Read DIEM PROTESTANTA Salamo 3 Bible Online

Salamo 3 - DIEM PROTESTANTA bible

Salamo 3

¹Salamo nataon’i Davida, fony izy nandositra an’i Absalôma zanany lahy [5].

²TOMPO ô, akory ity hamaroan’ny fahavaloko! Maro loatra ny olona mitsangan-kanohitra ahy;

³maro loatra ny milaza momba ahy hoe: «Tsy manam-pamonjena amin’Andriamanitra izy!» Fiatoana

⁴Nefa Ianao, TOMPO ô, no ampinga miaro ahy; Ianao no voninahitro sy mampitraka ahy.

⁵Raha miantso vonjy amin’ny TOMPO aho, dia valiany avy ao an-tendrombohiny masina[6]. Fiatoana

⁶Matory aho ka renoka, dia mifoha, satria ny TOMPO no manohana ahy.

⁷Tsy atahorako ny olona alinalina izay manemitra mba hamely ahy.

⁸Ry TOMPO Andriamanitro ô, midira an-tsehatra hamonjy ahy. Hasianao tehamaina ny fahavaloko rehetra, ka dia raraka ny nifin’ireo olon-dratsy.

⁹TOMPO ô, Ianao no hany afaka mamonjy. Ho amin’ny vahoakanao anie ny fitahianao! Fiatoana