Read DIEM PROTESTANTA Salamo 19 Bible Online

Salamo 19 - DIEM PROTESTANTA bible

Salamo 19

¹Tao amin’ny tahirin-kiran’ny filohan’antoko-mpihira. Salamo nataon’i Davida.

²Ny lanitra manambara ny voninahitr’Andriamanitra ary ny habakabaka mitory ny asa vitany;

³ny andro mitantara izany amin’ny andro mandimby, ary ny alina milaza izany amin’ny alina manaraka.

⁴Tsy misy izay miteny na mivolana, tsy misy izay feo mety ho heno;

⁵nefa ny rindrany miharihary eran-tany, ny hafany tonga any am-paran’izao tontolo izao[40]. Nanorenan’Andriamanitra tranolay teny ana habakabaka ny masoandro.

⁶Koa isa-maraina dia miseho ilay izy toy ny mpampakatra mivoaka ny tranony; toy ny olo-matanjaka faly maka bahana mba hanefa ny hazakazaka fanaony.

⁷Ny faravodilanitra atsinanana no iaingany ary ny faravodilanitra andrefana no iafarany; ka, eny amin’ny lalan-kizorany eny, dia tsy misy afa-miery amin’ny hafanàny.

⁸Lavorary ny lalànan’ny TOMPO ka mamelombelona aina. Mahatoky ny fepetra nataon’ny TOMPO ka mampahendry ny olon-tsotra.

⁹Mahitsy ny fitsipiky ny TOMPO ka mahafaly ny fo. Mangarangarana ny baikon’ny TOMPO ka manazava ny fijery.

¹⁰Madio ny fanajana ny TOMPO, ka maharitra hatrany hatrany. Marim-pototra ny fitsarana avoakan’ny TOMPO ka ara-drariny avokoa;

¹¹mahasarika noho ny volamena, dia ny vaingam-bolamena voadio; sady mamy noho ny tantely, dia ny tantely avy amin’ny tohotra.

¹²Tompo ô, izaho mpanomponao dia hazavain’ireny tokoa; fa lehibe ny tombontsoa ho an’izay mitandrina azy.

¹³Mety manao hadisoana ny olona, saingy tsy mahatsikaritra akory; koa mamelà ahy amin’ny ota tsy nahy.

¹⁴Arovy tsy ho voan’ny ota iniana aho, ka aza avela hanan-kery amiko ireny; dia tsy hanan-tsiny tokoa aho sady ho afaka amin’ny heloka bevava.

¹⁵Hankasitrahinao anie izany teniko sy izay vetsoko teo anoloanao, ry TOMPO Vatolampiko sy Mpanavotra ahy!