Read DIEM PROTESTANTA Jôba 39 Bible Online

Jôba 39 - DIEM PROTESTANTA bible

Jôba 39

¹Fantatrao ve ny fotoana fiterahan’ny osidia? voadinikao ve ny diera vavy raha miteraka?

²Firy volana no itondrany vohoka raha voaisanao, ary fantatrao ve ny fotoana fiterahany?

³Mitorovoka izy mandatsaka ny zanany sady mampisinda ny fanaintainany.

⁴Any an-kodahoda any ireo zanany ireo no mihamatanjaka sy mihalehibe ka lasa tsy miverina intsony.

⁵Iza no nandefa ny borikidia hikarenjy? Zovy no namaha fatorana azy handeha?

⁶Fa efa nomeko ho fitoerany ny tany hay, ary ho fonenany kosa ny tanin-tsira.

⁷Tsy raharahainy ny tabataba ao an-tanàna ary tsy mba reny na oviana na oviana ny fitrerotreron’olona mpampiasa.

⁸Ny tendrombohitra fitetiny no fihinanany, ka rehefa ahi-maitso dia katsahiny avokoa.

⁹Hanaiky hanompo anao ve ny ombimanga ka handry ao am-pahitrao amin’ny alina?

¹⁰Voafolakao hiasa ny sahanao ve izy sy hitarika hersa eny an-dohasaha?

¹¹Hatoky azy noho ny tanjany ve ianao ka hamela ny asanao hovitainy?

¹²Hiantehitra aminy hampiditra ny vokatrao sy hanangona izany am-pamoloana ve ianao?

¹³Faly mikopakopaka elatra ny ôtrisy; kanefa tsy mampalemy fanahy azy toy ny vano na ny elany na ny volo malefaka ananany.

¹⁴Fa raha mandao ny atodiny amin’ny tany izy ka mamela azy hokotrehin’ny fasika mafana,

¹⁵dia tsy ahiny mety hisy mpanitsaka ireo na mety ho voahosihosin’ny bibidia.

¹⁶Reny mafy fo amin-janaka ny ôtrisy, fa ataony hoatra ny tsy azy akory ireo; na dia very maina izay nisasarany, dia tsy mampaninona azy mihitsy izany.

¹⁷Fa tsy mba nataoko manam-pahendrena izy ary tsy mba nomeko anjara fahaizana.

¹⁸Kanefa raha vao mitraka sy miainga hihazakazaka izy, dia tsy mahomby azy ny soavaly sy ny mpitaingina.

¹⁹Ianao ve no mampahatanjaka ny soavaly na manafy vombo mihofahofa ny vozony

²⁰na mampifalihavanja azy toa valala? Mampihorohoro ny fihiakany sahisahy!

²¹Mihehy ao an-dohasaha izy ary mientan-kafaliana asesiky ny heriny ka mitroatra hisedra fiadiana.

²²Tsy mampiraika azy ny tahotra ka tsy mivadi-po izy ary tsy ny sabatra no hampihemotra azy.

²³Mikorintsana eo an-damosiny ny tranon-jana-tsipîka; manjelanjelatra kosa ny lefona sy ny sabatra.

²⁴Mihoalahoalam-pahavinirana izy ka lasa miriotra sady tsy tana rehefa maneno ny anjomara.

²⁵Mihiaka izy raha vao mahare ny anjomara, ary eny lavitra eny no anamboloany ny ady sy ny treron’ny manamboninahitra ary ny akoran’ady.

²⁶Fahaizanao ve no mampanidina ny papango rehefa mamelatra ny elany hianatsimo izy?

²⁷Baikonao ve no iakaran’ny voromahery sy anaovany akany eny an-tendrombohitra?

²⁸Ny haram-bato no onenany sy itoerany dia ny tendrony maranitra tsy hay anihina.

²⁹Avy eny no itiliany ny remby fa mahatazan-davitra ny masony.

³⁰Mitsentsi-dra aoka izany ireo zanany; ka na aiza na aiza itoeran’ny faty, dia ifamotoanan’ny voromahery[93].