Read DIEM PROTESTANTA Salamo 56 Bible Online

Salamo 56 - DIEM PROTESTANTA bible

Salamo 56

¹Tao amin’ny tahirin-kiran’ny filohan’antoko-mpihira. Hohiraina araka ny feon’ny hoe «Voromahailala gina any an-tany lavitra.» Salamo nataon’i Davida, fony izy voasambotry ny Filistinina tao Gata[109].

²Iantrao aho, Andriamanitra ô, fa enjehina; tontolo andro aho iadiana sy ampahorîna,

³tontolo andro enjehin’ny mpandrafy ahy, fa maro tokoa ireo no mirehareha miady amiko.

⁴Kanefa amin’ny andro atahorako, Ianao, ry ilay Avo, no itokiako.

⁵Deraiko Andriamanitra noho ny teniny; Izy no itokiako ka afa-tahotra aho. Inona no ho vitan’izay olona osa amiko?

⁶Ny hampahory ahy no resahina tontolo andro, ny hanisy ratsy ahy ihany no heverin’ireo.

⁷Mivorivory izy, dia miery mitsongo dia satria ny hahafaty ahy no kendreny.

⁸Valio araka ny haratsiany izy, Andriamanitra ô, aripaho amin-katezerana ireo olona ireo.

⁹Ny nirenireneko efa voasoratrao ho ao anaty bokinao; angony koa ny ranomasoko ho ao anaty sinikelinao.

¹⁰Andriamanitra ô, amin’ny andro iantsoako Anao, dia hiamboho ireo fahavaloko ka hitsoaka; satria fantatro tokoa fa Ianao no momba ahy.

¹¹Deraiko Andriamanitra noho ny teniny; eny, deraiko Izy TOMPO noho ny teniny.

¹²Izy no itokiako ka afa-tahotra aho. Inona no ho vitan’izay olona osa amiko?

¹³Andriamanitra ô, nanao voady taminao aho ka hanefa sorom-pisaorana ho Anao,

¹⁴satria narovanao tsy ho faty aho. Eny, Andriamanitra ô, nambenanao aho mba tsy ho solafa-mamindra ka hizotra eo anoloanao, anatin’ny hazavana mahavelona.