Read DIEM PROTESTANTA Salamo 36 Bible Online

Salamo 36 - DIEM PROTESTANTA bible

Salamo 36

¹Tao amin’ny tahirin-kiran’ny filohan’antoko-mpihira. Nataon’i Davida mpanompon’ny TOMPO.

²Voarakitra ato an-tsaiko hatrany ny teny fikomian’ny olon-dratsy hoe: «Tsy misy dikany aminay ny fanajana an’Andriamanitra[69]!»

³Mandoka tena loatra izy, ka tsy miaiky hadisoana na mankahala izany.

⁴Izay teny lazainy dia heloka sy fitaka; nofy azy mihitsy ny hoe hanao ny tsara.

⁵Ao am-pandriany no isainany ny heloka heveriny hatao; mikiribiby amin’ny fanao tsy mety izy ary tsy laviny akory ny ratsy.

⁶TOMPO ô, mahatakatra ny lanitra ny fitiavanao; mipaka eny amin’ny rahona ny toetranao mahatoky.

⁷Avo toy ireo tendrombohitra ny fahamarinanao; lalina toy ny ranomasina izany fitsarànao. TOMPO ô, samy vonjenao na olombelona na biby.

⁸Sarobidy loatra ny fitiavanao, Andriamanitra ô, ka mitady fialofana eo ambany elatrao ny olona[70];

⁹Fenoinao harena avy ao an-tranonao izy, ka diboka ny zava-tsoa mandriaka toy ny ony.

¹⁰Fa ao aminao ny loharanon’aina; ny fahazavanao no manazava anay.

¹¹Mbola anehoy fitiavana ireo mahalala Anao; ho marina hatrany Ianao amin’ireo mahitsy fo.

¹²Tsy hanosihosy ahy anie ny mpiavonavona; tsy haharoaka ahy anie ireo olon-dratsy!

¹³Indreo fa lavo etoana ny mpanao heloka, nianjera ka tsy ho tafarina intsony.