Read DIEM PROTESTANTA Eksôdy 30 Bible Online

Eksôdy 30 - DIEM PROTESTANTA bible

Eksôdy 30

¹«Alitara iray no hamboarina amin’ny hazo mimôzà mba handoroana ny vovo-javamanitra.

²Ho efamira izy io, ka hirefy dimampolo santimetatra ny lafiny tsirairay, ary iray metatra ny haavony. Hisy tandrony hatao miray aminy avy eo amin’ny zorony efatra ambony.

³Horakofana takela-bolamena madio ny tampony sy ny lafiny manodidina ary ny tandrony, ary hasiana sisiny volamena manodidina.

⁴Hisy haba volamena roa avy hapetraka eo ambonin’ny sisiny an-daniny roa amin’ny alitara, ka hampidirana bao mba hilanjana azy.

⁵Hazo mimôzà no hanaovana ny bao ary horakofana takela-bolamena.

⁶Hapetraka eo anoloan’ny efitra lamba izay manafina ny Vatamasina misy ny raki-tsoratry ny fanekempihavanana[176] io alitara io, dia eo anoloan’ny saron’ny Vatamasina izay hihaonako aminao.

⁷Isa-maraina dia handoro vovo-javamanitra eo i Aharôna rehefa hanadio ny fitoeran-jiro ao amin’ny Toeramasina,

⁸ary koa isan-kariva rehefa handrehitra ny jiro izy. Handoroana vovo-javamanitra tsy tapaka eo ho fanomezam-boninahitra Ahy TOMPO.

⁹Aza manolotra vovo-javamanitra tsy sahaza eo, na sorona dorana manontolo, na fanatitra vokatry ny tany; tsy handrarahana fanatitra divay koa eo ambonin’io alitara io.

¹⁰Indray mandeha isan-taona i Aharôna no hanadio azy; hapetrany eo amin’ny tandroky ny alitara ny ra nalaina avy tamin’ny biby natao sorona ahazoana famelan-keloka. Havaozina isan-taona io lanonana io eo amin’ny taranaka mifandimby. Voatokana ho Ahy TOMPO io alitara io, ka hanan-kasina fatratra.»

¹¹Hoy indray ny TOMPO tamin’i Mosesy:

¹²— Rehefa manao ny fanisam-bahoaka amin’ny Israelita ianao, dia samy handoa hetra ho AHY ny olona tsirairay hanavotana ny ainy, mba tsy hisy loza hanjo azy amin’ny fanisana.

¹³Izay rehetra voaisa dia samy hanome vola antsasaky ny sekela, araka ny lanja fampiasa ao amin’ny Toeramasina[177]. Io vola io dia haloa ho Ahy TOMPO,

¹⁴avy amin’ny Israelita rehetra voaisa ka roapolo taona no ho miakatra.

¹⁵Ny mpanankarena tsy handoa mihoatra antsasaky ny sekela, ary ny mahantra koa tsy handoa latsak’izany; fa ny tsirairay samy handoa ho AHY ny vola voatondro mba hanavotra ny ainy.

¹⁶Rehefa voaangonao avy amin’ny Israelita rehetra izany vola izany, dia hampiasainao hikojakojana ny Tranolay fihaonana. Izany no hahatsiarovako ny Israelita ka hiarovako ny ainy.

¹⁷Hoy koa ny TOMPO tamin’i Mosesy:

¹⁸— Momba ny fidiovana, dia hisy kovetabe[178] iray ka halimo no hamboarana azy; hasiana faladiany halimo izany, ka hapetraka eo anelanelan’ny Tranolay fihaonana sy ny alitara, sady hofenoina rano.

¹⁹Io rano io no hampiasain’i Aharôna sy ny zanany lahy, hanasany ny tongotra aman-tanany,

²⁰alohan’ny hidirany ao amin’ny Tranolay fihaonana na hanatonany ny alitara mba handoro sorona hanetona ho Ahy TOMPO. Amin’izay dia tsy ho faty izy ireo.

²¹Tsy maintsy misasa tongotra aman-tanana izy mba tsy ho faty. Fepetra hanan-kery hatrany eo aminy sy ny taranany izany.

²²Hoy koa ny TOMPO tamin’i Mosesy:

²³— Makà zava-manitra tsara indrindra: dia miora ranony dimy kilao, havozomanitra roa kilao sy sasany, kanelina manitra roa kilao sy sasany,

²⁴ary kasia dimy kilao[179], araka ny lanja fampiasa ao amin’ny Toeramasina, miampy diloilon’ôliva enina litatra.

²⁵Mpamboatra zava-manitra no hampifangaroharo azy hanjary ilomasina hampiasaina amin’ny lanonana fanokanana.

²⁶Io no hampisaina mba hanokanana nyTranolay fihaonana, ny Vatamasina misy ny raki-tsoratry ny fanekempihavanana,

²⁷ny latabatra voatokana, ny fitoeran-jiro sy ny fitaovana miaraka aminy, ny alitara fandoroana vovo-javamanitra,

²⁸ny alitara fanaovana sorona sy ny fitaovana miaraka aminy, ary ny kovetabe sy ny faladiany.

²⁹Rehefa vita fanokanana ireo, dia ho voatokana ho Ahy tokoa, ka izay rehetra mikasika azy na olona na zavatra dia hiharan-doza.

³⁰Horarahanao ilomasina koa i Aharôna sy ny zanany lahy ho fanokanana azy mba hanompo Ahy amin’ny maha mpisorona.

³¹«Aorian’izany dia hambaranao amin’ny Israelita hoe: Ity no ilomasina fampiasa amin’ny fanokanana. Fanompoana ny Tompo irery ihany no hampiasana azy eo amin’ny taranaka mifandimby.

³²Koa tsy misy olona mahazo mampiasa azy mba hihosorany, ary tsy misy mahazo manamboatra ilomanitra mitovy aminy; fa voatokana izany, ka tsy maintsy hajaina ny maha voatokana azy.

³³Fa raha misy maka tahaka manamboatra mitovy aminy, ka manosotra azy amin’ny tenan’ny olon-tsotra, dia hoesorina tsy ho anisan’ny firenena israelita izy.»

³⁴Hoy koa ny TOMPO tamin’i Mosesy: — Makà zava-manitra ianao: dia natafa, ôniksa, galbanoma, ary ramy madio. Ataovy mitovy fatra ireo[180].

³⁵Mpamboatra zava-manitra no hampifangaroharo azy miaraka amin’ny sira[181] mba hahatonga azy ho voatokana sy madio.

³⁶Hotorotoroina ho vovoka madinika izany ka hampiasaina ao amin’ny Tranolay fihaonana, manoloana ny Vatamasina izay toerana hihaonako aminao. Hanan-kasina miavaka aminareo izany.

³⁷Aza manamboatra zava-manitra mitovy aminy mba hampiasainareo ho anareo, fa aoka hoheverinareo ho voatokana ho Ahy TOMPO ihany izany.

³⁸Fa raha misy manamboatra zava-manitra mitovy aminy hamofonany azy, dia hoesorina tsy ho anisan’ny firenena israelita izy[182].