.»

¹⁶Dia notaomin’ny TOMPO hamely an’i Jôrama ny Filistinina ary koa ny Arabo izay mifanila amin’ny Kosîta[127];

¹⁷niakatra tany Joda ireo ka nisesika tao, ary namabo ny fananana rehetra izay tao an-dapan’ny mpanjaka mbamin’ny zanany sy ny vadiny koa aza. Tsy nisy zanany tavela intsony teo aminy, afa-tsy i Jôahaza faralahiny ihany.

¹⁸Taorian’izany rehetra izany, ny namelezan’ny TOMPO an’i Jôrama dia aretina tsy azo sitranina teo amin’ny tsinainy.

¹⁹Rehefa ela ny ela, nony afaka roa taona, dia niloatra nihahaka ny tsinainy noho ny fiantraikan’ilay aretina; ka maty tamin’ny fangirifiriana mafy i Jôrama. Ary ny vahoakany tsy mba nandoro vovo-javamanitra ho fisaonana azy toy ny natao tamin’ireo razany[128].

²⁰Feno 32 taona i Jôrama fony tonga mpanjaka; ary naharitra valo taona no nanjakany tao Jerosalema. Koa lasa nodimandry tsy nisy nalahelo azy izy. Nalevina tao an-Tanànan’i Davida ihany i Jôrama, nefa tsy mba tao amin’ny fasan’ireo mpanjaka.