Read DIEM PROTESTANTA Jôba 30 Bible Online

Jôba 30 - DIEM PROTESTANTA bible

Jôba 30

¹Fa ankehitriny kosa dia mihomehy ahy ireo tanora kokoa noho izaho, dia ny zanak’ireo olona nolaviko tsy ho naman’ny amboa mpiandry ondriko.

²Sady inona moa no azoko andrasana amin’izay olona efa tra-pahosana?

³Anan’ny hanoanana sy ny fahantrana izy ka mitady hohanina any an-tany hay[63] izay faritra mampalahelo sady karankaina.

⁴Mitsongo anan-dia akaiky kirihitra izy ary mivelona amin’ny kifakafakan-javatra.

⁵Voaroakan’ny mpiara-monina ireo karazan’olona ireo sady voakora toy ny mpangalatra,

⁶ka mitady fialofana eny an-tehezan-tevana, any an-dava-johy na any an-dava-bato.

⁷Mivangongo anaty ambiaty izy ka mitrena ao anaty kirihitra.

⁸Karazan’olona adala sy kentrina izy, ka noroahina tamin’ny kapoka mba hiala ny tany nonenany.

⁹Ary dia ny tenako indray ankehitriny no ataon’ny taranak’ireo olona ireo an-kira sady efa tonga ambentin-teniny hatrany.

¹⁰Maharikoriko azy aho ka halaviriny; ary tsy menatra ny mandrora ny tavako izy.

¹¹Fa noketrahin’Andriamanitra aho mba hangaihay, ka nahintsan’ireo olona ireo ny lamboridy izay nihazonako azy.

¹²Faikan’olona no mihahohaho eo ankavanako ka mitady hamingana handavo ahy[64], ary manangana tovon-tany hanatrarany ahy.

¹³Mandrava ny lalan-kalehako ireo, ary samy miady fo hamery ahy ka tsy mila ampiana akory amin’izany.

¹⁴Toy ny fiditra amin’ny fefy banga no fibosesiny anaty korontana hamely ahy.

¹⁵Lasibatry ny fampitahorana aho, ka toy ny rivotra mipaoka ny voninahitro izany; dia nanjavona tahaka ny rahona izay mba fanantenàko handresy.

¹⁶Ankehitriny miempo ato anatiko ny aiko ary mangeja ahy ny androm-pahoriana.

¹⁷Ny alina mikiky ny taolako ho afaka amiko ary ny fanaintainako tsy manam-pitsaharana.

¹⁸Naka an-keriny ny akanjoko Andriamanitra ka manakenda ahy toy ny vozon-dobaka tery.

¹⁹Nazerany tao amin’ny fotaka aho ka naetriny toy ny vovoka aman-davenona.

²⁰Miantso Anao aho, Andriamanitra ô, nefa tsy valianao akory; mitsangana hivavaka eo anoloanao aho, nefa dia jerenao fotsiny.

²¹Tonga masiaka amiko Ianao ka mandrafy ahy amin’ny herinao.

²²Avelanao hindaosin’ny rivotra aho ka atambolimbolin’ny tafiotra mahery.

²³Eny, fantatro fa hoentinao any amin’ny fahafatesana aho, dia any amin’ilay fonenana ifamotoanan’ny olombelona rehetra.

²⁴Kanefa nahoana Ianao no hanainga tanana hamely izay efa mila ho trotraka, dia ny olona tra-pahoriana ka miantsoantso vonjy?

²⁵Izaho kosa tsy efa nitomany ireo niangaran’ny vintana ve aho ary tsy efa nangoraka ny mahantra?

²⁶Saingy mba niandrandra hasambarana aho, kanjo sendra ny fahoriana; ary mba nanantena ny mazava aho, kanjo sendra ny haizina.

²⁷Tsy mitsaha-mandevilevy ny tsinaiko; androm-pahoriana no mianjady amiko.

²⁸Mandeha amim-pisaonana aho; tsy misy masoandro mihiratra ho ahy. Vory vahoaka no hitsanganako mba hiantsoantsoako vonjy.

²⁹Ka tonga naman’ny amboadia aho ary tonga zandrin’ny aositritsy amin’izato feoko mampahonena.

³⁰Mihamainty ny hoditro sady miempaka. Mahamay sy mainan’ny tazo ireo taolako.

³¹Dia feo mitoreo no ataon’ny lokangako[65] ary feo mitomany no avoakan’ny sodiko.