Read DIEM PROTESTANTA Salamo 38 Bible Online

Salamo 38 - DIEM PROTESTANTA bible

Salamo 38

¹Salamo nataon’i Davida. Hitaomana an’Andriamanitra hahatsiaro azy [71].

²TOMPO ô, tezitra amiko Ianao nefa aza faizina aho; eny, vinitra amiko Ianao nefa aza sazîna aho[72].

³Nitsatohan’ny zana-tsipîkanao aho, ary niantefan’ny tehamaina famaizanao.

⁴Tsy misy tsy marofy ny nofoko noho ny fahatezeranao; tsy misy tsy marary ny taolako noho ny fahotako.

⁵Fa mivangongo mihoatra ny lohako ny heloko toy ny enta-mavesatra tsy zakako mihitsy.

⁶Maimbo sy mandoaka ny feriko noho ny hadalàko ihany;

⁷mitanondrika sy manjoretra loatra aho, manjonitra tontolo andro, toa misaona.

⁸Mahamay voan’ny tazo ny tenako ka tsy misy tsy marofy ny nofoko.

⁹Reraka aho ary drodroka tanteraka; mitoloko ny foko ka midradradradra aho.

¹⁰Tompo ô, hitanao tokoa izay irîko, tsy miafina aminao ny sentosentoko;

¹¹miemponempona ny foko, lany hery aho, ary efa jambena mihitsy ny masoko.

¹²Ny sakaizako sy ny olon-tiako aza mihataka ahy noho ny aretiko; ary ny havako manao tazan-davitra.

¹³Ireo maniry ny ahafatesako mamela-pandrika; ireo mitady hanisy ratsy dia miteny hasomparana, sy mamorom-pitaka isan’andro hamelezana ahy.

¹⁴Fa toy ny marenina aho ka tsy mahahaino, ary tahaka ny moana ka tsy mahaloa-bava;

¹⁵Eny, tahaka ny olona tsy mandre aho ka tsy mba manana teny havaly.

¹⁶Ianao, TOMPO ô, no antenaiko; Tompo Andriamanitro ô, Ianao no hamaly.

¹⁷Fa izao no vavaka nataoko taminao: «Aza avela ho fanesom-pahavalo aho; ary aoka tsy hirehaka ireo, raha sendra mivoana ny famindrako!»

¹⁸Efa mila ho torana mihitsy aho ary ny fanaintainako tsy miala amiko.

¹⁹Eny, miaiky ny fahadisoako aho ary matahotra noho ny amin’ny otako.

²⁰Mahery ireo mandrafy ahy tsy amin’antony, maro no mankahala ahy tsy an-drariny.

²¹Valiany ratsy ny soa nataoko ary ampangainy aho satria manao ny tsara.

²²TOMPO ô, aza ilaozanao aho; Andriamanitra ô, aza manalavitra ahy.

²³Faingàna hamonjy ahy, ry Tompo Mpamonjiko ô.