Read DIEM PROTESTANTA Jôba 27 Bible Online

Jôba 27 - DIEM PROTESTANTA bible

Jôba 27

¹Mbola nanohy ny teniny ihany i Jôba ka nanao hoe:

²Velona Andriamanitra Izay tsy manome rariny ahy, velona ilay Tsitoha Izay mameno ahy fahoriana mangidy ka manao izao fianianana izao aho:

³raha mbola misy koa aina kely ato amiko ary eo am-bavoroko ny fofonain’Andriamanitra,

⁴dia tsy hiteny fitaka ny molotro ary tsy hilaza lainga ny lelako.

⁵Sanatria amiko ny hihevitra fa manana ny marina ianareo! Hizingiziniko mandra-pahafatiko kosa fa tsy manan-tsiny ny tenako.

⁶Hazoniko mafy ny fahamarinako ka tsy havelako hiala: Mandry ny eritreritro ka tsy misy hampahamenatra ahy akory na dia ny amin’ny androko iray monja aza.

⁷Ny anjaran’ny ratsy fanahy anie no ho an’ny fahavaloko! Ary ny anjaran’ny olon-dratsy kosa no ho an’ny mpifanandrina amiko!

⁸Fa hanantena inona ireo tsy mivavaka, raha esorin’Andriamanitra ny ainy?

⁹Hihaino ny fitarainany ve Andriamanitra raha sendra zoim-pahoriana izy?

¹⁰Raha mba nahita fahafinaretana teo anilan’ilay Tsitoha izy, dia ho niantso an’Andriamanitra mandrakariva.

¹¹Hampiseho anareo ny asan-tanan’Andriamanitra aho, ary tsy hanafina ihany koa ny hevitr’ilay Tsitoha.

¹²Satria efa tsapanareo rehetra izany, koa nahoana no miteniteny foana ianareo?

¹³[53]Izao no anjara natokan’Andriamanitra ho an’ny ratsy fanahy sy lova atolotr’ilay Tsitoha ho an’ny olon-dozabe:

¹⁴Na mitombo isa aza ny taranany, dia ho fatin-tsabatra; ary ny zanany tsy hanan-kohanina.

¹⁵Izay sisa velona haripaky ny pesta, ary ny mpitondratenany tsy hitomany azy.

¹⁶Na dia mahangona volafotsy hoatra ny vovoka aza izy ary fitafiana miavosa tahaka ny fotaka,

¹⁷dia aoka izy hanangona; fa ny marina no hiakanjo ny fitafiana ary ny olom-banona no handray ny volafotsy.

¹⁸Mora simba ny trano aorin’ny olon-dratsy[54] fa toy ny kitranotranon’ny mpiandry voly.

¹⁹Mbola manana harembe izy, nony mandry indray maka farany[55]; saingy tsy eo intsony ireny rehefa mihiratra ny masony.

²⁰Mamely azy toy ny riaka ny horohoro, ary indray alina no ipaohan’ny tadio azy.

²¹Indaosin’ny rivotra avy any atsinanana izy, ka ongotany mafy hiala amin’ny toerany.

²²Asian’io rivotra io tsy ananany antra izy ka voatery mandositra ny fisafoahany.

²³Mitehaka noho ny fahavoazany kosa ny olona sady manakora azy nandao fonenana.