Read DIEM PROTESTANTA Eksôdy 36 Bible Online

Eksôdy 36 - DIEM PROTESTANTA bible

Eksôdy 36

¹I Betsalela sy i Ôhôliaba mbamin’ireo mpahay taozavatra hafa, izay nomen’ny TOMPO fahakingana sy faharanitan-tsaina ilaina hanatanterahana ny asa, dia hanamboatra ny zavatra rehetra hampiasaina amin’ny fanompoam-pivavahana ao amin’ny Toeramasina araka izay rehetra nodidian’ny TOMPO.

²Nampanantsoin’i Mosesy i Betsalela sy i Ôhôliaba mbamin’ireo mpahay taozavatra hafa, izay nomen’ny TOMPO fahakingana sady vonona hanatanteraka ny asa.

³Natolotr’i Mosesy an-dry zareo ny fanomezana nentin’ny Israelita hanaovana ny Toeramasina. Isa-maraina dia mbola nisy nitondra fanomezana an-tsitrapo teo anatrehan’i Mosesy.

⁴Noho izany, ireo mpahay taozavatra rehetra izay nirotsaka tamin’ny fanamboarana ny Toeramasina dia nanapaka ny asany,

⁵mba hilaza amin’i Mosesy hoe: «Nitondra mihoatra noho izay ilaina amin’ny fanatontosana ny asa nodidian’ny TOMPO hatao ny vahoaka.»

⁶Niaraka tamin’izay dia nanome baiko manerana ny toby i Mosesy hoe: «Aoka tsy hisy intsony olona, na lahy na vavy, hanomana fanomezana hanaovana ny Toeramasina.» Dia nitsahatra tsy nitondra fanomezana intsony ny vahoaka,

⁷satria ampy hanaovana ny asa rehetra ny efa voaray ka nisy ambiny aza.

⁸Dia nanamboatra ny fonena-masina ny mpahay taozavatra[217] mahay indrindra; lamba temitra folo vita amin’ny kiran-drongony mafy, mifangaro volon’ondry miloko volomparasy sy mena ary jaky, no nanaovany azy, ka noravahany kerobima vita peta-kofehy tsara.

⁹Nitovy refy avokoa ny lamba temitra rehetra, ka 14 metatra ny lavany, ary roa metatra ny sakany.

¹⁰Natambany ho vitrana iray aloha ny lamba temitra dimy; avy eo dia nataony toy izany koa ny dimy hafa.

¹¹Nopetahany kofehy volon’ondry miloko volomparasy ny sisin-damba farany tamin’ny vitrana voalohany, ary nataony toy izany koa ny sisin-damba voalohany tamin’ny vitrana faharoa.

¹²Nisy tadivavarana dimampolo tamin’ny sisin’ny vitrana tsirairay, ka nifanandrify tamin’ny laharan’ny tadivavarana teo amin’ny vitrana iray mifanila aminy.

¹³Nanamboatra farango volamena dimampolo ry zareo mba hanakambanany ny vitrana tsiroaroa, dia voatambatra ho iray ihany ny fonena-masina manontolo.

¹⁴Avy eo, dia namboariny koa ny tranolay hiarovana ny fonena-masina, ka lamba temitra 11 vita amin’ny volon’osy no nanaovany azy.

¹⁵Nitovy refy avokoa ny lamba temitra rehetra, ka 15 metatra ny lavany, ary roa metatra ny sakany.

¹⁶Natambany ho vitrana iray aloha ny lamba temitra dimy, avy eo dia nataony toy izany koa ny enina hafa.

¹⁷Nopetahany tadivavarana dimampolo ny sisin-damba farany amin’ny vitrana voalohany, ary nataony toy izany koa ny sisin-damba voalohany amin’ny vitrana faharoa.

¹⁸Nanamboatra farango halimo dimampolo ry zareo mba hampikambana ny lay ho iray ihany.

¹⁹Mba hiarovana ny lay faharoa, dia nanao sarona hoditr’ondry miloko mena sy sarona hoditra mafy izy, ka narakony teo amboniny.

²⁰Nisy hazo fisaka namboariny tamin’ny hazo mimôzà, ka natsangany mba hitondra ny fonena-masina.

²¹Nitovy refy ny hazo fisaka rehetra, ka dimy metatra ny lavan’ny tsirairay ary 75 santimetatra ny sakany;

²²nasiana lahiny roa mirazotra isaky ny hazo fisaka.

²³Hazo fisaka roapolo no nataony ho an’ny lafiny atsimo tamin’ny fonena-masina,

²⁴ary nasiana faladia volafotsy efapolo hitondra azy; ka isaky ny hazo fisaka dia faladiany roa avy, izay mifanandrify amin’ny lahiny roa.

²⁵Ho an’ny lafiny avaratra, dia hazo fisaka roapolo koa no nataony,

²⁶niaraka tamin’ny faladia volafotsy efapolo, ka faladiany roa avy isaky ny hazo fisaka.

²⁷Ho an’ny lafiny andrefana izay eo ivohon’ny fonena-masina dia hazo fisaka enina no nataony,

²⁸niampy hazo fisaka roa manokana ho an’ny zorony roa terỳ afara.

²⁹Ireo hazo fisaka roa ireo dia nisy elanelany ara-dalàna teo amin’ny fotony, fa nifanatona tsikelikely kosa ka nikambana teo amin’ny haba iray ihany tany an-dohany. Nataony nitovy izy roa ho hazo fisaka amin’ny zorony.

³⁰Koa ny lafiny ivohon’ny fonena-masina dia nisy hazo fisaka valo sy faladiany volafotsy 16, ka faladia roa avy isaky ny hazo fisaka.

³¹Avy eo dia nanamboarana bara mimôzà ireo hazo fisaka ireo, ka barany dimy nihazona ny hazo fisaka tamin’ny lafiny iray tamin’ny fonena-masina,

³²barany dimy nihazona ny hazo fisaka tamin’ny lafiny iray hafa, ary barany dimy ho an’ireo hazo fisaka tamin’ny lafiny ivoho tao andrefana.

³³Ny barany afovoany dia nampandalovina teo ampisasahan’ny haavon’ny hazo fisaka, ary nataony nahatakatra ny sisiny an-daniny roa amin’ny fonena-masina.

³⁴Norakofany takela-bolamena, na hazo fisaka na ny barany; ary nisy haba volamena notefeny mba hitsofohan’ny barany.

³⁵Mpahay taozavatra no nanao ny efitra lamba iray tamin’ny rongony mafy nifangaro volon’ondry miloko volomparasy sy mena ary jaky, noravahana kerobima vita peta-kofehy tsara.

³⁶Nisy andry efatra namboariny tamin’ny hazo mimôzà, dia norakofany takela-bolamena; ary nahantony tamin’ny fantsika volamena teo ny efitra lamba. Nandrendrehany faladia volafotsy efatra koa ho an’ny andry.

³⁷Ho an’ny fidirana ao an-tranolay dia mpanao peta-kofehy no nanao efitra lamba iray hafa tamina kiran-drongony mafy mifangaro volon’ondry miloko volomparasy sy mena ary jaky.

³⁸Namboarina koa ny andry dimy hitondra ny efitra lamba sy ny fantsika hanantonana azy eo. Ny lohan’ny andry sy ny anjany dia samy norakofana takela-bolamena avokoa; fa natao halimo kosa ny faladiany dimy.