Read DIEM PROTESTANTA Jôba 24 Bible Online

Jôba 24 - DIEM PROTESTANTA bible

Jôba 24

¹Nahoana no tsy feran’Andriamanitra Tsitoha ny fotoanandro voatendry hitsarany, ka hahitan’ny mpanompony Azy manafay ny ratsy.

²Fa afindran’ny olona ny baorin-taniny; ary biby fiompy nangalarina no andrasany[46].

³Indaosina ny borikin’ny kamboty ary atao antoka ny ombin’ny mpitondratena.

⁴Voatosika ivelan’ny lalana ny mahantra; ka voatery miafina avokoa ny madiniky ny tany.

⁵Indro tahaka ny fiaingan’ny borikidia ho any an-taniefitra no iaingan’ireo mahantra hiasa any an-taninay hahazoany hanina hameloman-janaka.

⁶Eny an-tsahan’ny hafa ireo madinika no voatery hamory vilona ary eny an-tanimboaloboky ny olon-dratsy no voatery hitsimpontsimpona voaloboka.

⁷Mandry miboridana izy amin’ny alina; fa tsy manan-damba hisaronana; tsy mba mirakotra izy raha mangatsiaka.

⁸Kotsan’ny orana any an-tendrombohitra izy, ka mitampifimpify amin’ny vatolampy satria tsy manan-kialofana.

⁹Na dia ny kamboty mbola minono aza dia sarihin’ny olon-dratsy ho mpanompony, ary ataony ho antoky ny mahantra[47].

¹⁰Ampandehanina amin’izao tsy miakanjo ireo sady ampitondraina amboaram-bary nefa noana.

¹¹Ao anaty sahan’ny olon-dratsy izy no manery ôliva hahazoan-menaka sady manosihosy koa ny famiazam-boaloboka saingy tsy afa-misotro divay hialan-ketaheta.

¹²Mitoreo ao an-tanàna ny olona, mitaraindraina ny maratra miala aina, nefa tsy ahoan’Andriamanitra izany.

¹³Ny olon-dratsy no mankahala ny mazava, ka tsy mahalala ny lalany akory na mizatra amin’ny sakeli-dalany.

¹⁴Mifoha vao mangiran-dratsy ny mpandatsaka aina ka mamono ny mahantra sy ny ory, ary lasa mpangalatra rehefa tonga ny alina.

¹⁵Mikendry somambisamby ny mpaka vadin’olona ka manao anakampo hoe: «Tsy misy hahita ahy». Ary dia misaron-tava amin’izay izy.

¹⁶Ao anaty haizina no mamaky trano ny mpangalatra fa mihidy an-trano kosa izy nony antoandro ka tsy mahalala akory ny mazava;

¹⁷ho azy rehetra ireo dia ny alina mahatahotra no maraina satria efa zatra ny alina mahatahotra izy.

¹⁸Fa ianareo kosa milaza hoe «Mitsinkafona entin-drano ny olon-dratsy, voaozon’ny olona ny anjara-taniny eto. Tsy iviliany ny lalana mankany amin’ny tanim-boaloboka[48].

¹⁹Tahaka ny andevonan’ny hafanana sy tanihay ny ranomandry no andevonana ny mpanota any amin’ny fonenan’ny maty.

²⁰Manadino azy ny kibo nifonosany, ary manjary hanim-py ho any’ny olitra izy, ka dia tsy hotsaroana intsony. Eny, tapaka tahaka ny hazo ny faharatsiana.

²¹Nampahory ny momba tsy niteraka izy, ary tsy mba nanisy soa ny mpitondratena.

²²Fa Andriamanitra dia manan-kery hamotika ny matanjaka; Mitroatra Izy ka tsy manampo ho velona intsony ireo.

²³Avelany hatoky tena tanteraka izy, kanefa arahiny maso ny lalan-kalehany.

²⁴Nisandratra vetivety izy, dia tsy hita intsony; Mitolefika toa voninkazo malazo izy, ka tangosana toy ny salohim-bary.»

²⁵Raha tàhiny ka tsy izany no marina, dia iza no sahy hanao ahy ho mpandainga ka haneho fa tsinontsinona izay voalazako?