Read DIEM PROTESTANTA Nehemià 11 Bible Online

Nehemià 11 - DIEM PROTESTANTA bible

Nehemià 11

¹Niorim-ponenana tao Jerosalema ireo lehiben’ny vahoaka; ary nanaovana antsapaka ny vahoaka sisa mba hahatonga ny ampahafolony honina ao Jerosalema tanàna masina, fa ny sivy toko kosa dia ho any amin’ny tanàna hafa.

²Nisaoran’ny vahoaka manokana ny lehilahy rehetra izay nanolo-tena honina ao Jerosalema.

³Ireo lohandohany teo amin’ny faritany no niorim-ponenana tao Jerosalema; fa ny Israelita sarambabem-bahoaka, ny mpisorona sy ny levita, ireo mpanampy ny levita sy ireo taranaky ny mpanompon’i Salômôna dia samy tao amin’ny zarataniny aman-tanànany avy.

⁴Kanefa niorim-ponenana tao Jerosalema koa ny olona sasany tamin’ny taranak’i Joda sy i Benjamîna. Tamin’ny taranak’i Joda dia ireto avy: i Hataià, anisan’ny terak’i Peretsa noho izy zanakalahin’i Hozià sy zafin’i Zakarià sy zafiafin’i Amarià sy zafin-dohalik’i Sefatià ary zafin-kitrokelin’i Mahalalela;

⁵ary i Mahaseià, anisan’ny terak’i Selà noho izy zanakalahin’i Baròka sy zafin’i Kôla-Hôze sy zafiafin’i Hazaià sy zafin-dohalik’i Hadaià sy zafin-kitrokelin’i Jôiariba ary zafim-paladian’i Zakarià.

⁶Lehilahy olombanona 468 no tontalin’ny terak’i Peretsa tonga nonina tao Jerosalema.

⁷Tamin’ny taranak’i Benjamîna dia ireto avy: i Salò, zanakalahin’i Mesolama sy zafin’i Jôheda sy zafiafin’i Pedaià sy zafin-dohalik’i Kôlaià sy zafin-kitrokelin’i Mahaseià sy zafim-paladian’i Itiela ary zafin-dorian’i Jesahià,

⁸mbamin’ireo lehilahy olombanona mpiray foko aminy: dia 928 no tontalin’ny Benjaminita.

⁹I Jôela, zanakalahin’i Zikry, no mpifehy azy; ary i Joda, zanakalahin’i Senaà, no lefitry ny komandin’ny tanàna.

¹⁰Tamin’ny mpisorona dia ireto avy: i Jedahià, zanakalahin’i Jôiakima;

¹¹i Seraià, zanakalahin’i Hilkià sy zafin’i Mesolama sy zafiafin’i Tsadôka sy zafin-dohalik’i Meraiôta ary zafin-kitrokelin’i Ahitoba mpisorombe;

¹²ary koa lehilahy 822 iray tarika amin’i Jedahià sy i Seraià, izay mpiasa teo amin’ny fanaovana ny tranon’Andriamanitra; i Hadaià, zanakalahin’i Jerôhama sy zafin’i Pelahià sy zafiafin’i Ametsy sy zafin-dohalik’i Zakarià sy zafin-kitrokelin’i Pasehora ary zafim-paladian’i Malkià,

¹³ary koa lehilahy 242 iray tarika amin’i Hadaià, izay samy loham-pianakaviana avy; i Hamasay, zanakalahin’i Hazarela sy zafin’i Ahezay sy zafiafin’i Meselemôta ary zafin-dohalik’i Imera,

¹⁴ary koa lehilahy tomady 128 iray tarika amin’i Hamasay, ka ny mpifehy azy dia i Zabdiela zanakalahin’i Gedôlima.

¹⁵Tamin’ny levita dia ireto avy: i Semahià, zanakalahin’i Hasoba sy zafin’i Hazrikama sy zafiafin’i Hasabià ary zafin-dohalik’i Bony;

¹⁶i Sabetahy sy i Jôzabada, anisan’ny lohandohan’ny levita sady tonian’ny raharaha teo ivelan’ny tranon’Andriamanitra;

¹⁷i Matanià zanakalahin’i Mikà sy zafin’i Zabdy ary zafiafin’i Asafa ka izy no mpiventy ny hira fiderana amin’ny fotoam-pivavahana; i Bakbokià rahalahin’i Matanià sady mpanampy azy amin’ny hira; ary i Habdà, zanakalahin’i Samoa sy zafin’i Galala ary zafiafin’i Jedotona.

¹⁸Ny levita rehetra, tao amin’ny tanàna masina, dia 284.

¹⁹Ny mpiandry varavarana dia i Hakoba sy i Talmôna mbamin’ny namany izay niambina ny vavahady, ka 172 no isany.

²⁰Ny sisa tamin’ny Israelita sy ny mpisorona ary ny levita dia teny amin’ny tanàna rehetra tao Joda, samy teo amin’ny zarataniny avy.

²¹Fa ireo mpanampy ny levita[46] dia nonina teo amin’ny faritr’i Hôfela, ka i Tsihà sy i Gispà no nifehy azy.

²²Ny mpifehy ny levita tao Jerosalema dia i Hozy, zanakalahin’i Banỳ sy zafin’i Hasabià sy zafiafin’i Matanià ary zafin-dohalik’i Mikà; i Hozy dia anisan’ny tarik’i Asafa, ilay tarika mpihira miadidy ny fanompoana ao an-tranon’Andriamanitra.

²³Fa nisy didin’ny mpanjaka ny amin’ireo mpihira ireo, dia ny handraiketana izay anjara asa hataony isan’andro.

²⁴I Petahià, zanakalahin’i Mesezabela sady anisan’ny terak’i Zera zanakalahin’i Joda, dia teo anilan’ny amperôra mba hiandraikitra ny raharaha rehetra momba ny vahoaka israelita.

²⁵Ny sasany tamin’ny taranak’i Joda dia nonina tany amin’ireto tanàna teny anivon-tsaha ireto: i Kiriata-Arbà sy ireo tanàna kely miankina aminy, i Dibôna sy ireo tanàna kely miankina aminy, i Kabitseela sy ny tanàna mifanila aminy,

²⁶i Jesoa, i Môladà, i Bety-Peleta,

²⁷i Hatsary-Sohaly, i Beera-Seba sy ireo tanàna kely miankina aminy,

²⁸i Tsiklaga, i Mekônà sy ireo tanàna kely miankina aminy,

²⁹i Haîna-Rimôna, i Tsôrehà, i Jarmota,

³⁰i Zanôa, i Hadolama sy ny tanàna mifanila aminy, i Lakîsy sy ny saha manodidina azy, i Hazeka sy ireo tanàna kely miankina aminy. Nonina hatrany Beera-Seba any atsimo ka hatramin’ny lohasahan’i Hinôma any avaratra ireo taranak’i Joda ireo.

³¹Ny sasany tamin’ny taranak’i Benjamîna kosa dia nonina tamin’ireto tanàna ireto: i Geba, i Mikmasy, i Haià, i Betela sy ireo tanàna kely miankina aminy,

³²i Hanatôta, i Nôba, i Hananià,

³³i Hatsôra, i Ramà, i Gitaîma,

³⁴i Hadida, i Tsebôhima, i Nebalato,

³⁵i Lôda, i Onao ary ny lohasahan’ny mpahay taozavatra.

³⁶Tamin’ireo levita, dia nisy ankolafiny tao Joda lasa nankany Benjamîna[47].