Read DIEM PROTESTANTA 2 Tantara 33 Bible Online

2 Tantara 33 - DIEM PROTESTANTA bible

2 Tantara 33

¹Feno 12 taona i Manase fony tonga mpanjaka; ary naharitra 55 taona no nanjakany tao Jerosalema.

²Nanao izay ratsy eo imason’ny TOMPO izy[187] ka naka tahaka ny fanompoan-tsampy maharikoriko fanaon’ireo firenena izay noroahin’ny TOMPO teo anoloan’ny Israelita.

³Naorin’i Manase indray manko ny toeram-panasinana izay efa noravan’i Hezekià rainy ka nananganany alitara ho an’ireo Bahala sady nanaovany tsatokazo fanajana an’ireo Aserà; dia niankohofany sy nanaovany fanompoam-pivavahana koa ireo planeta aman-kintana eny ana habakabaka.

⁴Ary nanorenany alitara hafa aza tao an-tranon’ny TOMPO, dia tao amin’ilay nolazain’ny TOMPO hoe: «Ao Jerosalema no hitoetra mandrakizay ny voninahitro[188].»

⁵Tao anatin’ny kianja roa amin’ny tranon’ny TOMPO tokoa no nanorenany alitara hafa ho fanajana ireo planeta aman-kintana eny ana habakabaka;

⁶ary na ireo zanany lahy aza dia natolony ho sorona dorana[189] teo an-dohasahan’i Bena-Hinôma[190]. Ankoatra izany dia mbola nanandro sady nisikidy sy nanao ody mahery izy, ary naka hevitra tamin’ny olona tsindrian-javatra sy mpanao fitokavana. Dia nahery nanao izay ratsy eo imason’ny TOMPO izy, ka nampahatezitra Azy.

⁷Izay sarin-tsampy voasokitra nampanamboarin’i Manase dia napetrany tao an-tranon’Andriamanitra, izay efa nolazain’Andriamanitra tamin’i Davida sy i Salômôna zanany hoe: «Ato amin’ity trano ity sy eto Jerosalema izay nofidiko tamin’ny foko israelita rehetra no hampitoerako mandrakizay ny voninahitro.

⁸Koa tsy hampirenireny ny Israelita hiala amin’ny tany izay efa notendreko ho an’ny razany Aho, raha imasoany hotandremana izay rehetra nandidiako azy, izany hoe ny lalàna manontolo sy ny baiko ary ny fitsipika nampitaiko tamin’ny alalan’i Mosesy[191].»

⁹Kanjo nampivaona ny mponin’i Jerosalema sy ny Jodeanina i Manase mba hanao ratsy mihoatra noho ny firenena izay naringan’ny TOMPO teo anoloan’ny Israelita.

¹⁰Niteny tamin’i Manase sy ny vahoakany ny TOMPO, nefa tsy noraharahainy akory.

¹¹Dia nasain’ny TOMPO ho tonga hamely azy ny mpitari-tafiky ny mpanjakan’i Asiria; ary nosamborin’ireo i Manase ka nasiany masombỳ sady nogadrany rojo halimo ary nentiny nankany Babilôna[192].

¹²Rehefa nianjadiam-pahoriana mafy izy, vao nitaraina tamin’ny TOMPO Andriamaniny sady niaiky heloka teo anatrehan’ilay Andriamanitry ny razany

¹³ka nifona taminy. Dia nandeferan’ny TOMPO izy sy nohenoiny vavaka ary nampodîny ho any Jerosalema hanohy ny maha mpanjaka azy. Tamin’izay no nieken’i Manase fa ny TOMPO no hany Andriamanitra.

¹⁴Taorian’izany i Manase dia nanao manda teo ivelan’ny Tanànan’i Davida, dia teo andrefan’ny loharanon’i Gihôna[193]. Nitandavana nanaraka ny lohasahan-driaka izany manda izany ka tafapaka hatrany amin’ny Vavahadin’ny Hazandrano[194] rehefa nanodidina an’i Hôfela[195]; avo dia avo no nanaovany azy. Ary nanendreny komandin’ny miaramila ireo tanànamimanda rehetra tao Joda.

¹⁵Dia nesoriny avy ny andriamani-kafa sy ny sampy tao an-tranon’ny TOMPO; ary nariany teny ivelan’ny tanàna ny alitara rehetra izay naoriny teo an-tendrombohitra misy ny tranon’ny TOMPO sy tao Jerosalema.

¹⁶Naveriny amin’ny laoniny indray ny alitaran’ny TOMPO ka nanolorany sorom-pihavanana sy sorom-pisaorana teo amboniny; ary nodidiany hanompo ny TOMPO Andriamanitr’i Israely ny Jodeanina.

¹⁷Mbola nanao sorona teny amin’ny toeram-pisoronana hafa ny olona, saingy ho an’ny TOMPO Andriamaniny ihany no nanolorany izany.

¹⁸Ny sisa amin’ny tantaran’i Manase, indrindra ny vavaka[196] nataony tamin’Andriamaniny sy ny tenin’ireo mpahita izay niteny azy tamin’ny anaran’ny TOMPO Andriamanitr’i Israely, dia voarakitra ao amin’ny Asan’ireo mpanjakan’i Israely.

¹⁹Ny vavaka nataon’i Manase sy ny nileferan’Andriamanitra taminy ary ny antsipirian’ny fahotana amam-pahadisoana rehetra vitany mbamin’ny faritra nanorenany toeram-panasinana sy nasiany tsatokazo fanajana an’i Aserà ary nananganany sarivongan-tsampy fony izy tsy mbola niaiky heloka, dia voasoratra ao amin’ny Asan’i Hôzay.

²⁰Rehefa lasa nodimandry any amin’ny razany kosa i Manase, dia nalevina tao amin’ny sahany. Ary i Amôna zanany lahy no nanjaka nandimby azy.

²¹Feno 22 taona i Amôna fony tonga mpanjaka; ary naharitra roa taona no nanjakany tao Jerosalema.

²²Nanao izay ratsy teo imason’ny TOMPO izy tahaka an’i Manase rainy. Fa ny sarivongan-tsampy rehetra nataon’i Manase rainy dia nanoloran’i Amôna sorona sy nanaovany fanompoam-pivavahana;

²³kanefa tsy mba niaiky heloka teo anatrehan’ny TOMPO tahaka ny nataon’i Manase rainy izy, fa vao mainka nanota bebe kokoa aza.

²⁴Nikomy tamin’i Amôna ireo manamboninahiny ka namono azy ho faty tao an-dapany.

²⁵Fa mba nataon’ny mponin’i Joda maty kosa izay rehetra nikomy tamin’i Amôna mpanjaka; ka dia i Jôsià zanany lahy no voatendriny ho mpanjaka handimby azy.