Read DIEM PROTESTANTA Salamo 51 Bible Online

Salamo 51 - DIEM PROTESTANTA bible

Salamo 51

¹Tao amin’ny tahirin-kiran’ny filohan’antoko-mpihira. Salamo nataon’i Davida,

²fony i Natàna mpaminany nankao aminy, rehefa naka an’i Baty-Seba ity mpanjaka[100].

³Andriamanitra ô, iantrao aho satria fatra-pitia Ianao; koseho re ny hadisoako satria be indrafo Ianao.

⁴Sasao tanteraka aho ho afa-keloka ary diovy mba ho afa-pahotana.

⁵Eny, miaiky ny fahadisoako aho sady tsaroako lalandava ny fahotako.

⁶Ianao irery tokoa no nanotako, ny ratsy eo imasonao no nataoko; hany ka ara-drariny Ianao raha miteny, ary tsy omen-tsiny raha manadidy[101].

⁷Jereo fa meloka aho no teraka, mpanota raha notorontoronina;

⁸nefa ny hahitsy ao anaty no sitrakao, koa ny fahendrena am-po no atoroy ahy.

⁹Ataovy afa-pahotana tokoa aho, dia hadio; sasao aho, dia ho fotsy mangatsakatsaka.

¹⁰Ataovy reko ny famelanao, dia hifaly sy hiravo indray aho; ary aoka hibitaka ny taolako izay efa voamontsamontsanao.

¹¹Hadinoy tanteraka ny fahotako ary koseho avokoa ny heloka vitako.

¹²Amorony fo madio aho, Andriamanitra ô, fanahy mahatoky no aoreno ato anatiko.

¹³Aza esorina anoloanao aho; ny Fanahinao Masina, aza alana amiko.

¹⁴Avereno amiko ny hafalian’ny voavonjy; ilay Fanahinao mampazoto no anohany ahy.

¹⁵Dia hotoroako ny lalanao ireo olon-diso ka hiverina aminao ny mpanota.

¹⁶Andriamanitra ô, Andriamanitra mpamonjiko Ianao. Namono olona ho faty aho ka ataovy afa-keloka[102] mba hihobiako ny fanafahanao ahy.

¹⁷Tompo ô, ampio hiloa-bava aho, mba hanambaràko ny fiderana Anao.

¹⁸Tsy ny sorona amam-panatitra no ho sitrakao; raha izany, dia nomeko ihany Ianao. Na ny sorona dorana manontolo aza dia tsy hahafaly Anao akory.

¹⁹Ny sorona ataoko aminao, Andriamanitra ô, dia ny fanahiko tsy miavonavona; ny foko tsy miavonavona sy mangorakoraka dia tsy mba ataonao tsinontsinona, Andriamanitra ô.

²⁰Noho ny fanambinanao, hasoavy i Tsiôna, atsangano ny mandan’i Jerosalema.

²¹Dia ho sitrakao ireo sorona amam-panatitra ara-dalàna mbamin’ny sorona dorana sy izay atolotra manontolo; ka dia ombilahy no hakarina eo ambonin’ny alitaranao.