Read DIEM PROTESTANTA Jôba 11 Bible Online

Jôba 11 - DIEM PROTESTANTA bible

Jôba 11

¹Dia nandray fitenenana i Tsôfara avy any Nahamà ka nanao tamin’i Jôba hoe:

²Tsy mba hovaliana ve ny teny maro toy izany? Tsy hoe be vava manko no manana ny marina!

³Ny rediredinao ve no hampangina ny olona? Ka dia haneso tsy hisy mpanakiana ianao!

⁴Nambaranao aza hoe: «Madio ny teny nalahatro; Andriamanitra no mahita fa tsy manan-tsiny aho».

⁵Fa raha mba nety niteny ahay Andriamanitra ka nanaiky hisoka-bava hamaly anao mivantana,

⁶dia ho nambarany anao ny zava-miafin’ny fahendrena izay tsy takatry ny saintsika olombelona; ary dia hiaiky ianao fa maro ny fahotanao no odian’Andriamanitra tsy hita akory.

⁷Moa azonao takarina ve ny zava-dalina momba an’Andriamanitra na koa azonao fantarina ve ny fahatanterahan’ilay Tsitoha?

⁸Avo tahaka ny lanitra izany, ka hataonao ahoana? Ary lalina noho ny toeran’ny maty izany, ka ho fantatrao ve?

⁹Malalaka noho ny tany izy ary midadasika noho ny ranomasina.

¹⁰Raha sendra mandalo Andriamanitra ka misambotra olo-meloka sy mampanao fitsarana azy, iza no hahasakana Azy amin’izany?

¹¹Fa fantatr’Andriamanitra ny mpamoron-dainga; hitany ny ratsy, na dia tsy tomoriny akory aza.

¹²Amin’izay ny olona tsy ampiampy saina aza dia mety hahazo fahendrena indray na dia toetram-borikidia[30] aza izy fony vao teraka.

¹³Fa ianao kosa, tsy maintsy mitodika amin’Andriamanitra ka manatsotra ny tananao hivavaka aminy.

¹⁴Raha misy heloka eo an-tananao, dia ario lavitra izany; aza avela hanan-toerana eo aminao ny tsy fahamarinana.

¹⁵Koa tsy hanan-tsiny ianao sady hitraka, tsy misy hampihozongozona sy hampahatahotra anao.

¹⁶Fa hohadinoinao ny fahorianao lasa, na toa rano nandalo sisa no hahatsiarovanao azy.

¹⁷Hamirapiratra noho ny mitataovovonana ny andronao; ny haizina hanjary tahaka ny maraim-baovao.

¹⁸Hatoky ianao satria manantena; ka na very laza sy afa-baràka aza dia handry tsy amin’ahiahy ianao.

¹⁹Tsy hisy hanelingelina ny fialan-tsasatrao, fa maro aza no hila sitraka aminao.

²⁰Fa hihajamba kosa ny mason’ny olon-dratsy ka tsy hahita lalan-kivoahana. Ny fialana aina no sisa azony antenaina.