Read DIEM PROTESTANTA Salamo 119 Bible Online

Salamo 119 - DIEM PROTESTANTA bible

Salamo 119

¹Sambatra[336] ny mahitsy fitondrantena, dia izay manaraka ny lalànan’ny TOMPO.

²Sambatra izay mitandrina ny baikony, ka mitady Azy amin’ny fony manontolo.

³Eny, tsy mba manao ratsy ireo fa manaraka ny sori-dalan’Andriamanitra.

⁴Ianao namoaka ny fepetranao, Tompo ô, mba hotandremana fatratra.

⁵Enga anie ny fitondrantenako ho matotra amin’ny fitandremana ny lalànanao;

⁶dia tsy ho menatra aho mandinika ny didinao rehetra.

⁷Hidera Anao amin-kitsimpo aho mianatra ny fitsarana ara-drariny navoakanao.

⁸Ny lalànanao no tiako hotandremana, koa aza afoinao na oviana na oviana aho.

⁹Raha maninona ny tanora no hadio toetra? Raha mitandrina ny teninao.

¹⁰Amin’ny foko manontolo no itadiavako Anao, koa aza avela handao ny didinao aho.

¹¹Raketiko ato am-poko ny hafatrao mba tsy hanotako aminao.

¹²Hisaorana anie Ianao, TOMPO ô! Ampianaro ahy ny lalànanao.

¹³Tanisain’ny molotro avokoa ny fitsipika naloaky ny vavanao.

¹⁴Ny mizotra araka ny baikonao no mahafaly ahy noho izay harena.

¹⁵Ny fepetranao hosaintsainiko, ny sori-dàlanao hodinihiko;

¹⁶ny lalànanao firavoako, ny teninao fitadîdiko.

¹⁷Asio soa aho mpanomponao ho velona sy hitandrina ny teninao.

¹⁸Ampahirato ny masoko hahita ny zava-mahagaga amin’ny lalànanao.

¹⁹Vahiny eto an-tany aho; aza afenina ahy ny didinao.

²⁰Matimaty erỳ aho maniry ny fitsipikao amin’ny fotoan-drehetra.

²¹Rahonanao ny mpirehareha voaozona, izay mandao ny didinao.

²²Alao amin’ny fahafaham-baràka sy ny fanamavoana aho, satria manaraka ny baikonao.

²³Na andriana aza no mioko hamely ahy, izaho mpanomponao misaintsaina ny lalànanao.

²⁴Ny baikonao no firavoako: ireo no manolo-tsaina ahy.

²⁵Mihohoka amin’ny vovoka ny tenako, ka velomy indray araka ny fampanantenànao.

²⁶Nitanisako ny fiainako Ianao ka namaly ahy; ampianaro ahy ny lalànanao.

²⁷Ampahafantaro ahy ny fepetranao ho sori-dàlako mba hisaintsainako ny asa mahagaga nataonao.

²⁸Patrapatraka ny ranomasoko noho ny alahelo; areno aho araka ny fampanantenànao.

²⁹Halaviro ahy rehefa mety ho soritra mamitaka; ny lalànanao no aoka hanenika ahy!

³⁰Nofidiko ho sori-dàlako ny firaiketam-po aminao; nataoko teo anatrehako ny fitsipikao.

³¹Ny baikonao no ifikirako; TOMPO ô, aza avela ho azon-kenatra aho.

³²Ny didinao no sori-dalana ihazakazahako, satria nosokafanao ny saiko.

³³TOMPO ô, atoroy ahy ny lalànanao ho sori-dàlako mba hanarahako azy hatramin’ny farany.

³⁴Ataovy mahira-tsaina aho hanarahako ny lalànanao, sy hitandremako azy amin’ny foko manontolo.

³⁵Ampizory amin’ny sori-dàlan’ny didinao aho, satria izany no fahafinaretako.

³⁶Ampirony amin’ny baikonao ny foko fa tsy amin’ny fitiavan-karena.

³⁷Avilio ny masoko tsy hijery zava-poana; velomy amin’ny sori-dàlanao aho.

³⁸Tovy amin’ny mpanomponao ny hafatrao izay nataonao ho an’ny mpanaja Anao.

³⁹Halaviro ahy ny fahafaham-baràka atahorako, satria tsara ny fitsipikao.

⁴⁰Indro maniry ny fepetranao aho, koa velomy ao amin’ny fahamarinanao.

⁴¹Ho tonga amiko anie, TOMPO ô, ny mari-pitiavanao, dia ny famonjenao araka ny toky nomenao!

⁴²Ny mpanala baràka ahy ho voavaliko, satria ny teninao no itokiako.

⁴³Ny zava-marim-pototra aza avela hivadihako, satria ny fitsipikao no antenaiko.

⁴⁴Ny lalànanao tiako hotandremana lalandava ka ho mandrakizay mandrakizay.

⁴⁵Hizotra amin-kalalahana aho, fa ny fepetranao no katsahiko.

⁴⁶Ny baikonao no holazaiko tsy amin-kenatra eo anatrehan’ny mpanjaka.

⁴⁷Ny didinao no iravoako ary ankamamîko fatratra.

⁴⁸Hanandra-tanana hivavaka aminao aho[337], ka ny lalànanao no hosaintsainiko.

⁴⁹Tsarovy ny teninao tamiko mpanomponao, dia ilay teny nataonao ho fitokiako.

⁵⁰Hany fiononako amin’ny fahoriako izany, satria ny hafatrao no mamelona ahy.

⁵¹Lalina raha haneso ahy ny mpirehareha fa izaho tsy mivoana amin’ny lalànanao.

⁵²Ny fitsipikao hatrizay, TOMPO ô, no tsaroako ka ahazoako fiononana.

⁵³Entanin’ny fahatezerana mafy aho fa mandao ny lalànanao ny olon-dratsy.

⁵⁴Ny lalànanao no ataoko fihira ao an-trano ivahiniako[338].

⁵⁵Tsaroako mandraka alina Ianao, TOMPO ô, mba hitandremako ny lalànanao.

⁵⁶Izao no hany fananako: ny manaraka ny fepetranao.

⁵⁷Ny anjarako, TOMPO ô, hoy aho, dia ny mitandrina ny teninao.

⁵⁸Ny foko manontolo no italahoako aminao, koa iantrao aho araka ny toky nomenao.

⁵⁹Mandinika ny fitondrantenako aho, ka manitsy dia amin’ny fitsipikao.

⁶⁰Dodona aho fa tsy mitaredretra amin’ny fitandremana ny didinao.

⁶¹Voan’ny fandriky ny olon-dratsy aho, nefa tsy manadino ny lalànanao.

⁶²Mifoha mamatonalina aho hidera Anao noho ny fitsipikao ara-drariny.

⁶³Ihavanako avokoa izay manaja Anao sy izay mitandrina ny fepetranao.

⁶⁴Ny fitiavanao, TOMPO ô, manenika ny tany; ampianaro ahy ny lalànanao.

⁶⁵Efa nasianao soa izaho mpanomponao, dia araka ny fampanantenànao, TOMPO ô.

⁶⁶Ampianaro hahafantatra sy hahalala aho, satria azoko antoka ny didinao.

⁶⁷Naniasia aho fony tsy mbola azom-pahoriana, fa ankehitriny tandremako ny hafatrao.

⁶⁸Soa Ianao, Tompo ô, sady mpanisy soa: ampianaro ahy ny lalànanao.

⁶⁹Mamoron-dainga hamelezana ahy ny mpirehareha; amin’ny foko manontolo no anarahako ny fepetranao.

⁷⁰Donto velona ny sain’ireo, fa izaho miravo amin’ny lalànanao.

⁷¹Nahasoa ahy ny azom-pahoriana mba hianarako ny lalànanao.

⁷²Aleoko ny lalàna naloaky ny vavanao toy izay ny volamena amam-bolafotsy miavosa.

⁷³Nanao sy namboatra ahy ny tananao: ataovy mahira-tsaina aho hianarako ny didinao.

⁷⁴Hifaly mahita ahy ireo manaja Anao, satria ny teninao no antenaiko.

⁷⁵Ny fitsipikao, TOMPO ô, fantatro fa rariny; ka marim-pototra ny nampahorianao ahy.

⁷⁶Hampionona ahy anie ny fitiavanao, araka ny hafatrao tamiko mpanomponao!

⁷⁷Ho tonga ato amiko anie ny indrafonao ka hamelona ahy, satria ny lalànanao no firavoako!

⁷⁸Aoka ho menatra ny mpirehareha mampahory tsy amin’antony, fa izaho misaintsaina ny fepetranao!

⁷⁹Hitodika amiko anie ireo manaja Anao, mba hahafantarany ny baikonao!

⁸⁰Ny foko manontolo anie hifikitra amin’ny lalànanao, dia tsy ho rakotry ny henatra mihitsy aho!

⁸¹Reraka aho maniry ny famonjenao: ny teninao no antenaiko.

⁸²Valalanina ny masoko miandry ny hafatrao; rahoviana no hampiononanao ahy?

⁸³Zary *siny hoditra mainan’ny setroka aho, kanefa tsy hadinoko ny lalànanao.

⁸⁴Hiaritra ela toy izao foana ve izaho mpanomponao? Rahoviana ny mpanenjika ahy no hotsarainao?

⁸⁵Mihady longoa hianjerako ny mpirehareha; tsy raharahainy akory izay lalànanao.

⁸⁶Azo antoka avokoa ny didinao; vonjeo aho fa enjehina tsy amin’antony.

⁸⁷Kely sisa dia levona eto an-tany aho, kanefa tsy mba nafoiko ny fepetranao.

⁸⁸Noho ny fitiavanao, mba velomy aho hitandremako ny baiko naloaky ny vavanao.

⁸⁹Maharitra mandrakizay, TOMPO ô, no nanorenanao any an-danitra ny teninao.

⁹⁰Mahatoky Ianao, amin’ny taona mifandimby; Naorinao ny tany ka mitoetra mafy.

⁹¹Mandraka androany, araka ny fitsipikao, dia mbola eo ny tontolo satria mpanomponao.

⁹²Raha tsy ny lalànanao no firavoako, toy izay aho efa matin’ny fahoriana.

⁹³Tsy hohadinoiko mandrakizay ny fepetranao izay namelomanao ny aiko.

⁹⁴Fanananao aho ka vonjeo, satria mikatsaka ny fepetranao.

⁹⁵Mikendry hamely ahy ny olon-dratsy, satria ny baikonao no hadihadîko.

⁹⁶Izay toa lavorary dia nahitako fetra; ny didinao no tena midadasika.

⁹⁷Endrey ny fitiavako ny lalànanao; tontolo andro dia izy no saintsainiko.

⁹⁸Ny didinao, izay fananako mandrakizay, dia mahatonga ahy ho hendry noho ny fahavaloko.

⁹⁹Hendry noho ny mpampianatra ahy rehetra aho, satria misaintsaina ny baikonao.

¹⁰⁰Mahira-tsaina noho ny zokiolona aho, satria ny fepetranao no arahiko.

¹⁰¹Tsy nisy nekeko ny sori-dalàn’ny faharatsiana mba hitandremako ny teninao.

¹⁰²Tsy mba miala amin’ny fitsipikao aho, fa Ianao dia Ianao no mampianatra ahy.

¹⁰³Mamy tokoa amiko ny hafatrao, eny, manoatra noho ny tantely aza.

¹⁰⁴Ny fepetranao mampahira-tsaina ahy; koa hàlako rehefa mety ho soritra mamitaka.

¹⁰⁵Fanilon’ny diako ny teninao sy fanazavana ny làlan-kizorako.

¹⁰⁶Hamafisiko ny velirano izay nataoko, dia ny hitandrina ny fitsipikao ara-drariny.

¹⁰⁷Mijaly tsy eran’ny aina aho, TOMPO ô: mba velomy indray araka ny fampanantenànao.

¹⁰⁸Mba raiso ny tonom-bavaka atolotro Anao[339]: TOMPO ô, ampianaro ahy ny fitsipikao.

¹⁰⁹Hatenda lalandava izao ny aiko, nefa tsy hadinoko ny lalànanao.

¹¹⁰Ny olon-dratsy mitady hamandrika ahy, fa izaho tsy mihataka amin’ny fepetranao.

¹¹¹Ny baikonao no fananako mandrakizay: ireo no fifalifalian’ny foko.

¹¹²Aronako hanao ny lalànanao ny foko, hatramin’ny antsipiriany ary mandrakizay.

¹¹³Hàlako ny olona miroa saina, fa ny lalànanao kosa no tiako.

¹¹⁴Ianao no fiereko sy ampingako; ny teninao no antenaiko.

¹¹⁵Mialà amiko, ianareo mpanao ratsy, hanarahako ny didin’Andriamanitra.

¹¹⁶Tohàny araka ny fampanantenànao aho ho velona; aoka tsy hataonao diso fanantenana!

¹¹⁷Tohàny hatrany aho mba ho voavonjy; ny lalànanao no firavoako lalandava.

¹¹⁸Izay rehetra miala amin’ny lalànanao aetrinao, satria ny lainga no teti-dratsy ao an-tsainy.

¹¹⁹Ny olon-dratsy eran-tany taim-by fanarinao: izany no itiavako ny baikonao.

¹²⁰Mihorohoro ny nofoko noho ny aminao, fa atahorako tokoa ny fitsipikao.

¹²¹Ny rariny sy hitsiny no ataoko; aza atolotra ny mpampahory aho.

¹²²Porofoy fa mahasoa ahy mpanomponao izany; aoka aho tsy hampahorîn’ny mpirehareha!

¹²³Ny masoko valalanina miandry ny famonjenao sy ny fanafahana izay nampanantenainao.

¹²⁴Ny fitiavanao itondrana ahy mpanomponao: koa ampianaro ny lalànanao aho.

¹²⁵Mpanomponao aho ka mba ataovy mahira-tsaina hahafantarako ny baikonao.

¹²⁶Izao no fotoana mety hihetsehanao, TOMPO ô, fa dikain’ny olona ny lalànanao.

¹²⁷Izany no itiavako ny didinao manoatra ny volamena madio indrindra.

¹²⁸Izany no ifidianako ny fepetranao sy ankahalàko izay mety ho soritra mamitaka.

¹²⁹Mahagaga ny baikonao, ka izany no anarahako azy.

¹³⁰Manazava tokoa ny fahitana ny teninao ary mampahira-tsaina ny olon-tsotra.

¹³¹Mitanatana vava, mihanahana aho: ny didinao no mahaliana ahy.

¹³²Mba todiho aho ka iantrao, araka ny tinapakao ho an’ireo mpitia Anao.

¹³³Hamafiso ho amin’ny hafatrao ny diako; aoka aho tsy hanjakam-paharatsiana!

¹³⁴Afaho amin’ny mpampahory aho mba hitandremako ny fepetranao.

¹³⁵Jereo amin-kamorampo izaho mpanomponao: ampianaro ahy ny lalànanao.

¹³⁶Izaho dia mamarin-dranomaso, satria tsy voatandrina ny lalànanao.

¹³⁷Mandala ny rariny Ianao, TOMPO ô, ary mahitsy ny fitsipikao.

¹³⁸Ny baikonao dia ara-drariny sy azo antoka tokoa.

¹³⁹Mandoro ahy toy ny afo ny zotompoko, fa hadinon’ny mpandrafy ahy ny teninao.

¹⁴⁰Voasedra tanaty memy tokoa ny hafatrao, ka dia tia azy ireny izaho mpanomponao.

¹⁴¹Kely sady mavomavo aho, nefa tsy hadinoko ny fepetranao.

¹⁴²Mahitsy mandrakizay ny fahitsianao ary mahatoky ny lalànanao.

¹⁴³Azon’ny fahoriana sy ny fahaterena aho, nefa mbola miravo amin’ny didinao.

¹⁴⁴Mahitsy mandrakizay ny baikonao; ataovy mahira-tsaina aho mba ho velona.

¹⁴⁵Miantso amin’ny foko manontolo aho ka valio mba hanarahako ny lalànanao, TOMPO ô.

¹⁴⁶Miantso Anao aho ka vonjeo hitandremako ny baikonao.

¹⁴⁷Mialoha ny mazavatsinanana aho mitalaho ary dia miandry ny teninao.

¹⁴⁸Mialoha ny besinimaro aho no nifoha mba hisaintsaina ny hafatrao.

¹⁴⁹Henoy ny feoko araka ny fitiavanao; TOMPO ô, velomy araka ny fitsipikao aho.

¹⁵⁰Ireo mpanenjika ahy manatona heloka; ny lalànanao kosa halaviriny.

¹⁵¹Akaiky ahy Ianao, TOMPO ô, ary mahatoky avokoa ny didinao.

¹⁵²Ny baikonao dia fantatro hatry ny ela fa naorinao ho mandrakizay.

¹⁵³Jereo ny fahoriako, ka afaho aho, fa ny lalànanao tsy hadinoiko.

¹⁵⁴Iandraiketo ny adiko ka avoty aho ary velomy araka ny fampanantenànao.

¹⁵⁵Lavitra ny olon-dratsy ny famonjena, satria tsy ny lalànanao no katsahiny.

¹⁵⁶Lehibe ny indrafonao, TOMPO ô; velomy aho araka ny fitsipikao.

¹⁵⁷Maro ny mpanenjika sy mpandrafy ahy; ny baikonao tsy mba ialako.

¹⁵⁸Nahita mpivadika aho, ka narikoriko; ny hafatrao tsy mba tandremany.

¹⁵⁹Jereo fa mankamamy ny fepetranao aho, ka velomy araka ny fitiavanao, TOMPO ô.

¹⁶⁰Ny toetra mahatoky no mivohitra amin’ny teninao; ny fitsipikao dia ara-drariny avokoa sy mandrakizay.

¹⁶¹Enjehin’andriana tsy amin’antony aho; ny teninao ihany no atahoran’ny foko.

¹⁶²Ny hafatrao no mahafaly ahy tahaka ny mahazo remby sesehena.

¹⁶³Hàlako ary maharikoriko ahy ny fitaka, fa ny lalànanao no ankamamîko.

¹⁶⁴Impito isan’andro no iderako Anao noho ny fitsipikao ara-drariny.

¹⁶⁵Fiadanam-be ny an’izay mankamamy ny lalànanao, ary tsy misy zavatra mahasolafaka azy.

¹⁶⁶Ny famonjenao, TOMPO ô, no antenaiko ka ny didinao no tanterahiko.

¹⁶⁷Ny baikonao dia tandremako, satria ankamamîko aoka izany.

¹⁶⁸Eny, voatandriko ny fepetra amam-baikonao; eo anoloanao ny làlan-kalehako rehetra.

¹⁶⁹Aoka ho tonga eo anoloanao ny tarainako, TOMPO ô! Ataovy mahira-tsaina aho araka ny fampanantenànao.

¹⁷⁰Ny fihantàko anie ho tody eo anatrehanao; mba afaho aho araka ny toky nomenao.

¹⁷¹Hidera Anao anie ny molotro, satria nampianarinao ahy ny lalànanao!

¹⁷²Hanambara ny hafatrao anie ny lelako, satria rariny avokoa ny didinao!

¹⁷³Ny fiarovanao anie hanampy ahy, satria ny fepetranao no nofidiko!

¹⁷⁴Mahaliana ahy, TOMPO ô, ny famonjenao; ary ny lalànanao no firavoako.

¹⁷⁵Veloma anie ny aiko hiderako Anao; ary hanampy ahy anie ny fitsipikao!

¹⁷⁶Ondry nania izaho mpanomponao ka tadiavo; fa ny didinao tsy mba hadinoiko.