Read DIEM PROTESTANTA Jôba 37 Bible Online

Jôba 37 - DIEM PROTESTANTA bible

Jôba 37

¹Mipararetra ny foko eo am-pahitana izany, ka mitepotepo mila hiala amin’ny toerany.

²Henoy, henoy ny fidoboky ny feon’Andriamanitra ary ny firohondrohona avoaky ny vavany.

³Mamakivaky ny lanitra manontolo ny tselany ka tonga hatrany am-paran’ny tany.

⁴Aorian’izany dia re ny feon’Andriamanitra mirohondrohona amin-kery lehibe; koa mandritra ny andrenesana izany feony izany, dia avelany hipariaka ny tselatra

⁵Mirohondrohona ny feon’Andriamanitra ka mahatalanjona fatratra, satria tsy takatry ny saintsika ireo zavatra goavana vitany.

⁶Fa ny ranomandry baikoiny hoe: «Milatsahà amin’ny tany». Izany koa no ataony amin’ny orana, dia amin’ny oram-be mivatravatra.

⁷Aatony ny asan’ny olona tsirairay avy mba hieken’ny olombelona rehetra ny zavatra vitan’Andriamanitra.

⁸Ary na ny biby aza dia miditra ao am-ponenany ka mamitsaka ao amin’ny toeram-piereny.

⁹Tonga avy any atsimo ny rivo-doza ary avy any avaratra ny hatsiaka.

¹⁰Ny fofonain’Andriamanitra no mampisy ny ranomandry ka mampivaingana ny velaran-drano.

¹¹Dia vesarany etona mando ny raho-matevina ka aeliny etsy sy eroa ombàn-tselatra.

¹²Andriamanitra no mampihodinkodina azy mba hahatanteraka, araka ny fikasany, izay rehetra nandidiany azy eran’izao tontolo izao.

¹³Izany no ataon’Andriamanitra mitranga na hamaizana ny tany, na hanambinana azy.

¹⁴Anongilano sofina izao lazaiko izao, ry Jôba. Miatoa kely aloha ka diniho ny zava-mahagaga ataon’Andriamanitra.

¹⁵Fantatrao ve ny fibaikoan’Andriamanitra ireny sy ny mahatonga ny tselatra eny amin’ny rahona?

¹⁶Fantatrao koa ve ny mampihevaheva ny raho-matevina? Ny manao ireny zava-mahagaga ireny dia Ilay tanteraka amin’ny fahalalana;

¹⁷Ianao kosa dia mafana loatra anaty fitafianao, rehefa vesaran’ny andro migaingaina ny tany noho ny rivotra manempotra avy any atsimo.

¹⁸Afaka nanampy an’Andriamanitra ve ianao, fony Izy nanefy ny habakabaka sy nahamafy izany toa fitara-by?

¹⁹Mba ampianaro anay ireto àry, ry Jôba, izay holazainay amin’Andriamanitra. Fa tsy hitanay izay hotenenina noho ny haizin’ny tsy fahalalanay.

²⁰Tsy hangataka ny hiteny aminy aho; sa maniry ny hataony levona ve ny tenako?

²¹Tampotampoka teo dia tsy hita ny fahazavana fa voatakon-drahona ny masoandro. Avy eo dia nisy rivotra nitsoka sy nampisava izany rahona izany.

²²Tara-bolamena no nipoitra avy any avaratra, ary famirapiratana mahatahotra no indro manodidina an’Andriamanitra.

²³Izy no ilay Tsitoha tsy haintsika akaikezina, sady lehibe amin’ny hery ananany; fatra-pitandro ny rariny sy ny fahamarinana Izy ka tsy mba mampahory ny olona.

²⁴Koa izany no tokony hanajana an’Andriamanitra; fa tsy jereny kosa izay mihambo ho hendry.