Read DIEM PROTESTANTA Nehemià 12 Bible Online

Nehemià 12 - DIEM PROTESTANTA bible

Nehemià 12

¹Ireto no mpisorona sy levita izay niverina avy any an-tsesitany niaraka tamin’i Zerobabela zanakalahin’i Sealtiela sy niaraka tamin’i Jesoa: I Seraià sy i Jeremià ary i Hezrà,

²i Amarià sy i Malòka ary i Hatosy,

³i Sekanià sy i Harîma ary i Meremota,

⁴i Hidao sy i Ginetôna ary i Abià,

⁵i Miamîna sy i Mahadià ary i Bilgà,

⁶i Semahià sy i Jôiariba ary i Jedahià,

⁷i Salo sy i Hamôka ary i Hilkià sy i Jedahià. Tamin’ny andron’i Jesoa dia ireo no lohandoha-mpisorona sy mpiombom-panompoana aminy.

⁸Ny levita kosa dia ireto avy: i Jesoa sy i Binoy ary i Kadmiela mbamin’i Serebià sy i Jehodà ary i Matanià. Ity Matanià ity sy ny havany no mpiventy hira fiderana,

⁹izay novalian’i Bakbokià sy i Hony levita namany nipetraka tandrifiny.

¹⁰I Jesoa no ray niteraka an’i Jôiakima; i Jôiakima no ray niteraka an’i Eliasiba; i Eliasiba no ray niteraka an’i Jôiadà;

¹¹i Jôiadà no ray niteraka an’i Jôhanàna; ary i Jôhanàna no ray niteraka an’i Jadoa.

¹²Tamin’ny andro naha mpisorombe an’i Jôiakima, dia ireto avy ny mpisorona loham-pianakaviana: i Meraià ho an’ny fianakavian’i Seraià; i Hananià ho an’ny fianakavian’i Jeremià;

¹³i Mesolama ho an’ny fianakavian’i Hezrà; i Johanàna ho an’ny fianakavian’i Amarià;

¹⁴i Jônatàna ho an’ny fianakavian’i Malòka; i Jôsefa ho an’ny fianakavian’i Sekanià;

¹⁵i Hadnà ho an’ny fianakavian’i Harîma; i Helkay ho an’ny fianakavian’i Meremôta;

¹⁶i Zakarià ho an’ny fianakavian’i Hidao; i Mesolama ho an’ny fianakavian’i Ginetôna[48];

¹⁷i Zikry ho an’ny fianakavian’i Abià; i... ho an’ny fianakavian’i Miniamina; i Piltahy ho an’ny fianakavian’i Mahadià;

¹⁸i Samoa ho an’ny fianakavian’i Bilgà; i Jônatàna ho an’ny fianakavian’i Semahià;

¹⁹i Matenay ho an’ny fianakavian’i Jôiariba; i Hozy ho an’ny fianakavian’i Jedahià;

²⁰i Kalay ho an’ny fianakavian’i Salò; i Hebera ho an’ny fianakavian’i Hamôka;

²¹i Hasabià ho an’ny fianakavian’i Hilkià; i Natanaela ho an’ny fianakavian’i Jedahià.

²²Tamin’ny andro naha mpisorombe an’i Eliasiba sy i Jôiadà ary i Jôhanàna sy i Jadoa, dia natao an-tsoratra ny levita izay loham-pianakaviana; ary toy izany koa ny mpisorona, ka nitohy hatramin’ny nanjakàn’i Dariôsa amperôran’i Persia izany.

²³Ny levita loham-pianakaviana dia natao an-tsoratra tanatin’ny boky firaketana ny zava-nitranga lehibe; saingy niafara tamin’ny andron’i Johanàna zafin’i Eliasiba izany.

²⁴Ny lohandohan’ny levita, izany hoe i Hasabià sy i Serebià ary i Jesoa mbamin’ny Binoy sy i Kadmiela, dia nifanatrika tamin’ireo levita namany mba hidera sy hisaotra an’Andriamanitra, rehefa tonga ny anjara fanompoany. Ny fandaharana nataon’i Davida olon’Andriamanitra no narahiny tamin’izany.

²⁵Ny mpiandry varavarana kosa dia ry i Matanià sy i Bakbokià, i Hôbadià sy i Mesolama, ary i Talmôna sy i Hakoba; andraikiny koa ny fiambenana ireo trano fitobian’entana teo akaikin’ny vavahadin’ny tempoly.

²⁶Ireo no nisahana izany asa izany tamin’ny andron’i Jôiakima zanakalahin’i Jesoa sy zafin’i Jôtsadàka, ary tamin’ny andron’i Nehemià governora sy i Hezrà mpisorona sady mpahay lalàna.

²⁷Rehefa hotokanana ny mandan’i Jerosalema, dia nantsoina avy tamin’ny toeram-ponenany rehetra ny levita; nasaina ho tonga any Jerosalema ry zareo mba hanao ny fitokanana amim-pifaliana, ombàn’ny hira fiderana arahin’ny kipantsona sy valiha ary lokanga.

²⁸Dia tafangona ny mpihira avy any ambanivohitr’i Jerosalema sy avy amin’ny tanàna kely akaikin’i Netôfà

²⁹sy avy any Bety-Gilgala ary avy amin’ny faritr’i Geba sy i Hazmavety; fa efa nanao tanàna kely ho azy manodidina an’i Jerosalema ny mpihira.

³⁰Samy nidio tena ny mpisorona sy ny levita; ary nodioviny koa ny olona sy ny vavahady ary ny manda.

³¹Dia nasaiko niakatra eo ambonin’ny manda ireo mpanapaka an’i Joda; ny mpihira kosa nozaraiko ho antokony roa lehibe mitandahatra tsara. Ny antoko mpihira voalohany dia niroso teny ambonin’ny manda, tamin’ny ilany ankavanana[49] mankeny amin’ny Vavahadin’ny Fanariam-pako;

³²ka nandeha nanarakaraka azy ry i Hôsahià, ny antsasak’ireo mpanapaka an’i Jodà,

³³i Hazarià sy i Hezrà ary i Mesolama,

³⁴i Joda sy i Benjamîna ary i Semahià sy i Jeremià;

³⁵taorian’ireo ny sasany tamin’ny mpisorona mpitondra trompetra; avy eo i Zakarià, zanakalahin’i Jônatàna sy zafin’i Semahià sy zafiafin’i Matanià sy zafin-dohalik’i Mikaià sy zafin-kitrokelin’i Zakora ary zafim-paladian’i Asafa,

³⁶mbamin’ireo naman’i Zakarià, dia i Semahià sy i Hazarela, i Milalay sy i Gilalay; i Mahay sy i Netaneela, ary i Joda sy i Hananỳ, izay samy nitondra ny zava-maneno namboarin’i Davida olon’Andriamanitra. I Hezrà mpahay lalàna no nialoha ireo mpiray dia ireo.

³⁷Nony tonga teo amin’ny Vavahadin’ny Loharano ry zareo, dia niatrika ny ambaratongan’ny Tanànan’i Davida; teo amin’ny manda ihany no niakatra izany izy ka nanjary lasa ambonin’ny tranon’i Davida, ary tafapaka hatreny amin’ny Vavahadin-drano eo atsinanana.

³⁸Ny antoko-mpihira faharoa kosa dia nandeha tamin’ny ilany ankavia; ka ny tenako sy ny antsasak’ireo mpanapaka an’i Joda no nanaraka azy teny ambonin’ny manda. Nandalo teo akaikin’ny Tilikambon’ny Fatana izahay, dia nandroso hatreny amin’ny manda malalaka;

³⁹avy eo dia nitety ny vavahadin’i Efraîma, sy ny vavahady tranainy ary ny vavahadin’ny Trondro. Nandalo teo akaikin’ny Tilikambo Hananela sy ny tilikambon’ny Zatolahy ary nihoatra ny vavahadin’ny Ondry izahay, vao nitsatoka teo amin’ny Vavahadin’ny fonja[50].

⁴⁰Dia samy nijanona tao an-tranon’Andriamanitra ny antoko-mpihira roa tonta, mbamin’ny tenako sy ireo mpanapaka tafaraka tamiko

⁴¹ary ny mpisorona trompetra, dia ry i Eliakima sy i Mahaseià, i Miniamîna sy i Mikaià, i Eliôhenay sy i Zakarià ary i Hananià.

⁴²Nijanona tao ihany koa ry i Mahaseià sy i Semahià, i Elehazara sy i Hozy, i Jôhanàna sy i Malkià, ary i Helama sy i Hezera. Dia nihira mafy ny mpihira teo ambany fitarihan’i Jizrahià.

⁴³Sorona maro no natolotra tamin’izany andro izany ary fifaliana no nanjaka, satria antom-pifaliana lehibe no efa nomen’Andriamanitra ny olona. Tao Jerosalema dia nifaly mbamin’ny zaza amam-behivavy, ka re lavitra ny hobin-kafaliana.

⁴⁴Tamin’izay koa dia nisy olona notendrena hitandrina ny efitrano fitehirizana ny fanatitra avahana sy ny voaloham-bokatra ary ny fahafolon-karena. Ao no nasaina hangonin’ireo olona ireo ny anjara voadidin’ny lalàna mba ho an’ny mpisorona sy ny levita, avy any amin’ny saha manodidina ny isan-tanàna; nifalian’ny vahoakan’i Joda manko ireo mpisorona sy levita izay samy teo amin’ny anjara toerany avy,

⁴⁵sady nisahana ny tokony hotandremany momba an’Andriamaniny sy momba ny fidiovana. Toy izany koa ny mpihira sy ny mpiandry varavarana, izay nanaraka ny fandaharana nataon’i Davida sy i Salômôna zanany[51];

⁴⁶Tamin’ny andron’i Davida manko dia i Asafa no lehiben’ny mpihira ary nisy ny mpitarika antoko-mpihira mbamin’ny hira fiderana sy fisaorana ho fankalazana an’Andriamanitra.

⁴⁷Ary tamin’ny andron’i Zerobabela sy i Nehemià, dia nomen’ny Israelita rehetra isan’andro ny anjaran’ny mpihira sy ny mpiandry varavarana; nomeny koa ny fanatitra voatokana ho an’ny levita, ary ny levita kosa indray no nanome ny fanatitra voatokana ho an’ny mpisorona taranak’i Aharôna.