Read DIEM PROTESTANTA Eksôdy 25 Bible Online

Eksôdy 25 - DIEM PROTESTANTA bible

Eksôdy 25

¹Hoy ny TOMPO tamin’i Mosesy:

²— Ilazao ny Israelita mba hanomana fanomezana ho Ahy, ka avy amin’ny olona rehetra manolotra an-tsitrapo no anangony azy.

³Ireto avy no fanatitra izay hangoninareo: volamena, volafotsy, halimo,

⁴volon’ondry miloko volomparasy na mena na jaky, rongony madinika, volon’osy,

⁵hoditr’ondry miloko mena, hoditra mafy, hazo mimôza,

⁶solika hampiasaina amin’ny fitoeran-jiro, ilomanitra hafangaro amin’ny ilomasina fanokanana sy amin’ny vovo-javamanitra hodorana,

⁷vato berila sy vatosoa hafa ho an’ny efôda sy ny saron-tratran’ny mpisorombe[162].

⁸Hanamboatra tranolay masina ho Ahy ny Israelita mba hitoerako eo aminy.

⁹Araka ny planina sy ny môdely izay hasehoko anao no handrafetanareo io fonena-masina io sy ny fanaka rehetra momba azy.

¹⁰«Hisy Vatamasina hamboarina amin’ny hazo mimôzà; ka mirefy 125 santimetatra ny lavany, 75 santimetatra ny sakany ary 75 santimetatra ny haavony.

¹¹Horakofana takela-bolamena madio ny atiny sy ny ivelany ary hasiana sisiny volamena manodidina eo amboniny.

¹²Haba volamena efatra no hotefena ka haraikitra eo amin’ny zorony efatry ny Vatamasina, dia samy roa an-daniny avy.

¹³Hisy bao roa hatao amin’ny hazo mimôzà, ary horakofana takela-bolamena.

¹⁴Hatsofoka ao amin’ireo haba ireo ny bao roa mba hilanjana ny Vatamasina.

¹⁵Rehefa tafiditra amin’ny toerany ireo, dia tsy hoesorina intsony.

¹⁶Ao anatin’io Vatamasina io no hametrahanao ny raki-tsoratry ny fanekempihavanana izay homeko anao.

¹⁷«Hanaovana sarony volamena madio ilay Vatamasina, ka io sarony io dia hirefy 125 santimetatra ny lavany ary 75 santimetatra ny sakany.

¹⁸Hanefena kerobima roa volamena amin’ny sakany roa eo ambony saron’ny Vatamasina.

¹⁹Hovoasana mitambatra amin’ny saron’ny Vatamasina ireo kerobima roa ireo, eo amin’ny sakany avy.

²⁰Hifanatrika ny kerobima roa sady manatrika ny saron’ny Vatamasina izay alofany amin’ny elany mivelatra.

²¹Hapetraka eo ambony Vatamasina ny sarony rehefa tafiditra ao anatiny ao ny raki-tsoratry ny fanekempihavanana izay homeko anao.

²²Eo ambonin’ny Vatamasina, eo anelanelan’ny kerobima roa, no hisehoako aminao; eo no hanomezako anao ny baiko rehetra momba ny Israelita.

²³«Hisy koa latabatra hamboarina amin’ny hazo mimôzà, ka hirefy iray metatra ny lavany, 50 santimetatra ny sakany ary 75 santimetatra ny haavony.

²⁴Horakofana takela-bolamena madio izany sady hasiana sisiny volamena manodidina.

²⁵Hanaovana fehivava mivelatra valo santimetatra manodidina azy sady hasiana sisiny volamena eo ambonin’io fehivava io.

²⁶Hisy haba volamena efatra koa no hotefena, dia hapetraka eo amin’ny zorony efatra, mifanila amin’ny tongony efatra.

²⁷Hatao eo akaikin’ny fehivavany ny haba ka hampidirana bao mba hitondrana ny latabatra.

²⁸Hazo mimôzà no hanaovana ny bao roa, izay horakofana takela-bolamena; ary ireo no hilanjàna ny latabatra.

²⁹Hamboarina koa ny fitaovana fametraka eo ambonin’io latabatra io: dia lovia fisaka lehibe, kaopy, tavoara, tsatokaty ho an’ny fanatitra divay, ka samy hatao amin’ny volamena madio avokoa izy rehetra.

³⁰Eo ambonin’io latabatra io no hametrahana ny mofo atolotra ho Ahy, ka hisy tsy tapaka eo anatrehako izany[163].

³¹«Hisy koa fitoeran-jiro volamena madio hamboarina; voasana no hanaovana azy, ka ny faladiany sy ny tahony, ny raviny sy ny bokony ary ny voniny dia hitambatra ho tena iray ihany[164].

³²Hasiana rantsana enina hivoaka avy amin’ny tahobeny, ka samy telo an-daniny avy.

³³Isaky ny rantsana tsirairay dia hisy felam-boninkazo telo miendrika felam-paiso miaraka amin’ny bokony sy ny voniny.

³⁴Eo amin’ilay tahobeny kosa dia hisy felam-boninkazo efatra miendrika felam-paiso miaraka amin’ny bokony sy ny voniny.

³⁵Ary eo ambanin’ny rantsana enina izay miainga avy amin’ny tahobeny dia hisy boko iray isaky ny rantsana tsiroaroa.

³⁶Mitambatra ho iray ihany amin’ny sisa rehetra ny boko sy ny rantsana, ka samy ho volamena madio avokoa izy rehetra.

³⁷Jiro fito no hamboarina ka hapetraka eo amin’io fitoeran-jiro io mba hanazava ny anoloany.

³⁸Ny tandra sy ny fitoeran-davenon-jiro dia hatao volamena madio.

³⁹Vongam-bolamena madio telopolo kilao no hampiasaina hanaovana ny fitoeran-jiro sy ny fitaovana rehetra miaraka aminy.

⁴⁰Imasoy, ry Mosesy, ny hanatanterahana ny asa araka ny môdely izay nasehoko anao teto an-tendrombohitra[165].