Read DIEM PROTESTANTA Jôba 29 Bible Online

Jôba 29 - DIEM PROTESTANTA bible

Jôba 29

¹Dia mbola nandahatra ihany i Jôba ka nanao hoe:

²Iza re no hamerina amiko indray ireny volana taloha izay niainako teo ambany fiarovan’Andriamanitra,

³fony mbola nirehitra teo ambony lohako ny jirony ka ny fahazavàny no nitari-dalana ahy tamin’ny alina?

⁴Tao anatin’ny andro fanambinana aho tamin’izay ary narovan’ny fisakaizan’Andriamanitra ny fonenako,

⁵fony mbola niaraka tamiko ilay Tsitoha ary nanodidina ahy ireo zanakalahiko.

⁶Tamin’izay no nilomanosako tao anatin’ny harena miavosa sy nikorianan’ny diloilo ho ahy avy amin’ny vato famiazana ôliva.

⁷Raha nankeny am-bavahadin’ny tanàna aho ka nandray ny toerako teo an-kianja[61],

⁸dia nahita ahy ny tanora ka nitsoatsoaka, ary ny antitra nitsangana ka nijaridina teo.

⁹Nangina tsy nahateny ny lehibe fa nitampim-bava fotsiny.

¹⁰Tankina koa ny feon’ireo mpanapaka ka toa niraikitra tamin’ny lanilany ny lelany.

¹¹Izay nandre dia nidera ahy; ary izay nahita dia samy nankasitraka.

¹²Satria novonjeko ny mahantra izay nitaraina tamiko ary koa ny kamboty tsy nanan-kianteherana.

¹³Tonga tamiko ny tsodranon’ny miala aina ary dia nampifalifaliako ny fon’ny mpitondratena.

¹⁴Ny fahamarinana no akanjo fanaovako, ny fitandroako ny rariny no ihaingako tahaka ny lamba sy toy ny fehiloha.

¹⁵Nanjary maso ho an’ny jamba aho ary tongotra ho an’ny malemy.

¹⁶Eny efa tonga ray ho an’ny mahantra aho; ary nandray an-tanana ny olan’ireo vahiny.

¹⁷Nomontsaniko ny valanoranon’ny olon-dratsy hanafahako izay voagejan’ny nifiny.

¹⁸Dia hoy aho hoe: «Ato amin’ny akaniko no hialako aina toy ny feniksa[62] ka hahamaro ny androm-piainako indray.

¹⁹Tahaka ny hazo manana faka azon-drano aho, sady manana ny ravin-drantsana izay handrian’ny ando amin’ny alina.

²⁰Hohavaozina tsy tapaka ny voninahitro ary ho toy ny tsipîka voahenjana ny heriko.»

²¹Nihaino ahy tamim-panantenana ny olona, ka samy nangina teo am-pandraisana ny hevitro.

²²Rehefa niteny aho dia tsy nisy namaly intsony, ary nanenika azy tsikelikely ny teniko.

²³Niandry ahy toy ny fiandry ranonorana izy, ary toy ny mitanatana vava miandrandra ny oran-dohataona.

²⁴Raha nisy nila ho ketraky ny hakiviana ireo, dia notolorako tsiky fampaherezana ary tsy nahamaloka ny fahazavan’ny tavako.

²⁵Nitarika azy sy nanoro lalana azy aho, ka nahavatra niara-nitoetra taminy toy ny mpanjaka milasy miaraka amin’ny tafiny na toy ny olona mampionona ny tra-pahoriana.