Read DIEM PROTESTANTA Jôba 23 Bible Online

Jôba 23 - DIEM PROTESTANTA bible

Jôba 23

¹Dia namaly i Jôba ka nanao hoe:

²Ankehitriny vao tena mangidy ny fitarainako na dia efa nampanginiko aza ny tolokoko.

³Satriko hofantarina mihitsy izay hahitako an’Andriamanitra! Dia ho nataoko izay hahatongavana hatrany amin’ny toeram-pitsaràny.

⁴Halahatro eo anatrehany ny adiko, ka hataoko be ao am-bavako ireo porofo.

⁵Dia ho fantatro izay teny havaliny ahy, ary ho azoko tsara izay holazainy amiko.

⁶Hiezaka mafy ve Izy hifandahatra amiko? Tsia, fa Izy indrindra no hihaino ahy.

⁷Amin’izay dia olo-mahitsy no hifanazava aminy, ary hanafaka ahy mandrakizay Izy mpitsara ahy.

⁸Nefa raha miantsinanana aho, dia tsy any Izy; ary miankandrefana aho, saingy tsy mahita Azy.

⁹Sahirana any avaratra ve Izy ka tsy tazako, na koa miery any atsimo ka tsy tsikaritro!

¹⁰Na izany aza, fantany tsara ny lalana falehako; fa raha mizaha toetra ahy Izy, dia hivoaka madio toy ny volamena aho.

¹¹Nifikitra tamin’ny sori-dalany ny diako; eny, nizotra ny lalany Aho fa tsy nivilivily.

¹²Tsy nandà izay didy nambarany aho; fa tao am-poko no nitahirizako izay rehetra naloaky ny vavany.

¹³Nefa tokam-pisainana Andriamanitra koa iza no afaka hampiova hevitra Azy? Fa izay voakasany no ataony.

¹⁴Hotanterahiny izay efa nodidiny ho ahy ary koa ny fikasana maro mbola ao aminy.

¹⁵Izany no mampangovitra ahy eo anatrehany; raha mandinika izany aho, dia matahotra Azy.

¹⁶Satria Andriamanitra no nampiketraka ny herim-poko; eny, ilay Tsitoha no nampivarahontsana ahy.

¹⁷Kanefa tsy nangina aho, na dia avy aza ny alina ary na dia nohajambain’ny haizim-pito aza aho.