Read DIEM PROTESTANTA Estera 8 Bible Online

Estera 8 - DIEM PROTESTANTA bible

Estera 8

¹Androtr’io ihany dia nomen’ny amperôra Kserksesa ho an’i Estera mpanjakavavy ireo fananan’i Hamàna fahavalon’ny Jiosy. I Môrdôkay koa, rehefa nampahafantarin’i Estera fa rainy izy, dia nasaina hankeo amin’ny amperôra.

²Ary nesorin’i Kserksesa ilay peratra tombokase, izay efa nalainy tamin’i Hamàna, ka nomeny an’i Môrdôkay[28]. Ankoatra izany i Môrdôkay dia notendren’i Estera hitantana ireo fananan’i Hamàna.

³Dia niteny teo anatrehan’ny amperôra indray i Estera sady niankohoka teo an-tongony ka nitomany sy nifona taminy mba hanafoana ny loza notetehin’i Hamàna taranak’i Agaga[29] hamelezana ny Jiosy.

⁴Ary notondroin’ny amperôra tamin’ny tehim-bolamena i Estera[30], ka nitsangana sy nijoro teo anatrehany

⁵ary nanao hoe: — Ry andriamanjaka, raha sitrakao sy ataonao ho mety ary raha mba mahazo fitia eo anatrehanao sy tsara eo imasonao aho, dia aoka hisy soratra hanova ireo taratasy voahevitr’i Hamàna zanakalahin’i Hamedatà sady taranak’i Agaga. Nosoratan’i Hamàna manko ireny taratasy ireny hampandringana ny Jiosy any amin’ny faritany rehetra manerana ny fanjakanao.

⁶Ka hataoko ahoana no fijery ny loza hanjo ireo mpiray firenena amiko sy ny fandringanana ireo iray firazanana amiko?

⁷Dia hoy ny amperôra Kserksesa tamin’i Estera mpanjakavavy sy tamin’i Môrdôkay ilay Jiosy: — Indro efa nahantona tamin’ny hazo i Hamàna satria naninji-tanana hamely ny Jiosy; sady ireo fananany koa, ry Estera, efa nomeko anao.

⁸Tsy azo foanana rehefa taratasy voasoratra tamin’ny anarako sy voatomboka tamin’ny peratro; kanefa manorata taratasy amin’ny anarako ianareo, araka izay sitrakareo mba hamonjena ny Jiosy, ka tombohy amin’ny peratro izany.

⁹Tamin’io andro io, andro faha-23 tamin’ny volana fahatelo na volana Sivàna, dia nantsoina ny mpitantsoratry ny amperôra. Araka izay rehetra nandidian’i Môrdôkay no nanoratany taratasy ho an’ny Jiosy sy ny solotenan’ny amperôra mbamin’ny governora sy mpitondra any amin’ny faritany 127 hatreo India ka hatrany Etiôpia. Taratasy araka ny fomba fiteny sy fanoratry ny firenena isan-tokony na araka ny fomba fiteny sy fanoratry ny Jiosy no nataony.

¹⁰Nosoniavina tamin’ny anaran’ny amperôra ireo taratasy ireo sy notombohina tamin’ny peratra tombokaseny ary dia nampitondraina iraka, mitaingina soavalim-panjakana haingam-pandeha avy amin’ny fiompian-tsoavalin’ny amperôra.

¹¹Voarakitry ny taratasy fa ny Jiosy isan-tanàna misy azy dia nomen’ny amperôra lalana hivory hiaro ny ainy. Navela koa ry zareo handringana sy hamono ho ripaka izay andian’olona mamely azy any amin’ny firenena sy faritany isan-tokony; azony atao aza ny mamono ny vady aman-janak’ireo sy ny mandroba ny fananany.

¹²Andro iray ihany no hampiharana izany fanomezan-dalana izany amin’ny faritany rehetra manerana ny fanjakan’i Kserksesa, dia ny andro faha-13 amin’ny volana faha-12 na volana Adara[31].

¹³Ny kopian’io taratasy io dia navoaka ho didy manan-kery amin’ny isam-paritany ary nampahafantarina ny olona rehetra mba hampiomana ny Jiosy ho amin’izany andro hamaliany ny fahavalony izany.

¹⁴Noho ny baikon’ny amperôra, dia nandeha faingana sy dodona ny iraka, nitaingina soavalim-panjakana haingam-pandeha avy amin’ny fiompian-tsoavalin’ny amperôra. Ary navoaka tao Sosany renivohitra[32] koa izany didy manan-kery izany.

¹⁵Fony i Môrdôkay nivoaka ny lapa, dia akanjo lava vita rongony madinika miloko jaky no nanaovany, fanamiam-piandrianana fotsy sy volomparasy no nitafiany, ary satroboninahitra volamena lehibe no nisatrohany; koa faly sy ravo i Sosany iray vohitra.

¹⁶Ny Jiosy dia miramirana sy ravoravo ary heni-kafaliana amam-boninahitra.

¹⁷Isam-paritany sy isan-tanàna nahatongavan’ny teny aman-didin’ny amperôra, dia ravoravo sy heni-kafaliana ny Jiosy ary nanao fanasana sy lanonana. Maro ny olona tompon-tany no tonga Jiosy, satria nanindry azy ny fahatahorana ny Jiosy.