Read DIEM PROTESTANTA Jôba 12 Bible Online

Jôba 12 - DIEM PROTESTANTA bible

Jôba 12

¹Dia namaly i Jôba ka nanao hoe:

²Marina fa ianareo no feon’ny vahoaka; ary dia hiara-maty aminareo ny fahendrena.

³Kanefa mba manan-tsaina toa anareo koa aho ka tsy manaiky ho ambany noho ianareo. Fa iza no tsy mahalala izay lazainareo?

⁴Tonga fihomehezan’ny sakaizako aho raha mba miantso an’Andriamanitra hamaly ahy; eny, ihomehezana ny marina tsy manan-tsiny.

⁵«Ny ory tsy mba rangahy,» hoy ny eson’ireo miadam-pinaritra; fampihatra amin’ny olona lavo.

⁶Miadana ao an-tranony ny jiolahy mpandroba; tsy manana ahiahy ny mpihaika an’Andriamanitra, dia izay tsy mahalala andriamanitra afa-tsy ny heriny.

⁷Mba anontanio ny biby fa hampianatra anao izy, ary ny voro-manidina fa hananatra anao izy.

⁸Mitenena amin’ny tany fa hampahafantatra anao izy, ary ny trondron-dranomasina fa hampahalala anao koa izy.

⁹Iza amin’ireo voaary rehetra ireo no tsy mahalala fa asan’ny tanan’ny TOMPO avokoa ireny!

¹⁰Izy no mitana ny ain’ny voaary rehetra, mbamin’ny fofonain’ny olombelona tsirairay avy.

¹¹«Adidin’ny sofina ny mamantatra ny teny, ary adidin’ny lanilany kosa ny mahatsapa tsiron-kanina», hoy ny filàzan’ny oha-pitenenana.

¹²«Izay anti-panahy manam-pahendrena ary izay ela nihetezana, hono, lava volo.»

¹³Saingy Andriamanitra kosa no tompon’ny fahendrena sy ny fahefana; Azy koa ny tolo-kevitra sy ny fahalalana.

¹⁴Tsy misy mahatsangana izay ravan’Andriamanitra, ary tsy misy mahafaka izay voagadrany.

¹⁵Raha mitana ny orana Izy, dia tonga ny hain-tany; fa raha mandefa ny rano kosa Izy, dia tondraka ny tany.

¹⁶Ao aminy ny hery sy ny fahakingana; samy Azy na ny voafitaka na ny mpamitaka.

¹⁷Ampirediredeny ireo mpanolotsaim-panjakana, ary ataony very saina ny mpitsara.

¹⁸Foanany ny fanamparam-pahefàn’ny mpanjaka, ka tady mahazaka no solom-pehikibony[31].

¹⁹Ampirediredeny koa ny mpisorona, ary aongany izay manam-pahefana.

²⁰Ampangininy ny mpikabary mahay ary esoriny ny fahiratan-tsain’ny anti-panahy.

²¹Fatrarany henatra ireo olona ambony ary ketrahiny ny herin’ny matanjaka.

²²Ahanjahanjany ny zava-miafina tanatin’ny haizina; ary izay tao amin’ny aloky ny fahafatesana dia avoakany ho eo amin’ny mazava.

²³Ampitomboiny ny firenena, nefa aringany avy eo; Avelany hitatra izy, kanjo ataony sesitany indray.

²⁴Vereziny ny sain’ireo mpifehin’ny tany, ka ampirenireneny any an-taniefitra tsy misy lalana;

²⁵any no itsapatsapany anaty haizina mikitroka sy ampivembenan’Andriamanitra azy tahaka ny mamo.