Read DIEM PROTESTANTA Jôba 6 Bible Online

Jôba 6 - DIEM PROTESTANTA bible

Jôba 6

¹Dia namaly i Jôba ka nanao hoe:

²Raha mba azo nolanjaina ny fahasosorako ka natao teo ambony mizana miaraka amin’ny fahoriako,

³dia ho navesatra noho ny fasi-dranomasina; Izany no nahatonga ahy hiteniteny foana.

⁴Fa mitsatoka amiko ny zana-tsipîkan’ny ilay Tsitoha, ka miely amin’ny tenako ny poiziny. Ary alahatr’Andriamanitra hamely ahy izay rehetra mety ho fampitahorana.

⁵Maneno ve ny borikidia, raha eo anoloan’ny ahi-maitso? Ary mimàma ve ny omby, raha mihinam-bilona?

⁶Azo hanina tsy misy sira ve ny sakafo matsatso? Ahitan-tsirony ve ny tapotsin’atody manta?

⁷Tsy mahatelina ireo ny tendako, satria sakafo maharikoriko ahy,

⁸Enga anie ka ho to ny faniriako ary hotanterahin’Andriamanitra ny fanantenako!

⁹Ho sitrak’Andriamanitra anie ny hanorotoro ahy; hoesoiny anie ilay tànam-piarovany mba hanaperany ny aiko.

¹⁰Hibita-kafaliana aho na dia omba-ngirifiry mazana aza ary hahita fiononana ahay amin’ny hoe: tsy mba nandika ny didin’Andriamanitra masina.

¹¹Fa tsy manan-kery azoko antenaina aho; inona intsony no mbola iaretako, raha tsy misy tanjona iafarako!

¹²Moa vato ve aho ka hahatanty ny zava-drehetra? Moa mafy toy ny varahina ve ny tenako?

¹³Foana ilay fanampiana mba nandrandrain’ny tenako, fa nesorina tamiko izay mety ho famonjena ahy.

¹⁴Tokony hiantran-tsakaiza ny olona efa ketraka, fandrao tsy hifikitra intsony amin’Andriamanitra Tsitoha izy.

¹⁵Nanodoka ahy toy ny ranotrambo ny rahalahiko, dia tahaka ny mason-dranon-driaka malaky ritra,

¹⁶itosahan’ny rano matromatroka ny riaka, rehefa miempo ny ranomandry sy oram-panala any erà.

¹⁷Fa nony tonga ny hafanambe, dia ritra ireny ranon-driaka ireny; ary nony midanika ny masoandro, dia manjavona ho azy am-pitoerana izy.

¹⁸Izany no mampivily lalana ny andia-mpifindralasy, ka irosoany any an-taniefitra sy mahavery azy.

¹⁹Na andia-mpifindralasy avy any Temà na andia-mpandranto avy any Sebà[17] dia samy mitazana ny riaka ary samy manantena azy.

²⁰Diso fanantenana ireo satria samy nanampo, kanjo nangaihay nony tonga teo.

²¹Efa toy izany ianareo izao ho an’ity sakaizanareo; hitanareo ny fahavoazako ka dia natahotra ianareo.

²²Efa nangata-panomezana taminareo ve aho na niangavy hahafoizanareo ampaham-pananana,

²³mba hamonjena ahy amin’ny tanan’ny fahavalo sy hanafaka ahy amin’ny vahohon’ny mpampahory?

²⁴Ampianaro aho fa vonona ny hangina ary ampahafantaro ahy ny nahadisoako.

²⁵Ny teny marina tsy mba mandratra; fa mba inona izay fanomezan-tsiny ataonareo?

²⁶Hanome tsiny ahy noho ny teniko ve ianareo? Kanefa natao hoentin-drivotra ireny tenin’olona mamoy fo ireny.

²⁷Ny kamboty aza moa ataonareo antoka loka; ary sahinareo amidy hatramin’ny sakaizanareo.

²⁸Ankehitriny mba meteza hijery ahy kely hahitanareo fa tsy mandainga aho akory.

²⁹Diniho indray ange ka aza mitsara tsy marina e! Eny, diniho indray fa hiharihary ny fahamarinako.

³⁰Misy fitaka ve izay nolazaiko? Sa izaho no tsy mahay manavaka ny ratsy?