Read DIEM PROTESTANTA Salamo 105 Bible Online

Salamo 105 - DIEM PROTESTANTA bible

Salamo 105

¹Miderà ny TOMPO ianareo: ataovy antso avo ny lazany, ampahafantaro ny firenen-kafa ny asany lehibe.

²Mihirà ho Azy ary mankalazà Azy amin-java-maneno; tantarao ny asa mahagaga rehetra nataony.

³Ireharehao ny anarany masina; ianareo mitady ny TOMPO, aoka ho ravo ny fonareo!

⁴Katsaho ny TOMPO mahery, tadiavo lalandava ny fanatrehany.

⁵Tsarovy ny asa mahagaga nataony, dia ny zava-mahatalanjona vitany sy ny didim-pitsarana navoakany,

⁶ry taranak’i Abrahama mpanompony sady terak’i Jakôba voafidiny.

⁷Izy no TOMPO Andriamanitsika; manerana ny tany tontolo ny fanapahany.

⁸Tsaroany hatrany ny fanekempihavanany, dia ny fampanantenana izay napetrany ho an’ny taranaka arivo mifandimby[243]:

⁹fanekempihavanana nataony tamin’i Abrahama[244] sy fianianana nataony tamin’i Itsehàka[245].

¹⁰Naoriny ho zo raikitra ho an’i Jakôba izany ka ho fanekempihavanana mandrakizay ho an’ny taranak’i Israely,

¹¹fony Andriamanitra nilaza hoe: «Homeko anao ny tany Kanahàna ho anjara lova ho anao sy ny taranakao[246].»

¹²Tamin’izay izy ireo mbola mora isaina, mpifindra monina vitsy kely teo amin’ny tany[247].

¹³Nivezivezy nitety firenena maro izy, ka niala tamin’ny fanjakana iray hankany amin’ny vahoaka hafa.

¹⁴Nefa tsy nisy navelan’Andriamanitra hampahory azy fa nampitandrina mpanjaka Izy noho ny amin’ireo hoe:

¹⁵«Aza kasihina ireo voahosotro ary aza asian-dratsy ireo mpitondra hafatro[248].»

¹⁶Niantso mosary[249] ho amin’ny tany Izy ka nanafoana ny sakafo rehetra.

¹⁷Nefa naniraka olona hialoha an’ireo Izy, dia i Jôsefa izay namidy handevozina[250].

¹⁸Nogiazana tady ny tongony ary norohizana rojo vy ny vozony[251],

¹⁹mandra-pahatanterahan’ny zavatra nambarany; ny tenin’ny TOMPO no naneho azy ho tsy manan-tsiny[252]!

²⁰Nanome baiko hamahàna azy ny mpanjaka; eny, nampanafaka azy ny mpifehy vahoaka[253].

²¹Notendreny ho lehiben’ny fitondram-panjakana izy sy ho mpanapaka ny taniny manontolo[254],

²²mba hisarika ny andriambaventy hanaraka ny heviny sy hanolo-pahendrena an’ireo loholom-bahoaka.

²³Taorian’izany, dia tonga tany Ejipta i Jakôba mianakavy[255] ary nifindra monina tao amin’ny tanin’i Hama[256].

²⁴Nohamaroin’Andriamanitra tokoa ny vahoakany ary nataony mahery noho ny mpampahory azy.

²⁵Ny fon’ireo Ejiptianina novany hankahala ny vahoakany sy hanao kendry tohina amin’ireo mpanompony[257].

²⁶Kanjo nirahiny i Mosesy mpanompony sy i Aharôna ilay voafidiny[258]:

²⁷Izy roa lahy no naneho teo amin’ny Ejiptianina ireo famantarana nambaran’ny Tompo mialoha ary nahavita zava-mahagaga teo amin’ny tanin’i Hama.

²⁸Dia nahatonga haizim-pito Andriamanitra ka nanjary maizina izany tany izany ary tsy nisy nahatohitra ny teniny[259].

²⁹Novany ho ra ny oniny ka maty avokoa ny trondrony[260];

³⁰nataony feno sahona ny tanin’ny Ejiptianina hatrany amin’ny efitranon’ny mpanjakany[261].

³¹Niteny Andriamanitra, dia tonga ny fihitra sy moka nihanaka tamin’ny faritany manontolo[262].

³²Havandra no narotsany ho solon’ny orana ary koa varatra izay nandoro ny tanetiny.

³³Nosimbany ny voalobony sy ny aviaviny ary nopotehiny ny hazo tamin’ny faritaniny[263].

³⁴Niteny Izy, dia tonga ny valala sy ny kijeja tsy hita isa

³⁵ka nihinana ny ahitra rehetra an-tanety sy nihinana ny vokatr’ireo tanimboliny[264].

³⁶Novonoin’Andriamanitra ho faty avokoa ny lahimatoa rehetra tamin’io tany io, dia ireo santatry ny hery tamin’ny ankohonana ejiptianina[265].

³⁷Fa navoakany kosa ilay vahoakany nombàn’ny volafotsy sy volamena[266]; ka tsy nisy tamin’ireo fokony izay hoe narisarisa na iray aza.

³⁸Ravoravo ny Ejiptianina rehefa niala ny Israelita, satria efa nianjadian’ny tahotra azy loatra[267].

³⁹Dia novelarin’Andriamanitra ny rahona hanalokaloka ny vahoakany, ary najorony koa ny afo hanazava azy nony alina[268].

⁴⁰Nangataka ireo, dia nandefasany papelika; ary mofo avy any an-danitra no namokisany azy[269].

⁴¹Nosokafany ny vatolampy, dia nigororoana ny rano ka zary renirano nizotra teny an-tany hay[270].

⁴²Eny, tsaroan’Andriamanitra ny teniny masina nataony tamin’i Abrahama mpanompony[271].

⁴³Dia navoakany ny vahoaka voafidiny, ka niravo sy nanao horakora-pifaliana;

⁴⁴nomeny azy ny tanin’ireo hafa firenena ka izay nisasaran’izy ireny no lasany[272],

⁴⁵mba hitandremany ny didiny sy hankatoavany ny Lalàny. Haleloià!