Read DIEM PROTESTANTA Salamo 101 Bible Online

Salamo 101 - DIEM PROTESTANTA bible

Salamo 101

¹Salamo nataon’i Davida. TOMPO ô, firaiketam-po aminao sy rariny ho an’ny vahoaka no zavatra tiako hokaloina: izany no hankalazako Anao an-kira.

²Hiezaka hiroso amin’ny fahitsiana aho, ka rahoviana no hankatỳ amiko Ianao? Amin-kitsim-po no hiainako ao amin’ny lapam-panjakàko.

³Tsy hahatanty zava-dratsy aho; halako ny mivadika finoana, tsy mba hahazo ahy izany.

⁴Halaviriko ny haloto fo, tsisy antony amiko ny olon-dratsy.

⁵Hofongorako ny mpanaratsy namana amin’ny takona fa tsy zakako ny mpiandranandrana miavona am-po.

⁶Hojereko izay olo-mahatoky eto amin’ny tany sy ny fanjakana mba hametrahako azy eo anilako; izay mizotra amin’ny fahitsiana no ho tonga mpanampy ahy.

⁷Tsy hitoetra ao amin’ny lapam-panjakàko ny olona mpametsifetsy; ary tsy hijanona eo anilako ny mpanao teny mandrobo.

⁸Hataoko fongotra isa-maraina ny olon-dratsy rehetra eto amin’ny tany sy ny fanjakana mba ho foana avokoa ny mpanao ratsy ao amin’ny tanànan’ny TOMPO.