Read DIEM PROTESTANTA Salamo 147 Bible Online

Salamo 147 - DIEM PROTESTANTA bible

Salamo 147

¹Miderà ny TOMPO ianareo fa tsara Izy; mankalazà ny Andriamanitsika fa mamy Izy. Mendrika Azy tokoa ny fiderana.

²Manangana an’i Jerosalema ny TOMPO: ao no hamoriany izay efa niely tamin’i Israely.

³Manasitrana ny torotoro fo Izy sy mamehy ny ferin’ireo.

⁴Manisa tsirairay ny kintana Izy sy miantso azy amin’ny anarany avy.

⁵Lehibe ny Tompontsika sady mahery; tsy misy fetra ny fahalalàny.

⁶Manarina ny ory ny TOMPO fa manetry ny olon-dratsy hatramin’ny tany.

⁷Mihirà fiderana ho an’ny TOMPO ianareo; mankalazà an’Andriamanitsika amin’ny lokanga:

⁸Izy no manaron-drahona ny lanitra manomana orana ho an’ny tany, mampitsiry ahitra ny tanety, mamokatra anana ho an’ny olona,

⁹manome sakafo ny biby fiompy sy ny zana-goaika mitoreo.

¹⁰Tsy ny herin’ny soavaly[387] na ny hakingàn’ny olona no tena sitraky ny TOMPO sy ankamamîny,

¹¹fa izay manaja Azy ka matoky ny fitiavany.

¹²Ry Jerosalema ô, mankalazà ny TOMPO; ry Tsiôna ô, miderà an’Andriamanitrao.

¹³Izy no manamafy ny hidim-bavahadinao, mitahy ny zanakao ao anatinao,

¹⁴manisy fiadanana ny faritaninao sy mamoky anao amin’ny vary tsara indrindra,

¹⁵mandefa ny baikony eto an-tany ka faingam-piely tokoa ny teniny.

¹⁶Izy no mandatsaka orampanala toa volon’ondry, sy mamafy fanala toa lavenona,

¹⁷manipy ranomandry toa sombi-mofo ka tsy misy mahazaka ny hatsiakany.

¹⁸Alefany ny teniny, ka miempo ireny; atsokany ny rivotra, dia mandriaka ny rano.

¹⁹Izy no manambara ny teniny amin’ny taranak’i Jakôba, ny didiny sy fitsipiny amin’ny vahoaka Israely,

²⁰fa tsy mba nanao izany tamin’ny firenen-kafa ka ny fitsipiny tsy mba fantatr’ireo. Haleloià!