Read DIEM PROTESTANTA Jôba 38 Bible Online

Jôba 38 - DIEM PROTESTANTA bible

Jôba 38

¹Avy ao anaty tafio-drivotra ny TOMPO no namaly an’i Jôba ka nanao hoe:

²Zovy moa ianao no sahy maneso ny fikasàko amin’ireo teny foana tsisy dikany?

³Misikîna àry ho tena lehilahy, fa hanontany anao Aho ka hovalianao.

⁴Taiza moa ianao fony Aho nanorina ny tany? ambarao Ahy raha manam-pahalalana tokoa ianao.

⁵Iza no nametra ny refiny raha hainao? Ary iza no nanenjana izay andrefesana azy?

⁶Amin’inona no ipetrahan’ny andry mitondra azy? Ary zovy no nametraka ny vato fehizorony,

⁷raha niara-nihira ny kintan’ny maraina ary nihoby avokoa ireo anjelin’Andriamanitra?

⁸Iza no nanidy varavarana tsy hihoaran’ny ranomasina, raha nifantsitsitra nivoaka avy tamin’ny lalina izy?

⁹Dia nampitafiako rahona ny ranomasina ary nofonosiko zavona matevina.

¹⁰Namoaka didy aho hamerako ny fitroarany ary nanisy varavarana mihidy teo anoloany

¹¹sady niteny taminy hoe: «Hatreto ihany fa tsy mahazo mihoatra; eto no hifarana ny fisafoaky ny onjanao[85]!»

¹²Indray maka teo amin’ny androm-piainanao mba efa nibaiko ny hisian’ny maraina ve ianao? Efa notondroinao toerana ve ny mazava atsinanana

¹³mba handraisany ny tany amin’ny sisiny ka hakopany hihintsanan’ny olon-dratsy[86]?

¹⁴Koa amin’izay ny tany dia hiseho endrika tahaka ny tanimanga voatombokase[87], ary miloko tahaka ny lamba misoratsoratra.

¹⁵Nefa hoesorina amin’ny olon-dratsy ny fahazavàny[88] ary hotapahina izay sandry miainga hamely olona.

¹⁶Efa tonga tany an-doharanon-dranomasina ve ianao na efa nandehandeha tany amin’ny fanambanin’ny lalina?

¹⁷Efa naseho anao ve ny vavahadin’ny fahafatesana, ka nahazoanao nahita ny fidirana mankao amin’ny sehatra maizin’ny fahafatesana?

¹⁸Efa voadinikao ve ny fidadasiky ny velaran-tany? Valio aho raha toa hainao izany rehetra izany.

¹⁹Aiza àry no lalana mankany amin’ny fonenan’ny mazava? Ary aiza koa no toerana misy ny haizina,

²⁰mba hitondranao azy any amin’ny faritra ka hahafantaranao ny sakeli-dalana ho any an-tranony?

²¹Tokony ho fantatrao tsara izany satria efa teraka ianao tamin’izay ary marobe ny isan’ny androm-piainanao!

²²Efa notsidihinao ve ny fitehirizana ny orampanala ary efa hitanao ve ny fanangonana ny havandra,

²³fa voatahiriko ho amin’ny androm-pahoriana ireo, dia ny andro ifamelezana sy iadiana[89].

²⁴Aiza moa ny lalana ipariahan’ny fahazavana, ary ny toerana iaingan’ny rivotra avy atsinanana mba hielezany etỳ ambonin’ny tany?

²⁵Iza no nihady lalan-drano hikorianan’ny oram-be sy nanoritra ny lalan’ny varatra mikotrokotroka?

²⁶Iza no nampisy orana amin’ny tany foana, sy amin’ny taniefitra tsy misy olona,

²⁷mba hahavonto rano ny tany karankaina ka hampaniry ny ahi-maitso vao mitsimoka?

²⁸Manan-dray ve ny ranonorana? Ary iza no niteraka ny ranonando mitete?

²⁹Kibon’iza no nivoahan’ny ranomandry ary iza no niteraka ny fanàlan’ny lanitra,

³⁰ka mahatonga ny rano hihamafy toy ny vato ary mahatonga ny velaran-dranomasina handry?

³¹Moa ve ianao mahafatotra mitambatra ny vondron-kintana Ikotokelimiadilaona, na mahavaha ireo tady mamehy ny vondron-kintana Telonohorefy,

³²na mampitranga ny andian-kintana ara-potoana, na koa mahatarika ny vondron-kintana Orsa lehibe mbamin’ny vondron-kintana zanany Orsa kely[90]?

³³Mahalala ireo lalàna mifehy ny lanitra ve ianao ary mandrindra ny fiantraikany amin’ny tany?

³⁴Ampy hampitosaka ny ranobe aminao ve ny fanandratanao baiko amin’ny rahona?

³⁵Ianao ve no mahay mandefa ny tselatra ka hilazany aminao hoe: «Indreto izahay»?

³⁶Iza no milaza amin’ny vorona ibisy fa hiakatra ny ony Neily? Iza no mampahalala ny akoholahy fa ho avy ny orana[91]?

³⁷Iza no manam-pahaizana mahaisa ny rahona? Iza no mampitotongana ireo siniben-drano any an-danitra, hampitosaka ranonorana mivatravatra

³⁸ka hanambatra ny vovo-tany ho tonga fotaka ary hampiraikidraikitra ny bainga vonton-drano?

³⁹Ianao va no mihaza remby ho an’ny liom-bavy[92] na mahavoky ny zana-diona noana,

⁴⁰raha mamitsaka ao an-davany izy na manotrika anaty kirihitra?

⁴¹Iza no mikarakara ny hanin’ny goaika raha mitaraina amin’Andriamanitra ny zanany ka mirenireny tsy mahita hanina?