Read DIEM PROTESTANTA Eksôdy 8 Bible Online

Eksôdy 8 - DIEM PROTESTANTA bible

Eksôdy 8

¹Hoy koa ny TOMPO tamin’i Mosesy: — Asaovy ahinjitr’i Aharôna ny tanany mitana ny tehinao ho eny ambonin’ny renirano sy ny lakan-drano ary ny farihy mba hiakaran’ny sahona ho eny amin’ny tany Ejipta.

²Dia nahinjitr’i Aharôna tambonin’ireo rano tao Ejipta ny tanany; ka niakatra sady nandrakotra an’i Ejipta ny sahona.

³Mba nanao toy izany tamin’ny fankatoavany koa ireo mpimasy: nampiakariny ho amin’ny tany Ejipta koa ny sahona.

⁴Dia nampiantso an’i Mosesy sy i Aharôna ny Farao ka nanao taminy hoe: — Mangataha amin’ny TOMPO mba hanesorany ny sahona amiko, dia halefako hanao sorona aminy ny Israelita.

⁵Fa hoy i Mosesy tamin’ny Farao: — Raiso ho voninahitrao ny mametra ny fotoana hangatahako amin’ny Tompo ho anao sy ny mpanomponao ary ny vahoakanao mba hanesorana ny sahona aminao sy amin’ny lapanao, ka tsy hisy havela afa-tsy ny ao Neily ihany.

⁶Dia novalian’ny Farao hoe: — Rahampitso. Hoy kosa i Mosesy hoe: — Aoka àry dia ho araka ny teninao mba hahafantaranao fa tsy misy azo ampitahaina amin’ny TOMPO Andriamanitray.

⁷Hialan’ny sahona ianao sy ny lapanao mbamin’ny mpanomponao ary ny vahoakanao ka tsy hisy havela afa-tsy ny ao Neily ihany.

⁸Dia niala teo anatrehan’ny Farao i Mosesy sy i Aharôna. Ary nitaraina tamin’ny TOMPO i Mosesy momba ireo sahona izay efa namelezany ny Farao;

⁹ka notanterahin’ny TOMPO izay nangatahin’i Mosesy: maty ireo sahona tao an-trano sy teny an-tokotany ary tany an-tsaha.

¹⁰Nangonina ho an-tokotokony maro ireny, ka nanamaimbo ny tany.

¹¹Nony hitan’ny Farao fa nisy hiainana, dia nanamafy fo izy araka izay efa nolazain’ny TOMPO, ka tsy nihaino ny fangatahan’i Mosesy sy i Aharôna.

¹²Ary hoy ny TOMPO tamin’i Mosesy: — Asaovy ahinjitr’i Aharôna ny tehiny hikapohany ny vovo-tany dia ho tonga moka[37] ao amin’ny tany Ejipta manontolo izany.

¹³Dia notanterahin’izy mirahalahy izany: nahinjitr’i Aharôna ny tanany ka nokapohiny tamin’ny tehiny ny vovo-tany; dia nisy moka nandrakotra ny olona sy ny biby fiompy. Ny vovo-tany rehetra dia tonga moka manerana ny tany Ejipta manontolo.

¹⁴Mba nanao toy izany tamin’ny fitokavany koa ireo mpimasy handroaka[38] ny moka, kanefa tsy nahomby, fa mbola nisy moka ihany teny amin’ny olona sy ny biby fiompy.

¹⁵Dia hoy ireo mpimasy tamin’ny Farao: — Herin’Andriamanitra no ao amin’io tehina io[39]! Kanefa ny Farao dia nanamafy ny fony, araka izay efa nolazain’ny TOMPO, ka tsy nihaino ny fangatahan’i Mosesy sy i Aharôna.

¹⁶Hoy ny TOMPO tamin’i Mosesy: — Mifohaza maraina ianao rahampitso, mandehana hiseho eo anatrehan’ny Farao amin’iny izy midina ho eo amoron-drano iny, ka lazao azy hoe: «Izao no andidian’ny TOMPO anao: Alefaso ny vahoakako hanao fanompoam-pivavahana amiko;

¹⁷fa raha tsy avelanao handeha izy, dia handefasako fihitra betsaka eny aminao sy ny mpanomponao sy ny vahoakanao ary any an-dapanao. Ho feno fihitra ny tranon’ny Ejiptianina sy ny tany izay itoerany koa[40].

¹⁸Kanefa, amin’izany andro izany, dia havahako ny faritany Gôsena[41] izay onenan’ny vahoakako ka tsy hisy fihitra mihitsy any. Amin’izay dia ho fantatrao fa Izaho TOMPO dia eo anivon’ny taninao koa.

¹⁹Havahako tsy ho voan’ny loza hanjo ny vahoakanao ny vahoakako. Rahampitso no hiseho izany zava-mahagaga izany.»

²⁰Dia nanao araka izay efa nolazainy tokoa ny Tompo, ka nisy fihitra nivangongo niditra tao an-dapan’ny Farao sy tao an-tranon’ireo tandapany ary manerana an’i Ejipta manontolo. Koa simba ny tany noho ny nataon’ny fihitra.

²¹Nampiantso an’i Mosesy sy i Aharôna ny Farao ka niteny hoe: — Mandehana manatitra sorona amin’ny Andriamanitrareo, kanefa eto amin’ny tany ihany!

²²Fa novalian’i Mosesy hoe: — Tsia, tsy afaka hanao izany izahay satria ny sorona haterinay amin’ny TOMPO Andriamanitray dia fady amin’ny Ejiptianina; koa raha mahita anay hanao sorona toy izany izy ireo, dia hitora-bato anay[42].

²³Fa handeha lalana telo andro any an-taniefitra izahay, ka any izahay no hanao sorona amin’ny TOMPO Andriamanitray araka izay hotondroiny aminay.

²⁴Koa niteny indray ny Farao hoe: — Eny àry, halefako handeha hanao sorona amin’ny TOMPO Andriamanitrareo any an-taniefitra ianareo. Kanefa aza mandeha lavitra loatra ianareo, ary mivavaha ho ahy.

²⁵Dia hoy i Mosesy hoe: — Raha vao miala eto aminao aho, dia hangataka amin’ny TOMPO. Rahampitso ihany dia hoesoriny tsy ho eo aminao sy ny tandapanao ary ny vahoakanao ny fihitra. Fa izao kosa, aoka ianao tsy hamitaka anay intsony ka tsy handefa ny Israelita hanao sorona aminy indray.

²⁶Niala avy tao amin’ny Farao i Mosesy ary nangataka tamin’ny TOMPO.

²⁷Nataon’ny TOMPO izay nangatahin’i Mosesy taminy: nesoriny ny fihitra, ka tsy nisy fihitra tavela intsony na iray aza.

²⁸Kanefa tamin’ity indray mandeha ity koa dia nanamafy fo ihany ny Farao ka tsy nandefa ny Israelita.