Read DIEM PROTESTANTA Hezrà 5 Bible Online

Hezrà 5 - DIEM PROTESTANTA bible

Hezrà 5

¹Indray andro, ny mpaminany Hagay sy ny mpaminany Zakarià[34] zanakalahin’i Hidao dia nitondra hafatra ho an’ny Jiosy tao Jerosalema sy Joda, tamin’ny anaran’Ilay Andriamanitr’i Israely, Izay nanentana azy.

²Dia niroso niasa indray i Zerobabela, zanakalahin’i Sealtiela, sy i Jesoa, zanakalahin’i Jôtsadaka, mba hanorina[35] ny tranon’Andriamanitra ao Jerosalema ary nanampy azy roa lahy koa ireo mpaminanin’Andriamanitra.

³Tamin’izay ihany dia tonga teo amin’ireto mpanorina ny tranon’Andriamanitra i Tatenay governoran’ny faritra andrefan’ny ony Eofrata sy i Setara-Bôzenay mbamin’ireo namany ka nanontany azy hoe: — Iza no nanome baiko anareo hanorina indray io trano io sy hanangana ny manda[36]?

⁴Koa takînay aminareo ny anaran’ireo lehilahy manorina ny trano.

⁵Saingy nitsinjo an’ireto loholona jiosy hatrany Ilay Andriamaniny; ka tsy nahasakana azy hanohy ny asa ry i Tatenay sy ny namany, mandra-pahatongan’ny tatitra tany amin’i Dariôsa sy nahazoana taratasy ôfisialy momba izany toe-javatra izany.

⁶Izao no kôpian’ny taratasy ho an’ny amperôra Dariôsa, taratasy nalefan’i Tatenay governora sy i Setara-Bôzenay ary ny namany mpifehy ny Afarsekita izay teo andafy andrefan’ny ony Eofrata.

⁷Nandefa tatitra ho an’ny amperôra ry zareo ka hoy ny voasoratra ao anatiny hoe: «Ho an’ny amperôra Dariôsa, «Mirary soa sy fiadanana feno ho anao izahay, ry Andriamanjaka.

⁸Aoka mba ho fantatrao fa teny amin’ny faritanin’i Joda sy tao amin’ny tranon’ilay Andriamanitra lehibe izahay. Aorina indray io trano io izao, ka vato vaventy no ampiasaina ary hazo matevina no alatsaka amin’ny rindrina[37]; voakaly tsara ary mandroso haingana izany asa eo am-pelatanan’ny Jiosy izany.

⁹Nanontanianay ireo loholony hoe: Iza no nanome baiko anareo hanorina indray io trano io sy hanangana ny manda[38]?

¹⁰Nanontanianay azy koa ny anarany mba hahazoanay manoratra aminao sy hampahafantatra anao ny anaran’ireo lehilahy mpitarika asa izao.

¹¹Ka izao no teny navaliny anay: ‹Mpanompon’ilay Andriamanitry ny tany aman-danitra izahay; ary trano efa vita ela be ihany no amboarinay indray, fa mpanjaka lehibe anankiray tamin’i Israely[39] no nanorina sy nahavita azy.

¹²Kanefa ny nampahatezeran’ireo razanay an’Ilay Andriamanitry ny lanitra no nanolorany azy ho eo an-tanan’i Nebokadnetsara ilay Kaldeanina mpanjakan’i Babilôna. Nandrava io trano io i Nebokadnetsara sady nitondra ny olona ho babo tany Babilôna[40];

¹³ny fanaka volamena sy volafotsy momba ny tranon’Andriamanitra koa dia nalainy tao amin’ny tempolin’i Jerosalema ka nentiny ho any amin’ny tempolin’i Babilôna. Fa ny taona voalohany nanjakàn’i Kirôsa tamin’i Babilôna, dia namoaka didy ity amperôra ity mba haorina indray io tranon’Andriamanitra io[41].

¹⁴Navoakan’i Kirôsa tao amin’ny tempoli-tsampy koa ireo fanaka ireo ka natolony an’ilay atao hoe Sesebatsàro[42] izay notendreny ho governoran’i Joda;

¹⁵dia nasainy noraisin’i Sesebatsàro ireo fanaka ireo mba hapetrany ao amin’ny tempolin’i Jerosalema rehefa voaorina indray eo amin’izay toerany taloha izany tranon’Andriamanitra izany.

¹⁶Dia tonga tao Jerosalema i Sesebatsàro ka nandatsaka ny fototr’ilay tranon’Andriamanitra; ary hatramin’izany andro izany ka mandraka ankehitriny dia natao ihany izy saingy tsy mbola vita.›

¹⁷Koa raha sitrakao, ry Andriamanjaka, aoka mba hozahana ny trano firaketan’ny amperôra any Babilôna, na misy didy navoakan’ny amperôra Kirôsa hanorenana indray io tranon’Andriamanitra ao Jerosalema io na tsia; ary aoka mba hambaranao, ry Andriamanjaka, ny fanapahan-kevitrao ny amin’izany zavatra izany».