Read DIEM PROTESTANTA Salamo 106 Bible Online

Salamo 106 - DIEM PROTESTANTA bible

Salamo 106

¹Haleloià! Miderà ny TOMPO ianareo fa tsara Izy: — eny, maharitra mandrakizay ny fitiavany[273]!

²Iza no afaka hilaza ny asa lehibe vitan’ny TOMPO ka hampanako ny fiderana manontolo sahaza Azy?

³Sambatra izay mitandrina ny rariny ka manao ny hitsiny amin’ny fotoana rehetra.

⁴TOMPO ô, mba tsarovy aho, rehefa anehoanao fitia ny vahoakanao; mba tolory famonjena aho, rehefa mamonjy azy Ianao.

⁵Aoka hahita ny fandrosoan’ireo voafidinao aho ary hiombom-pifaliana amin’ny vahoakanao sy hiara-miravoravo amin’ireo voatokana ho Anao!

⁶Efa nanota toy ny razanay izahay, eny, efa nivoana sy nanao ratsy.

⁷Fony tany Ejipta ny razanay, dia tsy nahatakatra ny asanao mahagaga; tsy nahatsiaro ny halehiben’ny fitiavanao izy, koa teo akaikin’ny Ranomasin’ny Volotara[274] dia nikomy taminao Avo Indrindra.

⁸Nefa noho Izy Tompo dia novonjeny ny razanay mba hampahafantarany ny heriny lehibe.

⁹Norahonany ny Ranomasin’ny Volotara ka maina niaraka tamin’izay; dia toy ny mandeha amin’ny tany maina no nitondrany azy hitety ny fanambanin’ny ranobe.

¹⁰Novonjeny tsy ho azon’ny mpankahala ireo ary nafahany tsy ho voatanan’ny fahavalo.

¹¹Voarakotry ny rano kosa ireo mpandrafy ka tsy nisy niangana na iray aza[275];

¹²ka dia mba nino ny tenin’Andriamanitra sy nihira fiderana Azy ny razanay[276].

¹³Vetivety anefa dia hadinon’ireo razanay ny asa nataon’Andriamanitra ka tsy andriny akory ny fandaharany.

¹⁴Voan’ny fitsiriritana tany an-taniefitra ireo ary nihantsy an’Andriamanitra tany an-tany hay.

¹⁵Dia nomeny azy ny hena notakîny ka nataony voky sy leony mihitsy ireo[277].

¹⁶Tao an-toby kosa dia nisy nialona i Mosesy sy i Aharôna ilay voatokana ho an’ny TOMPO.

¹⁷Koa nivava ny tany nitelina an’i Datàna sady nanarona ny tarik’i Abirama.

¹⁸Afo no nandoro ny tarik’izy roa lahy, lelafo no nandevona ireo olon-dratsy ireo[278].

¹⁹Dia nanamboatra ombilahikely tao Hôreba ny razanay, ka niankohoka teo amin’ny sarivongana varahina.

²⁰Ny voninahitr’Andriamanitra dia nosoloiny sarivongan’ombilahy homana ahitra.

²¹Hadinony Andriamanitra mpamonjy azy, Ilay nanao zava-dehibe tany Ejipta,

²²dia ireo zava-mahagaga tao amin’ny tanin’i Hama[279] ary koa ireo zava-mahatalanjona teo amin’ny Ranomasin’ny Volotara.

²³Dia nilaza Andriamanitra fa handringana azy; kanjo i Mosesy ilay voafidiny dia nanelanelana teo anatrehany ka nisakana ny hatezerany tsy hamongotra[280].

²⁴Avy eo tsy nasiany lanjany akory ilay tany mahafinaritra ary tsy ninoany velively ny fampanantenan’Andriamanitra;

²⁵fa nikomy tao an-dainy izy ary tsy nihaino intsony izay nolazain’ny TOMPO.

²⁶Koa nanangan-tanana hianiana Andriamanitra fa handringana an’ireo razanay any an-taniefitra[281],

²⁷hampiely ny taranany any amin’ny hafa firenena ka hamela azy ho faty any an-tany rehetra any[282].

²⁸Tao Pehôra dia nanolo-tena ny razanay hanompo ny sampy Bahala sady nihinana ny hena natao sorona ho an’ny andriamanitra maty[283].

²⁹Nampahatezitra ny Tompo izy tamin’izany, koa namely azy tampoka ny areti-mandringana.

³⁰Saingy nijoro i Pinehasa nanelanelana, dia nitsahatra ilay areti-mandringana:

³¹koa izany asa soa izany dia hahatsiarovana azy eo amin’ny taranaka mifandimby ary mandrakizay[284].

³²Nampahatezitra ny Tompo koa ny razanay teo akaikin’ny loharanon’i Meribà, ka nampahita faisana an’i Mosesy

³³izay tofoka loatra tamin’ny nafitsok’ireo ka nahavoaka teny tsy voahevitra[285].

³⁴Tsy naringan’ny razanay ny Kanahanita, na dia nasain’ny TOMPO nataony aza izany[286].

³⁵Niharoany ny hafa firenena sady nianarany ny fanaony;

³⁶ary notompoiny ny sampin’ireny ka tonga fandrika ho azy izany[287].

³⁷Nataony sorona ho an’andriamani-tsiizy ny zanany lahy sy ny zanany vavy[288].

³⁸Novonoiny ho faty ny ankizy tsy manan-tsiny izay nataony sorona ho an’ny sampin’i Kanahàna; ka nandotoany ny tany ireo olona nalatsa-dra ireo[289].

³⁹Nozimbainy tamin’ny nataony koa ny tenany fony izy nivadika tamin’ny Tompo Andriamaniny[290].

⁴⁰Koa nirehetan’ny fahatezeran’ny TOMPO ilay vahoakany ary naharikoriko Azy tokoa ireo voatokana ho fananany.

⁴¹Natolony ho eo an-tanan’ny hafa firenena izy, ary tonga nanompo vahoaka mpankahala azy,

⁴²noporetin’ireo fahavalony izy ary niforitra teo ambany fahefàny.

⁴³Imbetsaka izy no nafahan’ny Tompo, saingy nikiry tamin’ny fikomiany ka nilentika tanaty heloka hatrany.

⁴⁴Hitany ny fijalian’ireo ary reny ny fitarainany.

⁴⁵Dia tsaroany ny fanekempihavanany hitsimbinana azy; be fitiavana Izy ka nanjary niova hevitra taminy.

⁴⁶Izay rehetra namabo ny razanay dia nataony nahay nangoraka azy[291].

⁴⁷TOMPO Andriamanitray ô, vonjeo izahay ka angony avy any amin’ny hafa firenena, mba hideranay ny anaranao masina ary hifalianay amin’ny fankalazana Anao.

⁴⁸Hisaorana anie ny TOMPO Andriamanitr’i Israely hatrizay hatrizay ka ho mandrakizay! Ary aoka ny vahoaka rehetra tafangona hilaza hoe: Amen! Haleloià!