Read DIEM PROTESTANTA Salamo 55 Bible Online

Salamo 55 - DIEM PROTESTANTA bible

Salamo 55

¹Tao amin’ny tahirin-kiran’ny filohan’antoko-mpihira. Hampiarahina amin’ny valiha. Tononkalo fananarana nataon’i Davida.

²Andriamanitra ô, mba henoy ny fivavako, ary aza idifiana ny tarainako.

³Aoka aho ho tandrinao sy hovalianao fa mivezi-poana amin-tsento sy toloko,

⁴noho ny fahavaloko mihiaka sy ny olon-dratsy mampahory ahy; eny, hasomparana no atorany amiko, sady tezerany sy ankahalainy aho.

⁵Mangorohoro ato anatiko ny foko; fanahiana ny ho faty no mamely ahy.

⁶Voan’ny tahotra sy tebiteby aho ary koa heniky ny horohoro.

⁷Hoy aho hoe: «Raha izay, hono aho, no mba ary elatra toa voromahailala hisidinako hitady izay hitoerako,

⁸dia handositra lavitra aho ka honina any an-taniefitra! Fiatoana

⁹Ho dodona hamonjy fialofana aho, tsy ho tratry ny tafiotra sy ny oram-baratra.»

¹⁰Akorontano, Tompo ô, ny fikasan’ireo mpanohitra ahy; asaritaho ny teny ifanaovany[108]. Ady sy an-keriny no hitako ao an-tanàna

¹¹sy manodidina ny màndany andro aman’alina; heloka sy fampahoriana no ao anivon-tanàna

¹²tsy ialam-pitaka sy kolikoly ny lalambeny.

¹³Raha fahavalo no mamingavinga ahy, ho niaretako ihany; raha mpankahala no mirehareha hamely ahy, ho niafenako fotsiny.

¹⁴Saingy ianao iray tarika amiko, tapaka, namana sy sakaiza!

¹⁵Izany isika nifanao teny mamy sy niara-dia, fony nankao an-tranon’Andriamanitra!

¹⁶Aoka ireo mpanohitra ahy ho faty tampoka; aoka hidina velona any an-toeran’ny maty izy, fa toe-dratsy no ao amin’ny fonenany, hevi-dratsy no ao anatin’ny fony!

¹⁷Izaho kosa miantso an’Andriamanitra ka Izy TOMPO mihitsy no hamonjy ahy.

¹⁸Na hariva na maraina na antoandro no anaovako sento sy toloko, dia ho henony hatrany aho.

¹⁹Hohatoniny akaiky aho ka hafahany; eny, hotsoahiny soa aman-tsara aho amin’ny ady am-parimbona atao ahy.

²⁰Hihaino anie Andriamanitra ka hampietry an’ireo, satria Izy no Mpanjaka hatrizay hatrizay! Fiatoana Tsy mety miova toetra ireo olon-dratsy ireo sady tsy matahotra an’Andriamanitra.

²¹Ny olona nihavanany, aninjirany tanana; ny fifanekena nataony, ivadihany.

²²Malemy noho ny hero-dronono ny firesany, kanjo ady no mameno ny fony; malefaka noho ny diloilo ny teniny, kanjo toy ny sabatra vonon-kamely.

²³Apetraho amin’ny TOMPO ny fiahianao, fa Izy no hanohana anao; na oviana na oviana ny olo-marina tsy havelany hangozohozo.

²⁴Ianao, Andriamanitra ô, hampidina ao am-pasana ny olona mpandatsa-dra sy mpamitaka, na tsy mbola misasaka aza ny androm-piainany. Fa izaho kosa dia hatoky Anao hatrany.