Read DIEM PROTESTANTA Salamo 40 Bible Online

Salamo 40 - DIEM PROTESTANTA bible

Salamo 40

¹Tao amin’ny tahirin-kiran’ny filohan’antoko-mpihira. Salamo nataon’i Davida.

²Niandry ny Tompo am-paharetana aho ka niondrehany ary nohenoiny taraina;

³nosintoniny avy tao an-davaka lalina aho, nakariny avy tao amin’ny fota-mandrevo; ny tongotro najorony tambony vatolampy ka indro azo antoka sy matotra ny diako.

⁴Nasiany hira vaovao teo am-bavako, dia hira fiderana an’Andriamanitsika! Maro tokoa no hahita izany, ka hanaja sy hatoky ny TOMPO.

⁵Sambatra ny olona manao ny TOMPO ho tokiny ka tsy mba mirona velively amin’ny sampy na miandany amin’ny mpanompo andriamani-tsiizy.

⁶TOMPO Andriamanitro ô, maro tokoa ny zava-mahagaga izay nataonao; ka tsy misy azo ampitahaina aminao! Ary ny hevitra anasoavanao anay dia maro loatra ka tsy tambo isaina, tsy ary ho voatanisako na ho voalazako.

⁷Nampahafantarinao ahy tsara tokoa fa tsy sitrakao ny sorona amam-panatitra[76]; tsy ilainao ny sorona dorana manontolo sy ny sorona fanalana ny ota.

⁸Ka hoy aho hoe: «Inty aho tamy! Ao amin’ny bokin’ny Lalàna no ahitako fa voasoratra izay tokony hataoko.»

⁹Ny hanao ny sitraponao, Andriamanitro ô, eny, ny hanao ny sitraponao no sitrako; ary ny lalànanao dia ato anatin’ny foko.

¹⁰Ny vahoakanao tafangona maro no hilazako vaovao mahafaly ny amin’ny fanafahanao. Indro tsy hangina mihitsy aho, ary fantatrao izany, ry TOMPO ô!

¹¹Tsy mba afeniko ato am-poko ny fanafahanao, ambarako fa Mpamonjy mahatoky Ianao; ny vahoakanao tafangona amborahako ilay fitiavanao tsy miova ho anay.

¹²TOMPO ô, tsy hitsahatra hamindrafo amiko Ianao; ilay fitiavanao tsy miova no hiaro ahy lalandava.

¹³Manemitra ahy ny loza tsy hita isa; mizaka ny vokatry ny heloko aho sady tsy mahajery azy intsony noho izy ireny maro noho ny volon-dohako; ka ketraka dia ketraka ny foko.

¹⁴TOMPO ô, aoka ho sitrakao ny hanafaka ahy! TOMPO ô, faingàna hamonjy ahy!

¹⁵Ho menatra sy mangaihay avokoa anie izay olona mitady hahafaty ahy! Hihemotra sy ho afa-baràka anie izay olona maniry loza ho ahy!

¹⁶Aoka ho ankona safotry ny henatra ireo mpanakora ahy hoe: «Akorinao izay!»

¹⁷Izay rehetra mitady Anao kosa anie hifaly sy hiravoravo amin’ny nataonao; ary izay olona mpitia Anao Mpamonjy anie hivolan-dava hoe: «Lehibe tokoa ny TOMPO!»

¹⁸Tompo ô, mahantra sy malahelo aho nefa Ianao tsy mba manadino ahy. Mpamonjy sy mpanafaka ahy Ianao, ka aza ela fa tongava, Andriamanitro ô!