Read DIEM PROTESTANTA Jôba 40 Bible Online

Jôba 40 - DIEM PROTESTANTA bible

Jôba 40

¹Dia nanontany an’i Jôba ny Tompo ka nanao hoe:

²Izaho Andriamanitra Tsitoha no niadianao sy nifandiranao, ry Jôba. Raha mbola hitsikera Ahy ianao, dia valio izay rehetra voalazako izay?

³Fa namaly ny Tompo i Jôba ka nanao hoe:

⁴Tsinontsinona aho ka tsy manan-kavaly Anao. Hitampim-bava no ataoko izao.

⁵Efa sahy niteny matetika aho, ka tsy hamaly intsony, fa aoka izay.

⁶Avy ao anaty tafio-drivotra ny Tompo no namaly an’i Jôba ka nanao hoe:

⁷Misikîna àry ho tena lehilahy, fa hanontany anao Aho ka valio.

⁸Sahinao lavina tokoa ve ny fitsaràko ka Izaho no diso fa ianao no marina?

⁹Manan-kery tahaka Ahy ve ianao na mitalakotro-peo tahaka Ahy?

¹⁰Koa miravaha voninahitra sy fahalehibeazana ary mitafia famirapiratana sy fiandrianana[94].

¹¹Fijery mitsipalotra no amafazo ny fahatezeranao misamboaravoara dia ampietreo ny mpiavonavona rehetra.

¹²Eny, fijery mitsipalotra no anongany an’ireo mpiavonavona rehetra; ary eo amin’ny toerany eo ihany no ataovy montsana ny olon-dratsy.

¹³Asitriho ao amin’ny tany miaraka izy rehetra ary hidio ao amin’ny tranomaizim-pahafatesana.

¹⁴Fa Izaho mihitsy no hiarahaba anao satria ny herinao no nampandresy anao.

¹⁵Jereo ange ny lalomena fa samy noarîko na izy na ianao! Mihinana ahitra tahaka ny omby izy;

¹⁶kanefa jereo ity hery ananany eo an-tehezany ary koa ity tanjany eo amin’ny hoza-kibony.

¹⁷Henjaniny toa hazo sedera ny rambony; mifaniditra eo amin’ny feny kosa ny hozabe.

¹⁸Ny taolany dia mafy toa fantsom-barahina ary ny taolan-tehezany dia miendrika baravy.

¹⁹Anisan’ny sangan’asako izy ka Izaho Andriamanitra nanao azy no nanome sabatra azy.

²⁰Mamoka-bilona ho an’ny lalomena ireo havoana izay filalaovan’ny bibidia rehetra.

²¹Mandry anaty kirihitra feno tsilo izy ary miafina anaty zozoro eny an-keniheny.

²²Manalokaloka azy ny kirihitra ary manarona azy ny hazomalahelo eny amoron’ny ranon-driaka eny.

²³Fa na dia misafoaka aza ny onjan-drano dia tsy mba mihetsika akory ny lalomena; tsy mampiraika azy akory i Jôrdàna na dia mitroatra hatreny am-bavany aza.

²⁴Fa iza moa no hahasambotra azy ka hanapotsitra ny masony? Iza moa no hahavoafandrika azy ka hahaketoka ny orony?

²⁵Mahajono ny voay[95] amin’ny fintana va ianao na mahafatotra ny lelany amin’ny tadim-pintana?

²⁶Mahatsofoka harefo amin’ny orony va ianao na mahagorobaka ny valanoranony amim-parango?

²⁷Hifon-jato hifona arivo aminao va izy na hanambitamby anao amin’ny teny mamy?

²⁸Hanao fifanekena aminao ve izy ka ho azonao andevozina mandra-pahafatiny?

²⁹Hilalao azy toy ny filalao voronkely ve ianao ka hamatotra azy ho fialambolin’ny zanakavavinao?

³⁰Hikambana hivarotra ny voay ve ny mpanjono ka hitsinjara azy amin’ny mpivarotra?

³¹Mahaloadoaka ny hodiny amin’ny tsilo ve ianao na mahatrobaka ny lohany amin’ny firombaka?

³²Fa kasiho tanana ange izy dia hotsaroanao ny ady taminy ary tsy hanindroa intsony ianao.