Read DIEM PROTESTANTA Salamo 139 Bible Online

Salamo 139 - DIEM PROTESTANTA bible

Salamo 139

¹Tao amin’ny tahirin-kiran’ny filohan’antoko-mpihira. Salamo nataon’i Davida. TOMPO ô, nandinika ahy Ianao ka fantatrao avokoa ny momba ahy.

²Fantatrao aho na mipetraka na mitsangana; elabe mialoha, dia efa tsinjonao ny hevitro.

³Voadinikao aho na mamindra na miato; ary tsy misy miafina aminao ny làlan-kalehako.

⁴Tsy mbola eo am-bavako akory ny teny holazaiko, dia indro efa fantatrao avokoa, TOMPO ô.

⁵Voambombanao aho na eo aloha na eo ivoho; ny fiarovanao no apetrakao amiko.

⁶Mahagaga loatra amiko ny fahalalànao ahy; avo tokoa izany, ka tsy takatro velively.

⁷Aiza no hialàko lavitra ny Fanahinao? Aiza no handosirako tsy ho eo anatrehanao?

⁸Raha miakatra any an-danitra aho, any Ianao; mandry any amin’ny toeran’ny maty aho, io koa Ianao.

⁹Raha maka ny elatry ny mazavatsinanana aho na lasa honina any am-paran’ny ranomasina,

¹⁰dia mbola ny fiarovanao no mitondra ahy any ary mbola ny herinao koa no mihazona ahy.

¹¹Ka hoy aho hoe: «Aoka ny haizina hanarona ahy! Aoka ny hazavana manodidina ahy hanjary alina!»

¹²Na ny haizina aza tsy maizina aminao, ary ny alina koa dia mazava toy ny andro: ny haizina dia toy ny hazavana ihany!

¹³Ianao no nahary ny saina amam-panahiko sy namolavola ahy tao an-kibon-dreniko.

¹⁴Midera Anao aho fa nataonao ho zava-mahatalanjona tokoa; zava-mahagaga ny asanao ary ekeko mihitsy izany.

¹⁵Tsy misy takona taminao izany tenako, fony aho noforoninao tao amin’ny miafina ka notenominao tao an-kibon-dreniko.

¹⁶Tsy mbola nisy endrika aho no efa hitanao; voasoratrao tao amin’ny bokinao avokoa ireo andro voatendrinao hiainako, talohan’ny tsy mbola nisiany akory.

¹⁷Tsy haiko takarina velively ny hevitrao sady akory ity hamaroany, ry Andriamanitra ô!

¹⁸Raha hanisa aho, dia maro noho ny fasika ireny; raha hahisa aza, dia mbola tsy hahatakatra Anao.

¹⁹Andriamanitra ô, haringanao mihitsy anie ny olon-dratsy ary hohalavirinao ahy anie ny mpamono olona!

²⁰Miresaka Anao amim-pihatsarambelatsihy ireo fahavalonao sady mitonona Anao mba hoenti-mamitaka.

²¹Ankahalaiko ny mpankahala Anao, TOMPO ô; ary maharikoriko ahy ny mpanohitra Anao.

²²Hàlako dia hàlako tokoa ireo sady efa tonga fahavaloko.

²³Andriamanitra ô, diniho aho ka fantaro ny foko; zahao toetra aho ka fantaro eritreritra.

²⁴Jereo raha miroso amin’ny làla-mampidi-doza aho, dia tariho hizotra amin’ny sori-dàlanao hatrizay.