Read DIEM PROTESTANTA Salamo 109 Bible Online

Salamo 109 - DIEM PROTESTANTA bible

Salamo 109

¹Tao amin’ny tahirin-kiran’ny filohan’antoko-mpihira. Salamo nataon’i Davida. Ry Andriamanitra fidèrako ô, aza dia mangina fotsiny Ianao,

²fa nisoka-bava hamely ahy ny olon-dratsy sy mpamitaka; resaka feno lainga no ataony amiko,

³teny fankahalana no manemitra ahy ary iadiany tsy amin’antony aho.

⁴Ny fitiavako valiany fandrafiana, fa izaho kosa mivavaka ho azy;

⁵ratsy no asetriny ny soa ataoko, fankahalana no avaliny ny fitiavako.

⁶Hoy izy ny amiko: «Anendreo olon-dratsy hamely azy[299]; aoka hisy mpiampanga hitsangana eo ankavanany!

⁷Rehefa hotsaraina izy, dia aoka ho hita fa meloka; ary na ny fivavahany aza, aoka ho tonga fahotana!

⁸Hohafohezina anie ny andro iainany ary ho lasan’olon-kafa ny andraikiny[300]!

⁹Aoka ho kamboty ny zanany ary ho mpitondratena ny vadiny!

¹⁰Ho mpirenireny mangataka anie ny zanany ary ho voaroaka lavitra ny fonenany rava!

¹¹Halain’ny tompon-trosa anie ny fananany rehetra ary ho olon-kafa no hifaoka ny vokatry ny asany!

¹²Aoka tsy hisy hamindrafo aminy na koa hiantra ny zanany kamboty!

¹³Ho lany tamingana anie izy ary amin’ny taranaka faharoa no aoka hanjavonan’ny lazany!

¹⁴Hampahatsiahivina ny TOMPO anie ny heloky ny rainy ary tsy mba ho voakosoka ny fahotan-dreniny,

¹⁵fa samy hotsarovan’ny TOMPO mandrakariva izany! Hofoanany eto amin’ity tany ity anie ny fahatsiarovana an’ireo olona ireo!

¹⁶Izy io tsy mba nahalala namindrafo, fa nanenjika sy nanao izay hahafaty ny ory ary koa ny malahelo mbamin’ny rera-po.

¹⁷Tia manozona izy, ka aoka hiantontany; tsy tia mitsodrano izy, ka aoka hidifiany!

¹⁸Ny ozona no tahaka ny lamba itafiany; ka dia hanenika ny tenany tahaka ny rano anie izany[301] ary ho ao anatin’ny taolany tahaka ny tsoka!

¹⁹Ho toa akanjo mandrakotra azy anie ny ozona, ho toa etra mamatotra azy lalandava!»

²⁰TOMPO ô, izany no ataon’ny mpiampanga ahy teo aminao; izany no afitsok’ireo olona mpanendrikendrika ahy.

²¹Kanefa, ry TOMPO Andriamanitro ô, hasoavy aho. Sarobidy ny fitiavanao, koa afaho re aho

²²satria mahantra sy malahelo sady misy ratram-po ato anatiko.

²³Lasa toa aloka miserana aho; voaroaka toa valala kopahina[302].

²⁴Fatra-pifady hanina aho ka mangozohozo ny lohaliko sady mahia kaozatra ny tenako.

²⁵Dia tonga fandàtsan’ireo olon-dratsy aho, ka vao mijery ahy izy dia mihifikifi-doha[303].

²⁶TOMPO Andriamanitro ô, mba ampio aho; vonjeo aho araka ny fitiavanao.

²⁷Aoka ho fantatry ny olon-dratsy fa asanao izao; sady Ianao, TOMPO ô, no nanao izany ho ahy.

²⁸Izy manozona ahy, Ianao kosa mitsodrano; ka ny mpamely ahy ho menatra, izaho mpanomponao kosa hifaly.

²⁹Ny amin’ireo mpiampanga lainga ahy anie dia ny fahafaham-baràka no ho toa akanjo itafiany ary ny henatra no ho toa lamba mandrakotra azy!

³⁰Ho fatra-pisaotra ny TOMPO izany vavako; eny, eo afovoan’olona maro no hiderako Azy

³¹noho Izy mijoro hiaro ny zon’ireo fadiranovana mba hamonjy azy amin’izay manameloka ho faty.