Read DIEM PROTESTANTA Jôba 10 Bible Online

Jôba 10 - DIEM PROTESTANTA bible

Jôba 10

¹Koa satria maharikoriko ahy ny fiainana, dia tsy hitana ela intsony ny fitarainako aho fa tezitra anaty ka voatery hiteny.

²Izany no hitenenako amin’Andriamanitra hoe: Aza manameloka ahy, fa ampahafantaro ahy kosa ny alahelonao amiko.

³Mahafaly anao ve ny mampahory ahy ka tsy hiraharaha ny asan’ny tananao, fa homba kosa ny tetiky ny olon-dratsy?

⁴Mijery zavatra tahaka ny fijerinay olombelona azy ve Ianao na manomban-javatra tahaka ny fanombànanay olombelona azy?

⁵Moa fohy tahaka ny anay ve ny fiainanao, ka voafetra ho taona vitsivitsy monja?

⁶Koa nahoana no mitady ny fahadisoako Ianao ary mikatsaka ny fahotako?

⁷Fantatrao tsara ange fa tsy meloka aho, ary tsy misy olona afa-miala eo am-pelatananao.

⁸Ny tananao izay nanao sy namolavola ahy no indro fa mitady hanimba ankehitriny.

⁹Tadidio fa notefenao toy ny fanaka tanimanga aho ary haverinao ho amin’ny vovoka indray.

¹⁰Ianao no namorona ahy tao an-kibon’i neny toy ny famela ronono handry ao anaty tavoara.

¹¹Koa notafinao hoditra sy nofo aho ary norarinao taolana sy hozatra.

¹²Nomenao aina ombàm-pitiavana aho, ka ny fiahianao no niaro ny aiko.

¹³Saingy nisy tsiambaratelo nafeninao ahy, dia izao zavatra fantatro fa tao an-tsainao izao:

¹⁴raha vantany vao nanota aho, dia hahatratra ahy ambodiomby Ianao ka tsy hamela mihitsy ny hadisoako.

¹⁵Koa lozako raha tàhiny ka meloka aho; fa na dia tsy manan-tsiny aza aho, dia tsy ho sahy hiandrandra akory, satria safo-kenatra sady fadiranovana.

¹⁶Raha mba mitraka aho, dia hihaza ahy toy ny liona ianao, ka ny asanao mahatalanjona no hamelezanao ahy indray.

¹⁷Totoafo ny fanafihana ataonao amiko; ataonao avo roa heny ny fahatezeranao amiko, ary tafika mifanontona no mamely ahy.

¹⁸Nahoana no navoakanao tao an-kibon’i neny aho? Toy izay aho mba maty tao tsy nisy mpahita,

¹⁹ka vao niala tao an-kibo dia nentina ho any am-pasana tahaka ny tsy ary akory.

²⁰Fotoana vitsy sisa iainako ankehitriny. Koa atsaharo amin’izay ny famelezanao ahy mba hahazoako maka aina kely,

²¹alohan’ny handehanako tsy hiverina intsony any amin’ny tanin’ny haizina sy alo-pahafatesana;

²²any ny mangiran-dratsy na somambisamby dia toy ny alina izay anjakan’ny alo-pahafatesana sy ny korontana, any ny hazavana dia tahaka ny alina mikitroka.