Read DIEM PROTESTANTA Jôba 5 Bible Online

Jôba 5 - DIEM PROTESTANTA bible

Jôba 5

¹Miantsoa ange raha misy hamaly anao e! Ary iza amin’ny anjely masina no hitodihanao?

²Fa ho voakikin’ny fahasosorany ny adala; ary ho fatin’ny fahatezerany ny ketrina.

³Marina tokoa fa efa nahita adala nambinina aho, nefa avy hatrany no nanozonako ny tranony hoe:

⁴«Ho lavi-pamonjena anie ny zanany, ka hohelohina tsisy mpiaro amin’ny fitsarana!

⁵Fa ny noana anie no hihinana izay nojinjainy; ka halainy izany na dia voafefy tsilo aza; ary ny sahirana anie no ho tompon’ny hareny!»

⁶Fa tsy avy amin’ny tany akory no ivoahan’ny tsy fahamarinana na itsimohan’ny fahoriana.

⁷Kanefa nateraka ho ory ny olombelona, ary ny pitik’afo kosa natao hanidina miakatra[12].

⁸Raha izaho ianao dia Andriamanitra no hanontaniako; ary Andriamanitra no hilazako ny momba ahy.

⁹Lehibe tsy takatry ny saina ny zavatra ataony, dia zava-mahagaga tsy hay visavisaina.

¹⁰Izy no mampilatsaka ny orana ambonin’ny tany ary mampandeha ny renirano hanondraka ny saha.

¹¹Manandratra ny ambany ho amin’ny avo Izy; ary ny malahelo dia ampiany hitraka.

¹²Izy no mampandamoka ny tetiky ny fetsy ratsy, ka ho tsinontsinona izay asan’ny tanany.

¹³Ny hafetsen’ny hendry ihany no amandrihany azy[13], ary ataony maty momoka ny tolo-tsainy.

¹⁴Tojo ny haizina amin’ny andro antoandro izy; ka dia amin’ny mitataovovonana, no iraparapany toy ny amin’ny alina.

¹⁵Nefa vonjen’Andriamanitra ny ketraka mba tsy hianjadian’ny sabatra[14], ary ny mahantra mba tsy ho azon’ny mahery;

¹⁶mamelom-panantenana ny osa izany, ary mampikombom-bava ny ratsy fanahy.

¹⁷Fa sambatra ny olona izay anarin’Andriamanitra! Koa aza hamaivanina, ry Jôba, ny famaizan’ilay Tsitoha[15].

¹⁸Fa Andriamanitra dia mety mampijaly, raha mitsabo fery; ary ny tànany dia mety mandratra, raha manasitrana[16].

¹⁹Hamonjy anao amin’ny fahoriana matetika Izy; ka amin’ny farany tsy hahavoa anao intsony ny loza.

²⁰Tsy hamela anao ho faty Izy, raha avy ny mosary; harovany tsy ho voan’ny sabatra ianao, raha avy ny ady.

²¹Ho voaaro amin’ny endrikendrika ianao, ka tsy hatahotra raha tonga ny antambo.

²²Hihomehezanao fotsiny ny mosary aman’antambo, ary tsy hatahoranao izay bibidia.

²³Ho vita fanekempihavanana mirindra ianao amin’ny vato eny an-tsaha sy amin’ny bibidia,

²⁴hiadam-pinaritra ao amin’ny fonenanao, ary hahita ny ondrinao tsy misy very rehefa tonga hisafo azy any an-kijàna.

²⁵Ho hitanao hihamaro koa ny zanakao; ary ny taranakao dia hihabetsaka tahaka ny ahitra eny an-tsaha.

²⁶Ho tratra antitra nefa havitrika ianao ambara-piditrao any am-pasana, dia ho tahaka ny amboaram-bary izay akarina ho antontany amin’ny fotoam-pararano.

²⁷Izany no izy rehefa nodinihinay, ry Jôba, koa ankatoavy sy ekeo hahasoa anao.