Read DIEM PROTESTANTA Salamo 49 Bible Online

Salamo 49 - DIEM PROTESTANTA bible

Salamo 49

¹Tao amin’ny tahirin-kiran’ny filohan’antoko-mpihira. Salamo nataon’ireo terak’i Kôra[97].

²Mandrenesa, ry olombelona rehetra; mihainoa, ry mponina eran-tany,

³na olona ambony na sarambabem-bahoaka, na ny mpanankarena na ny mahantra;

⁴fa hilaza fahendrena ny vavako, hametsovetso fahalalana ny foko.

⁵Atongilako hihaino oha-teny ny sofiko; arahin-dokanga no hivoasako ny ankamantatra.

⁶Inona moa no hatahorako amin’ny andro fahoriana, raha manodidina ahy ny mpisompatra mandoza

⁷izay mitoky amin’ny hareny miavosa sy mirehareha amin’ny fananam-beny?

⁸Tsy misy olona mahavotra ny hafa tsy akory na mahaloa tamby ho azy amin’Andriamanitra;

⁹satria lafo loatra ny avotra aina, tsy ho voaloa na oviana na oviana

¹⁰mba hahavelomana mandrakizay sy tsy hahitana ny fasana...

¹¹Samy iaraha-mahita tokoa fa ny olon-kendry dia maty, ny adala sy ny ketrina koa levona, ka mamela ny hareny ho an’ny hafa.

¹²Ny fasana no tranony mandrakizay sy fonenany amin’ny taona mifandimby, na ohatra aza ka ny anarany no niantsoana ireo taniny fahiny.

¹³Eny, rehefa ao anaty voninahitra ny olona, dia tsy mahatsapa fa mbola ho faty ka ho tahaka ny biby ihany.

¹⁴Izao no hanjo ny mpitoky tena sy hiafaran’ny olona mpirehaka: Fiatoana

¹⁵horoahina toa andian’ondry izy mba ho any amin’ny toeran’ny maty ka Rafahafatesana no mpiandry hampiraotra azy; hanitsy izy no midina am-pasana ka tsy hotsaroana ny bikany; ary ny toeran’ny maty no fonenany.

¹⁶Hotsimbinin’Andriamanitra kosa ny aiko mba ho afaka amin’ny herin’ny fahafatesana, satria Izy Andriamanitra no handray ahy. Fiatoana

¹⁷Aza mba mialona raha misy tonga mpanana, raha mitombo voninahitra ny tranony.

¹⁸Fa tsy hitondra na inona na inona izy, rehefa maty[98]; tsy ho avy hanaraka azy tsy akory ny voninahiny.

¹⁹Fony izy velona no miarahaba tena sady noderain’ny olona satria nahomby.

²⁰Kanjo lasa tafaray amin’ny razany izy, tsy hahita hazavana na oviana na oviana.

²¹Eny, rehefa ao anaty voninahitra ny olona, dia tsy mahatsapa fa mbola ho faty ka ho tahaka ny biby ihany.