Read DIEM PROTESTANTA Salamo 25 Bible Online

Salamo 25 - DIEM PROTESTANTA bible

Salamo 25

¹Salamo nataon’i Davida TOMPO ô, Ianao no ifantohako;

²Andriamanitra ô, Ianao no itokiako ka aza avela ho diso fanantenana aho na ho resy hifalian’ny fahavaloko!

³Izay rehetra miantehitra aminao dia tsy mba ho diso fanantenana; fa ireo mivadika aminao no ho menatra, ka enga anie hitondra tanam-polo mody!

⁴TOMPO ô, ampahafantaro ny lalanao aho ary ampianaro hiaina araka ny sitrakao.

⁵Tariho amin’ny fahamarinanao aho ka ampianaro, satria Ianao no Andriamanitra mpamonjy ahy sady hany ianteherako isan’andro.

⁶Tsarovy, TOMPO ô, fa hatrizay hatrizay dia be indrafo sy be fitiavana Ianao.

⁷Koa hadinoy ny fahotako, fony aho tanora; eny, hadinoy re izay hadisoana vitako; nefa mba tsarovy kosa aho, TOMPO ô, satria be fitiavana sy tsara fo Ianao.

⁸Tsara fo sy mahitsy tokoa ny Tompo ka ny mpanota toroany lalan-kaleha,

⁹ny ory tarihiny amin’ny hitsiny sady ampianariny ny sitrapony.

¹⁰Ny torohevitra rehetra ataon’ny TOMPO dia maneho fitiavana tsy miova ho an’izay manaraka ny baiko raketin’ilay fanekempihavanany.

¹¹TOMPO ô, mba ho voninahitrao, dia avelao ny heloko na lehibe aza.

¹²Raha misy olona manaja ny TOMPO, dia hotoroany ny làlan-kofidina koa izy.

¹³Hiaina amim-piadanana izany olona izany; ary ny taranany no handova ny tany[54].

¹⁴Ireo mpanaja ny TOMPO no anehoany ny tsiambaratelony, satria ampahafantariny azy tokoa izay raketin’ny fanekempihavanany.

¹⁵Banjiniko mandrakariva ny TOMPO, fa Izy ihany no hanafaka ahy amin’ny harato namandrihana ahy.

¹⁶Tompo ô, todiho aho ka iantrao fa irery sady fadiranovana.

¹⁷Toneo ny tebitebin’ny foko ary tsoahy avy ato an-katerena aho.

¹⁸Jereo ny fahoriako sy ny fijaliako, ka avelao ny fahotako rehetra.

¹⁹Jereo ny hamaroan’ny fahavaloko, sady loza tokoa ny fankahalàny ahy.

²⁰Arovy re aho ka vonjeo; aoka tsy ho diso fanantenana aho, satria Ianao no fialofako!

²¹Miantehitra aminao aho, Tompo ô, mba hiarovanao ahy hadio sy hahitsy.

²²Andriamanitra ô, ilay Israely vahoakanao mba afaho amin’ny zava-drehetra mahory azy!